Ko e Hā ke Mahuʻingaʻia Ai ʻi he Puleʻanga ʻo e ʻOtuá?

ʻOku laui miliona ʻa e kakai takatakai ʻi he māmaní ʻoku tuku ʻenau ʻamanakí ʻi he Puleʻanga ʻo e ʻOtuá. ʻOku nau muimui ki he sīpinga naʻe fokotuʻu ʻe Sīsū, ʻa ia naʻá ne akoʻi ʻene kau muimuí ke nau lotu: ‘Ke hoko mai hoo buleaga. Ke fai ho finagalo i mamani.’—Mātiu 6:10, PM.

Ko e mālié, ʻoku mahuʻingaʻia moʻoni ʻa e kakai tokolahi ʻi he Puleʻanga ʻo e ʻOtuá, ka ko e ngaahi lotu lahi ʻoku ʻikai ke nau fuʻu tokanga ki ai. ʻI he fekauʻaki mo e meʻá ni, naʻe fakamatala ʻa e faihisitōlia ko H. G. Wells ʻo fekauʻaki mo e hanga ʻe Sīsū ʻo “fakamaeʻeeʻa kāfakafa ʻa e akonaki fekauʻaki mo e meʻa ko ia naʻá ne ui ko e Puleʻanga ʻo Hēvaní” kae kehe naʻe pehē ʻe Wells, ko e akonaki ko ení “ʻoku ʻikai hano mahuʻinga ʻe taha ʻi he ngaahi akonaki ʻa e ngaahi siasi faka-Kalisitiane lahi.”

ʻI he ʻikai hangē ko e ngaahi siasi ko iá, ko e Kau Fakamoʻoni ʻa Sihová ʻoku nau fakamamafaʻi lahi ʻa e Puleʻanga ʻo e ʻOtuá. Ko e fakatātaá: Ko ʻemau makasini tefitó, ʻa eni ʻokú ke lolotonga laú, ʻoku pulusi ia ʻi he ngaahi lea ʻe 220. ʻOku meimei ko e ngaahi tatau ʻe 46 miliona kuo pulusi ʻi he ʻīsiu taki taha, ʻoku hoko ko e makasini tufaki lahi taha ia ʻi he māmaní. Pea ko e hā leva ʻa e pōpoaki tefito ʻi he makasini ko ení? Fakatokangaʻi hono ʻuluʻi kaveinga kakató: Ko e Taua Leʻo ʻOku Fanongonongo Ai ʻa e Puleʻanga ʻo Sihová.a

Ko e hā ʻoku feinga mālohi ai ʻa e Kau Fakamoʻoni ʻa Sihová ke fanongonongo pe tuʻuaki ʻa e Puleʻanga ʻo e ʻOtuá? Ko e taha, ʻoku mau tui ko e Puleʻanga ʻo e ʻOtuá ʻa e pōpoaki tefito ʻo e tohi mahuʻinga taha ʻi he māmaní—ko e Tohi Tapú. ʻIkai ko ia pē, ʻoku mau tuipau ko e Puleʻanga ʻo e ʻOtuá ʻa e fakaleleiʻanga moʻoni pē ʻe taha ki he palopalema ʻoku fehangahangai ʻi he ʻahó ni mo e faʻahinga ʻo e tangatá.

ʻI hono fakahanga ʻa e tokangá ki he Puleʻanga ʻo e ʻOtuá, ʻoku feinga mālohi ai ʻa e Kau Fakamoʻoni ʻa Sihová ke muimui ki he faʻifaʻitakiʻanga ʻa Sīsuú. ʻI heʻene ʻi māmaní, naʻá ne ʻai ʻa e Puleʻanga ʻo e ʻOtuá ko e meʻa tefito ia ʻi heʻene moʻuí mo ʻene ngāue fakafaifekaú. (Luke 4:43) Ko e hā naʻe mātuʻaki mahuʻinga ai ʻa e Puleʻangá kia Sīsuú? Pea ko e hā ʻene ʻuhinga kiate koé? ʻOku mau fakaafeʻi koe ke ke fakakaukau ki he ngaahi tali ʻa e Tohi Tapú, ʻa ia ʻe lāulea ki ai ʻi he ngaahi kupu hono hokó.