ʻOku Fakapaʻanga Fēfē ʻEmau Ngāue Fakafaifekaú?
ʻI he taʻu taki taha, ʻoku mau pulusi mo tufaki ai ʻa e Tohi Tapu mo e ʻū tohi Fakatohitapu ʻe laui teau miliona. ʻOku mau langa mo tokangaʻi ʻa e ngaahi ʻōfisi vaʻa mo e ngaahi fale pulusi takatakai he māmaní. ʻOku fakataha ʻa e ngaahi fakatahaʻanga ʻe laui mano ʻi ha feituʻu faiʻanga lotu feʻunga mo fakaʻofoʻofa ʻoku ui ko e Fale Fakatahaʻanga. ʻOku fēfē hono fakapaʻanga kotoa ení?
Ko ʻemau ngāué ʻoku poupouʻi kakato ia ʻe he ngaahi tokoni loto-fiefoakí. (2 Kolinitō 9:7) ʻI he 1879, ko e ʻīsiu hono ua ʻo e makasini ko ení naʻe pehē ai: “Ko e ‘Zion’s Watch Tower’ [ko hono ui ia ʻo e makasini ko ení ki muʻá] ʻoku mau tui, ʻokú ne maʻu ʻa e poupou ʻa SIHOVÁ, pea ʻi heʻene peheé ʻe ʻikai ʻaupito ke ne kōlenga pe tautapa ki he tangatá ki ha poupou.” Kuo ʻikai ʻaupito liliu ʻa e moʻoniʻi meʻa ko ení.
Ko e ngaahi tokoní ʻoku ʻave fakahangatonu ia ki homau ngaahi ʻōfisi vaʻá pe lī ki ha puha tokoni ʻoku ʻi he Fale Fakatahaʻanga taki taha. Ka ʻoku ʻikai ʻaupito ke mau vahe-hongofulu, tānaki paʻanga, ʻeke totongi ki haʻamau ngāue pe ko e ʻū tohí. ʻOku ʻikai totongi kimautolu ke malanga, faiako ʻi he fakatahaʻangá pe tokoni ki he langa ʻo e ngaahi feituʻu faiʻanga lotú. He ko ē, naʻe pehē ʻe Sīsū: “Kuo mou maʻu taʻetotongi, foaki taʻetotongi.” (Mātiu 10:8) Ko e kau faifekau kotoa ʻi homau ngaahi ʻōfisi vaʻá mo homau ʻuluʻi ʻapitanga ki he māmaní, kau ai ʻa e faʻahinga ʻoku faʻuʻaki ʻa e Kulupu Pule ʻo e Kau Fakamoʻoni ʻa Sihová, ko e kau ngāue pole kinautolu ʻo ʻikai ke nau vahe.
“Hangē ko e ngaahi ngāue kotoa ʻa e Kau Fakamoʻoni ʻa Sihová, ko hono fakapaʻanga ʻo e lotú ʻoku makatuʻunga ia ʻi he loto-fiefoaki, ko e tokotaha taki taha ʻokú ne fakapapauʻi ʻa e mahuʻinga mo e lahi ʻene ‘tokoni’ ki he lotú.”—Fakamaauʻanga ʻIulope ki he Ngaahi Totonu ʻa e Tangatá, 2011
Ko e ngaahi tokoni fakapaʻangá ʻoku toe ngāueʻaki ia ke tokoni ʻi he fakatamakí. Naʻe loto-lelei ʻa e muʻaki kau Kalisitiané ke tokoni ki he kau masivá. (Loma 15:26) ʻOku pehē pē ʻemau tokoni ki he faʻahinga maʻukoviá ʻi hono toe langa honau ngaahi ʻapí mo e feituʻu faiʻanga lotú pea tokonaki mo e meʻakai, vala mo e faitoʻo.