Vakai ʻa e ʻOtuá ki he Taú ʻi he ʻAho Ní

ʻUluakí, ʻiloʻi ʻa e moʻoni ko ení: ʻOku vakai ʻa e ʻOtuá ki he faingataʻaʻia ʻa e māmaní ʻi he ʻahó ni, pea ʻokú ne fakataumuʻa ke fai ha meʻa fekauʻaki mo ia. (Saame 72:13, 14) ʻI heʻene Folofolá, ʻa e Tohi Tapú, ʻoku talaʻofa ai ʻa e ʻOtuá ko e faʻahinga “ko ia ʻoku tofanga ʻi he mamahí, ʻe ʻoatu . .  . ʻa e nonga” kiate kinautolu. ʻA fē? “ʻI he fakahā mai ʻa e ʻEiki ko Sīsuú mei hēvani fakataha mo ʻene kau ʻāngelo mālohí . . . ʻi heʻene faisāuni ki he faʻahinga ko ia ʻoku ʻikai te nau ʻiloʻi ʻa e ʻOtuá pea mo e faʻahinga ko ia ʻoku ʻikai te nau talangofua ki he ongoongo lelei fekauʻaki mo hotau ʻEiki ko Sīsuú.” (2 Tesalonaika 1:7, 8) Ko e fakahā ko eni ʻo kau kia Sīsuú ʻe fakahoko ia ʻi he kahaʻú ʻi he meʻa ʻoku ui ʻe he Tohi Tapú ko e “tau ʻo e ʻaho lahi ʻo e ʻOtuá ko e Māfimafi-Aoniú,” ʻoku toe ʻiloa ko ʻĀmaketone.—Fakahā 16:14, 16.

ʻI he tau ko ia ʻi he kahaʻú, ʻe ʻikai ngāueʻaki ʻe he ʻOtuá ha tangata, ka ko hono ʻAló ʻa Sīsū Kalaisi mo e kau ʻāngelo mālohí ke faitau ʻo fakafepakiʻi ʻa e fulikivanú. Te nau fakangata ʻa e kotoa ʻo e fakamamahí.—ʻAisea 11:4; Fakahā 19:11-16.

ʻI he ʻahó ni, kuo ʻikai liliu e vakai ʻa e ʻOtuá ki he taú. ʻOkú ne kei vakai ki he taú ko e founga fakalao ia ki hono fakangata ʻa e fakamamahí mo e fulikivanú. Ka ʻi he kotoa ʻo e hisitōliá, ko e ʻOtuá pē ʻokú ne maʻu ʻa e totonu ke fili ʻa e taimi ke fakahoko ai ʻa e taú mo e faʻahinga ʻe kau ki aí. Hangē ko ia kuo tau ʻiloʻí, kuo fakapapauʻi ʻe he ʻOtuá ha tau ʻi he kahaʻú ke fakangata ʻa e fulikivanú pea ke sāuni ʻa e fakamamahí pea ʻe faitau ai ʻa hono ʻAló ʻa Sīsū Kalaisi. ʻOku ʻikai ʻuhinga ʻa e ngaahi tau kuo fai ʻi he māmaní ʻi he ʻahó ni ʻoku hōifua ki ai ʻa e ʻOtuá, ʻo tatau ai pē pe ko e hā e faʻahinga makatuʻunga ʻo e tau ko iá.

Ke fakatātaaʻi: Sioloto atu ki ha ongo tautehina ʻoku kamata ke na kē ka ʻoku ʻikai ʻi ʻapi ʻena tamaí. Naʻe kiʻi tuku ʻena keé kae tā ki heʻena tamaí. Naʻe tukuakiʻi ʻe he tama ʻe tahá ko e tama ko eé naʻá ne kamataʻí, kae tala ʻe he tama ko eé ko e tama ʻe tahá naʻá ne fakamamahiʻi iá. Naʻá na fakatou lāunga ki heʻena tamaí mo fiemaʻu ʻene tokoní ke fakaleleiʻi ʻena taʻefelotoí. Kae kehe, hili ʻene fanongo fakatouʻosi kiate kinauá, naʻe tala ange ʻe he tamaí ke tuku ʻena keé pea tatali kiate ia ke toki foki mai ʻo fakaleleiʻi. Naʻá na tatali leva. Taimi nounou mei ai, naʻá na toe kē. ʻI he foki mai e tamaí ki ʻapí, naʻe ʻikai ke fiefia peá ne tauteaʻi fakatouʻosi kinaua ʻi heʻena talangataʻá.

ʻI he ʻahó ni, ko e ngaahi puleʻanga ʻoku nau faitaú ʻoku nau faʻa tautapa ki he ʻOtuá ki ha poupou. Ka ʻoku ʻikai ke kau ʻa e ʻOtuá ki ha tafaʻaki ʻi he tau ʻo e ʻaho ní. ʻI hono kehé, ʻi heʻene Folofolá, ʻa e Tohi Tapú, ʻokú ne fakahaaʻi mahino ai: “ʻOua ʻe fetongi ʻa e koví ʻaki ʻa e kovi ki ha taha,” pea “ʻOua te mou faisāuni maʻamoutolu.” (Loma 12:17, 19) ʻIkai ko ia pē, kuó ne fakahaaʻi ki he tangatá ʻa e totonu ke nau “tatali faa kataki be kiate ia” ke ngāue mai, ʻa ia te ne fai ia ʻi ʻĀmaketone. (Saame 37:7, PM) ʻI he ʻikai ke tatali ʻa e ngaahi puleʻangá ki he ʻOtuá ke ngāue maí, ka nau kau ki he taú, ʻokú ne vakai ki he ngaahi tau ko iá ko ha ngaahi tōʻonga pōlepole fakaaoao ʻa ia ʻoku taʻefakahōifua kiate ia. ʻI ʻĀmaketoné, ʻe fakahaaʻi ʻe he ʻOtuá hono houhaú pea fakaleleiʻi ʻo tā tuʻo taha ʻa e fekīhiaki ʻa e ngaahi puleʻangá ʻaki hono “lolololo ʻa e ngaahi tau ʻo aʻu ki he ngataʻanga ʻo mamani.” (Saame 46:9; ʻAisea 34:2) Ko e moʻoni, ko ʻĀmaketone ko e tau ia te ne fakangata kotoa ʻa e ngaahi taú.

Ko e ngata ʻa e ngaahi taú ko e taha ia e tāpuaki ʻa e Puleʻanga ʻo e ʻOtuá. Naʻe lea ʻa Sīsū ki he puleʻanga ko iá ʻi he lotu ʻiloa ko ení: “Tuku ke hoko mai ho Puleʻangá. Tuku ke fai ho finangaló, ʻo hangē ko ia ʻi hēvaní, ke pehē foki ʻi māmani.” (Mātiu 6:10) ʻE ʻikai ngata pē hono toʻo ʻosi atu ʻe he Puleʻanga ʻo e ʻOtuá ʻa e kotoa ʻo e taú ka ʻe toʻo kotoa atu ʻa e aka ʻo e taú mo e fulikivanú.a (Saame 37:9, 10, 14, 15) Tā neʻineʻi ke vēkeveke ʻa e kau muimui ʻo Sīsuú ke hanga atu ki he ngaahi tāpuaki ʻa e Puleʻanga ʻo e ʻOtuá.​—2 Pita 3:13.

Ko e hā hono fuoloa ʻa e pau ke tau tatali ki he Puleʻanga ʻo e ʻOtuá ke fakangata ʻa e kotoa ʻo e faingataʻá, fakamamahí mo e fulikivanú? Ko hono fakahoko ʻa e ngaahi kikite he Tohi Tapú ʻoku fakahaaʻi ai ʻoku tau moʻui ʻi he “ngaahi ʻaho fakaʻosí” ʻo e fokotuʻutuʻu lolotonga ko ení. (2 Tīmote 3:1-5)b ʻE vavé ni ke fakangata ʻe he Puleʻanga ʻo e ʻOtuá ʻa e ngaahi ʻaho fakaʻosi ko ení ʻi he tau ʻo ʻĀmaketoné.

Hangē ko ia ne hā ki muʻá, ko e faʻahinga ʻe ʻauha ʻi he tau fakaʻosi ko ení ko e niʻihi ia ʻoku nau fakafisi ke “talangofua ki he ongoongo lelei fekauʻaki mo hotau ʻEiki ko Sīsuú.” (2 Tesalonaika 1:8) Kae manatuʻi, ʻoku ʻikai finangalo ʻa e ʻOtuá ke mate ha taha, kau ai ʻa e angahalá. (ʻIsikeli 33:11) Koeʻuhí “ʻoku ʻikai te ne finangalo ke ʻi ai ha taha ʻe fakaʻauha” ʻi he tau fakaʻosi ko ení, ʻi he taimí ni ʻokú ne fakapapauʻi ko e ongoongo lelei fekauʻaki mo hotau ʻEiki ko Sīsū Kalaisí ke “malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē” ki muʻa ke hoko mai e ngataʻangá. (2 Pita 3:8, 9; Mātiu 24:14; 1 Tīmote 2:3, 4) ʻIo, ʻi he ngāue fakamalanga ʻi māmani lahi ʻa e Kau Fakamoʻoni ʻa Sihová, ʻoku maʻu ʻe he kakaí ʻi he ʻahó ni ha faingamālie ke ʻilo ki he ʻOtuá, talangofua ki he ongoongo lelei fekauʻaki mo Sīsuú pea moʻui atu ke sio tonu ʻi he ʻaho ʻe ʻikai toe ʻi ai ha tau.