ʻE Fakangata Fēfē ʻa e Taú mo e Fakamālohí?

ʻE TOʻO ATU ʻE HE ʻOTUÁ ʻA E NGAAHI FOUNGA-PULE FAKAETANGATÁ

Ko e ʻOtuá te ne fakangata ʻa e ngaahi founga-pule fakaetangatá fakafou ʻi he tau ʻoku ui ʻi he Tohi Tapú ko ʻĀmaketoné.a (Fakahā 16:16) ʻI he taimi ko iá, ko e “ngaahi tuʻi ʻo e māmani kotoa kuo nofoʻí” te nau fakatahataha fakataha ki he “tau ʻo e ʻaho lahi ʻo e ʻOtua Māfimafi-Aoniú.” (Fakahā 16:14) Ko ʻĀmaketoné ko e tau ia ʻa e ʻOtuá ke fakangata ʻa e ngaahi tau kotoa pē.

ʻE fetongi ʻe he ʻOtuá ʻa e ngaahi founga-pule fakaetangatá ʻaki hono Puleʻangá pe founga-pulé, ʻa ia ʻe pule mei hēvani pea heʻikai ʻaupito ke fakaʻauha. (Taniela 2:44) Kuo fili ʻe he ʻOtuá ʻa hono ʻAló, ʻa Sīsū Kalaisi ke hoko ko e Tuʻí. (ʻAisea 9:​6, 7; Mātiu 28:18) Ko e founga-pule ko ení ko e Puleʻangab ia naʻe akoʻi ʻe Sīsū ʻa hono kau muimuí ke nau lotu fekauʻaki mo iá. (Mātiu 6:​9, 10) Ko e kotoa ʻo e faʻahinga ʻo e tangatá te nau fāʻūtaha ʻi he malumalu ʻo e founga-pule fakamāmani lahi pē ʻe taha pea ko Sīsū ʻa hono Pulé.

ʻI he ʻikai hangē ko e ngaahi pule fakaetangatá, ko Sīsū heʻikai te ne ngāueʻaki hono mafaí ke fakamuʻomuʻa ʻene lelei pē ʻaʻana. Koeʻuhí ʻokú ne faitotonu mo taʻefilifilimānako, heʻikai ha taha ʻe hohaʻa fekauʻaki mo hano liʻekina koeʻuhi ko hono matakalí, fonuá pe puipuituʻá. (ʻAisea 11:​3, 4) Pea ko e kakaí heʻikai ke nau faitau ki heʻenau totonú. Ko e hā hono ʻuhingá? Koeʻuhí ʻe fakahāhā ʻe Sīsū ʻa e mahuʻingaʻia ʻi he lelei ʻa e tokotaha taki taha. “Te ne fakahaofi ʻa e masiva ʻoku tangi ki ha tokoní, pehē foki ki he tokotaha māʻulaló mo ha taha pē ʻoku ʻikai hano tokoní. . . . Te ne fakahaofi kinautolu mei he fakafeʻātungiá pea mei he fakamālohí.”—Saame 72:​12-14.

Ko e Puleʻanga ʻo e ʻOtuá te ne toʻo ʻosi atu mei he māmaní ʻa e ngaahi meʻatau fakatupu maté. (Maika 4:3) Te ne toe toʻo atu mo e kakai fulikivanu ʻoku nau fakafisi ke taʻofi ʻa e fetāʻakí pe veuki ʻa e melino ʻa e niʻihi kehé. (Saame 37:​9, 10) Ko e tangata, fefine mo e fānau kotoa pē te nau ongoʻi malu ʻi ha feituʻu pē te nau ʻalu ki ai ʻi he māmaní.—ʻIsikeli 34:28.

Ko e kakaí te nau fiefia ʻi he ngaahi tuʻunga lelei ʻo e moʻuí ʻi he malumalu ʻo e founga-pule ʻa e ʻOtuá. Te ne toʻo atu ʻa e ngaahi palopalema ʻokú ne fakatupunga ʻa e kakaí ke nau fetāʻakí, hangē ko e masivá, fiekaiá mo e ʻikai ha nofoʻanga feʻungá. Ko e tokotaha kotoa te nau maʻu ha meʻakai fakatupu moʻui lelei hulu fau, pea te nau maʻu ha feituʻu fakafiemālie ke nofo ai.—Saame 72:16; ʻAisea 65:​21-23.

ʻI he malumalu ʻo e Puleʻanga ʻo e ʻOtuá, ko e ngaahi nunuʻa fakatupu maumau ʻo e taú ʻe toʻo ʻosi atu. ʻOku kau ki heni ʻo ʻikai ngata pē ʻi he ngaahi lavea fakaesinó kae pehē foki ki he mamahi fakaʻatamai mo fakaeongó ʻa ia ʻoku tofanga ai ʻa e kakaí koeʻuhí ko e ngaahi haʻahaʻa ʻo e taú. Naʻa mo e faʻahinga kuo nau maté ʻe toe fokotuʻu hake ke nau moʻui ʻi he māmaní. (ʻAisea 25:8; 26:19; 35:​5, 6) Ko e ngaahi fāmilí te nau toe fakataha pea ko e ngaahi manatu anga-fakamamahi ki he taú ʻe hoko ia ko ha konga ʻo e “ngaahi meʻa muʻá” ʻa ia ʻe mole atu.—Fakahā 21:4.

ʻE TOʻO ATU ʻE HE ʻOTUÁ ʻA E ANGAHALÁ

Ko e Puleʻanga ʻo e ʻOtuá te ne fakafāʻūtahaʻi ʻa e kakaí ʻi he lotu ki he ʻOtua moʻoni pē tahá, ʻa Sihovac, “ko e ʻOtua ʻo e ʻofá mo e melinó.” (2 Kolinitō 13:11) Ko e kakaí te nau ako ki he founga ke nofo fakataha ai ʻi he melinó. (ʻAisea 2:​3, 4; 11:9) Ko e faʻahinga kotoa ʻoku nau ngāueʻaki ʻa e meʻa ʻoku nau akó ʻe fakatauʻatāinaʻi mei he ngaahi nunuʻa ʻo e angahalá.—Loma 8:​20, 21.

ʻE FAKAʻAUHA ʻE HE ʻOTUÁ ʻA SĒTANE MO ʻENE FANGA TĒMENIOÓ

ʻE fakaʻauha ʻe he Puleʻanga ʻo e ʻOtuá ʻa e faʻahinga ʻoku nau fakaʻaiʻai ʻa e taú, ʻa Sētane mo ʻene fanga tēmenioó. (Fakahā 20:​1-3, 10) ʻI he ʻikai ke nau toe fai ha tākiekina koví, “ko e melinó ʻe hulu fau.”—Saame 72:7.

ʻE lava ke ke falala pau ko e talaʻofa ʻa e ʻOtuá ke fakangata ʻa e taú mo e fetāʻaki anga-fakamālohí ʻe hoko moʻoni. ʻOkú ne fakatou maʻu ʻa e malava mo e holi ke toʻo ʻosi atu ʻa e taú.

• ʻOku maʻu ʻe he ʻOtuá ʻa e poto mo e mālohi ʻoku fiemaʻu ke fakangataʻaki ʻa e taú mo e fakamālohí. (Siope 9:4) ʻOku ʻikai ha meʻa ia ʻe taʻemalava ke ne fakahoko.—Siope 42:2.

• ʻOku fehiʻa ʻa e ʻOtuá ʻi he sio ki he faingataʻaʻia ʻa e kakaí. (ʻAisea 63:9) ʻOkú ne toe “fehiʻa ʻi ha taha pē ʻoku ʻofa ki he fakamālohí.”—Saame 11:5.

• ʻOku fai maʻu pē ʻa e ʻOtuá ki heʻene leá; ʻoku ʻikai lava ke ne loi.—ʻAisea 55:​10, 11; Taitusi 1:2.