ʻUhinga ʻOku Hokohoko Atu Ai ʻa e Taú mo e Fakamālohí

ANGAHALA

Naʻe fakatupu ʻe he ʻOtuá ʻetau ʻuluaki ongo mātuʻá, ʻa ʻĀtama mo ʻIvi, ʻi hono ʻīmisí. (Sēnesi 1:27) Naʻe ʻuhinga iá ʻe fakanatula pē ke na tapua atu ʻa e ngaahi ʻulungaanga ʻo e ʻOtuá, kau ai ʻa e melinó mo e ʻofá. (1 Kolinitō 14:33; 1 Sione 4:8) Kae kehe, naʻe talangataʻa ʻa ʻĀtama mo ʻIvi ki he ʻOtuá pea naʻá na faiangahala. Ko hono olá, ko kitautolu kotoa kuo tau maʻu tukufakaholo ʻa e angahalá mo e maté. (Loma 5:12) Ko e angahala tukufakaholó ʻoku tau hehema ai ke maʻu ʻa e ngaahi fakakaukau mo e tōʻonga fakamālohí.—Sēnesi 6:5; Maʻake 7:​21, 22.

FOUNGA-PULE FAKAETANGATA

Naʻe ʻikai fakatupu kitautolu ʻe he ʻOtuá ke tau puleʻi pē kitautolu. ʻOku pehē ʻe he Tohi Tapú: “ʻOku ʻikai ʻi he tangata ʻoku ʻaʻevá ke ne tataki ʻa ʻene laká.” (Selemaia 10:23) ʻI he ʻuhinga ko iá, ko e ngaahi founga-pule fakaetangatá heʻikai lava ke nau toʻo fakaʻaufuli atu ʻa e taú mo e fakamālohí.

SĒTANE MO ʻENE FANGA TĒMENIOÓ

ʻOku fakaeʻa ʻi he Tohi Tapú “ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko e “tokotaha fulikivanú” ʻoku ui ko Sētane ko e Tēvoló, pea ʻokú ne anga-fakapō. (Sione 8:44) Ko Sētane mo e ngaahi meʻamoʻui laumālie fulikivanu kehé ʻoku nau fakaʻaiʻai ʻa e taú mo e fakamālohí.—Fakahā 12:​9, 12.