Ko e Hā ʻOku Leaʻaki ʻe he Tohi Tapú?

Ko e lotú ko ha fokotuʻu ʻe ha tangata?

ʻOKU TUI ʻA E KAKAI ʻE NIʻIHI ko e lotú ko ha fokotuʻu ʻe ha tangata; ʻoku fakakaukau ʻa e niʻihi ʻoku ngāueʻaki ʻe he ʻOtuá ʻa e lotú ke tokoniʻi e kakaí ke nau ʻunuʻunu ofi ai kiate ia. Ko e hā hoʻo fakakaukaú?

MEʻA ʻOKU LEAʻAKI ʻE HE TOHI TAPÚ

ʻOku ʻi ai ha “lotu ʻoku maʻa mo taʻeʻuliʻi ʻi he anga ʻo e vakai ʻa hotau ʻOtuá mo e Tamaí.” (Sēmisi 1:27) Maʻa pe moʻoni ko e lotu ko iá ʻoku haʻu mei he ʻOtuá.

MEʻA TE TAU TOE AKO MEI HE TOHI TAPÚ

• Ke fakahōifua ki he ʻOtuá, ko e lotú kuo pau ke makatuʻunga ia ʻi he moʻoni ʻo e Tohi Tapú.​—Sione 4:23, 24.

• Ko e ngaahi lotu ʻoku makatuʻunga ʻi he fakakaukau fakaetangatá ʻoku taʻeʻaonga ia.​—Maʻake 7:7, 8.

Ko ha fiemaʻu pau ke kau ki ha lotu?

KO E HĀ TE KE LEAʻAKÍ?

• ʻIo

• ʻIkai

• Mahalo pē

MEʻA ʻOKU LEAʻAKI ʻE HE TOHI TAPÚ

“Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa hono fakatahatahaʻi fakataha ʻo kitautolú.” (Hepelū 10:24, 25) ʻOku fiemaʻu ʻe he ʻOtuá ʻene kau lotú ke nau fakatahataha ko ha kulupu fokotuʻutuʻu maau.

MEʻA TE TAU TOE AKO MEI HE TOHI TAPÚ

• Ko e faʻahinga ʻoku nau lotu fakataha ki he ʻOtuá ʻoku totonu ke nau fāʻūtaha ʻi he tui.​—1 Kolinitō 1:10, 11.

• Ko e ngaahi mēmipa ʻo e lotu ʻoku hōifua ki ai ʻa e ʻOtuá ʻoku faʻu ʻaki ia ha fetokouaʻaki ʻi māmani lahi.​—1 Pita 2:17.