ʻOkú Ke Manatuʻi?
Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
Ko e hā ʻa e faʻahinga angahala naʻe lea ki ai ʻa Sīsū ʻi he fakahinohino ʻoku hā ʻi he Mātiu 18:15-17?
Naʻá ne lea ʻo fekauʻaki mo e ngaahi angahala ʻe lava ke fakaleleiʻi pē ʻe he faʻahinga ʻoku kaungatonu ki aí. Ka ko e angahala ko iá ʻe lava ke tuʻusi ai ha taha kapau ʻoku ʻikai ke lava ʻo fakaleleiʻi. Ko e fakatātaá, ko e angahala hangē nai ko e lauʻikovi loi pe kākā.—w16.05, p. 7.
Ko e hā ʻe lava ke ke fai ke maʻu ʻa e ʻaonga lahi ange mei he lau Tohi Tapú?
ʻE lava ke ke fai eni: Lau mo ha fakakaukau ʻataʻatā, kumi ki ha ngaahi lēsoni ʻe lava ke ke ngāueʻakí; ʻeke hifo ʻa e fehuʻi hangē ko ení ‘ʻE lava fēfē ke u ngāueʻaki ia ke tokoniʻi ʻa e niʻihi kehé?’; pea ngāueʻaki ʻa e meʻangāue ʻokú ke ala maʻú ke fekumi ai ki he fakamatala naʻa ke toki laú.—w16.05, p. 24-26.
ʻOku hala ke mamahi ha Kalisitiane neongo ʻokú ne tui ki he toetuʻú?
Ko e tui ki he toetuʻú ʻoku ʻikai ke ne toʻo atu ʻa e mole lahi ʻoku ongoʻi nai ʻe ha Kalisitiane. Naʻe tengihia ʻa ʻĒpalahame ʻi he mate ʻa Selá. (Sēn. 23:2) ʻE faifai atu pē ʻo mōlia atu ʻa e mamahí.—wp16.3, p. 4.
Ko hai ʻoku fakafofongaʻi ʻe he tangata ʻoku ʻi hono kongalotó ha ʻainga vaitohi faka-tangatatohí pea pehē ki he kau tangata ʻe toko ono ʻoku nau toʻo ʻa e naunau laikí, ʻoku lave ki ai ʻi he ʻIsikeli vahe 9?
ʻOku tau mahinoʻi kinautolu ko e kongakau ʻi hēvaní naʻa nau kau ʻi hono fakaʻauha ʻo Selusalemá pea te nau kau ʻi he fakaʻauha ʻi ʻĀmaketoné. ʻI hono fakahoko ʻi onopōní, ko e tangata ʻoku ʻi hono kongalotó ha ʻainga vaitohi faka-tangatatohí ʻokú ne fakafofongaʻi ʻa Sīsū Kalaisi, ko ia ʻa e tokotaha te ne fakaʻilongaʻi ʻa e faʻahinga ʻe fakahaofí.—w16.06, p. 16-17.
Ko e hā ʻa e ngaahi fakamanamana naʻe hao mei ai ʻa e Tohi Tapú?
Naʻe hao mei he (1) popo ʻo e ngaahi meʻa naʻe ngāueʻaki ke tohi aí, ʻo hangē ko e pepailó mo e kiliʻi manú; (2) fakafepaki mei he kau taki fakapolitikalé mo e kau taki fakalotú ʻa ia naʻa nau feinga ke fakaʻauha ia; pea (3) feinga ha niʻihi ke liliu ʻa e pōpoakí.—wp16.4, p. 4-7.
Ko e hā ʻa e ngaahi founga ʻe fakafaingofuaʻi nai ai ʻe ha Kalisitiane ʻene moʻuí?
ʻIloʻi ʻa hoʻo ngaahi fiemaʻu moʻoní, pea toʻo atu ʻa e ngaahi fakamole ʻoku ʻikai fiemaʻú. Fikaʻi lelei ʻa e fakamolé. Tukuange atu ʻa e ngaahi meʻa ʻoku ʻikai ke ke ngāueʻakí, pea totongi ʻosi ʻa e ngaahi moʻuá. Fakasiʻisiʻi hoʻo ngāue paʻangá pea palani ki ha founga ke fakalahi ai hoʻo ngāue fakafaifekaú.—w16.07, p. 10.
Ko e hā ʻa e meʻa ʻoku fakahaaʻi mai ʻe he Tohi Tapú ʻoku mahuʻinga ange ia ʻi he koulá pe silivá?
ʻI he Siope 28:12, 15 ʻoku hā ai ko e poto fakaʻotuá ʻoku lelei ange ia ʻi he koulá pe silivá. ʻI hoʻo kumi ki aí, feinga mālohi ke hanganaki anga-fakatōkilalo pea maʻu ha tui mālohi.—w16.08, p. 18-19.
ʻOku taau ke tuku kava ha tokoua ʻi he ʻahó ni?
ʻI he anga-fakafonua ʻe niʻihi, ko ha kava ʻoku kosi fakalelei ʻoku ala tali ia mo ʻikai ke fakatūkia ki he pōpoaki ʻo e Puleʻangá. Neongo ia, ʻoku fili nai ʻa e fanga tokoua ʻe niʻihi ke ʻoua ʻe tuku kava. (1 Kol. 8:9) ʻI he anga-fakafonua mo e feituʻu ʻe niʻihi, ʻoku ʻikai ke taau ʻa e tuku kavá ki he kau faifekau Kalisitiané.—w16.09 p. 21.
Ko e hā ʻoku lava ke tau falala ai ki he talanoa Fakatohitapu ʻo e fepaki ʻa Tēvita mo Kolaiaté?
Naʻe pehē ko e māʻolunga ʻo Kolaiaté naʻá ne lōloa ʻaki pē ʻa e ʻinisi ʻe ono (15 cm) ʻi he tangata māʻolunga taha kuo lēkooti ʻi onopōní. Ko e tokotaha moʻoni ʻa Tēvita, ʻo hangē ko ia naʻe fakamoʻoniʻi ʻe he tā tongitongi ʻo e kuonga muʻá, ʻa ia ʻoku lave ai ki he fale ʻo Tēvitá mo e meʻa naʻe leaʻaki ʻe Sīsuú. Ko hono ngaahi fakaikiiki fakasiokālafí ʻoku fehoanaki ia mo e ngaahi moʻoniʻi meʻa kuo ʻiloʻí.—wp16.5, p. 13.
Ko e hā ʻa e kehekehe ʻo e ʻiló, mahinó mo e potó?
Ko ha tokotaha ʻokú ne maʻu ʻa e ʻiló ʻokú ne maʻu ʻa e ngaahi fakamatalá pe ngaahi moʻoniʻi meʻá. Ko ha tokotaha ʻokú ne maʻu ʻa e mahinó ʻoku lava ke ne sio ki he anga ʻo e fekauʻaki ʻa e ngaahi moʻoniʻi meʻá. Ka ko e tokotaha ʻokú ne maʻu ʻa e potó ʻoku malava ke ne fakatahaʻi ʻa e ʻiló mo e mahinó pea ngāueʻaki lelei ia.—w16.10, p. 18.