ʻI he Taʻefaitōnunga ha Hoa Mali

“ʻI he taimi naʻe tala mai ai ʻe hoku husepānití te ne liʻaki au koeʻuhi ko ha taʻahine kei siʻi ange naʻá ku loto ke u mate. ʻOku taʻetotonu eni, tautefito ki he taimi naʻá ku manatuʻi ai ʻa e ngaahi feilaulau naʻá ku fai maʻaná.”—Maria, Sipeini.

“ʻI he taimi naʻe liʻaki fakafokifā ai au ʻe hoku uaifí, naʻe hangē ia kuo motu hato kongá. Ko ʻema taumuʻá, ʻamanakí mo ʻema ngaahi palaní kuo ʻauha. Naʻe ʻi ai ha ngaahi ʻaho naʻá ku fakakaukau ai kuó u ʻatā mei he loto-mafasiá, ka naʻá ku toe mafasia ange.”—Bill, Sipeini.

ʻOKU fakamamahi ʻaupito ʻa e taimi ʻoku taʻefaitōnunga ai ha taha ʻi he ongo meʻa malí. Ko e moʻoni, ko ha ngaahi hoa mali ʻe niʻihi ʻoku nau pehē ʻoku lava ke nau fakamolemoleʻi ha hoa mali ʻoku fakatomala pea fakangaloʻi.a Kae kehe, tatau ai pē pe ʻoku lelei pea hoko atu ʻa e nofo malí pe ʻikai, ko e faʻahinga ʻoku nau lāuʻilo ki he taʻefaitōnunga ʻa honau hoá kuo nau fehangahangai maʻu pē mo ha faingataʻaʻia fakamamahi lahi fau. ʻE lava fēfē ke fehangahangai ʻa e faʻahinga peheé mo ʻenau ngaahi ongoʻi mamahí?

NGAAHI VEESI TOHI TAPU ʻE LAVA KE TOKONI

Neongo ʻa e lahi fau ʻo e mamahí, ʻoku maʻu ʻaonga ʻa e tokolahi mei he fakafiemālie ʻi he Folofolá. Kuo nau lāuʻilo ʻoku ʻafioʻi ʻe he ʻOtuá ʻa honau loʻimatá pea ongoʻi ʻenau mamahí.—Malakai 2:13-16.

“ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.”—Saame 94:19.

“ʻI heʻeku lau ʻa e veesi ko iá, ʻoku ou sioloto atu kia Sihova ʻokú ne fakanonga anga-ʻofa ʻeku mamahí, ʻo hangē ko e kaungāongoʻi ʻa ha tamai,” ko e manatu ia ʻa Bill.

“Ki he tokotaha ʻoku mateakí ʻokú ke faimateaki ki ai.”—Saame 18:25.

“Kuo ʻikai ke kei mateaki ʻa hoku husepānití,” ko e fakamatala ia ʻa Carmen, ʻa ia naʻe taʻemateaki ʻa hono husepānití ʻi ha ngaahi māhina. Ka ʻoku lava ke u falala ki he mateaki ʻa Sihová. Heʻikai te ne fakalotomamahiʻi au.”

“ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá, fakafou ʻi he lotu mo e hū tōtōaki pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó.”—Filipai 4:6, 7.

“ʻOku ou toutou lau ʻa e konga tohi ko ení,” ko e lau ia ʻa Sasha. “Pea naʻá ku toutou lotu ki he ʻOtuá ʻo toe lahi ange ke ne ʻomai ha nonga.”

Ko e faʻahinga ʻoku hā ʻi ʻolungá naʻa nau ongoʻi foʻi ʻi ha taimi. Ka naʻa nau falala kia Sihova ko e ʻOtuá pea lau mo ako ʻa e Tohi Tapú ʻa ia naʻe tokoni ia ke fakalototoʻaʻi kinautolu. Naʻe pehē heni ʻe Bill: “Ko ʻeku tuí naʻá ne ʻai ke u maʻu ai ha moʻui ʻoku mohu ʻuhinga ʻi he taimi naʻe ʻikai ke lelei ai ʻa e ngaahi meʻá. Neongo ʻeku ‘ʻi he teleʻa ʻo e fakapoʻuli matolú,’ ka naʻe kau maʻu pē ʻa e ʻOtuá mo au.”—Saame 23:4.

a Ki ha fakamatala lahi ange ʻo fekauʻaki mo e fakamolemoleʻi pe ʻikai fakamolemoleʻi ʻa e taʻefaitōnungá, sio ki he Awake! ʻo ʻEpeleli 22, 1999, “ʻI he Taʻefaitōnunga ha Hoa Mali.”

Founga Kuo Fai ʻe he Niʻihi ke Fekuki Ai mo e Tuʻungá Ni

Fakakaukauloto ki he ngaahi konga Tohi Tapú ki ha fakafiemālie.

“Naʻá ku lau ʻa e tohi ʻa Siope pea hoko ki he Ngaahi Sāmé,” ko e fakamatala ia ʻa Bill, “naʻá ku fakaʻilongaʻi ʻa e veesi kotoa pē naʻe hā ngali fehoanaki mo hoku tuʻungá. Naʻá ku lāuʻilo ko e kau hiki Tohi Tapú naʻá nau fehangahangai mo e faʻahinga mamahi mo e loto-mafasia ko ia naʻá ku maʻú.”

Maʻu ha fakafiemālie mei he ngaahi fasí.

“ʻI he taimi naʻe ʻikai lava ai ke u mohe ʻi he poʻulí, naʻá ku fanongo ki he fasí,” ko e manatu ia ʻa Carmen. “Ko ha matavai eni ʻo e fakafiemālie kiate au.” ʻOku pehē ʻe Daniel: “Naʻá ku ako ke tā kītā pea naʻe tokoniʻi au ʻe he fasí ke u ongoʻi nonga ʻi loto.”

Talanoa ʻo fekauʻaki mo hoʻo ngaahi ongoʻí.

“Naʻe ʻikai te u anga ʻi he talanoa ʻo fekauʻaki mo ʻeku ngaahi ongoʻí,” ko e lau ia ʻa Daniel. “Ka ʻoku ʻi ai hoku ngaahi kaungāmeʻa lelei, pea ʻoku ou talanoa kiate kinautolu ʻi he ʻaho kotoa pē. Naʻá ku vahevahe atu ʻeku ngaahi ongoʻí, fakatouʻosi ʻi he tohi mo talanoa kiate kitautolu. Naʻe tokoni moʻoni eni.” ʻOku pehē ʻe Sasha: “Naʻe mahuʻinga ʻaupito ʻa e tokoni naʻe fai ʻe hoku fāmilí. Naʻe ʻi ai maʻu pē ʻeku faʻeé ke tokoni kiate au. Kapau ʻoku ou loto ke talanoa, ʻokú ne ʻi ai ke fanongo. Naʻe toe ʻai au ʻe heʻeku tamaí ke u ongoʻi ʻoku ʻofaʻi au mo malu, pea naʻá ne tokoniʻi au ke u fakalakalaka ange ʻo fakatatau ki hoku tuʻungá.”

Kīvoi ʻi he lotú.

“Naʻá ku lotu taʻetuku,” ko e lau ia ʻa Carmen. “Naʻá ku ongoʻi naʻe ofi maʻu pē ʻa e ʻOtuá kiate au, fanongo mai kiate au, peá ne tokoniʻi au. Lolotonga ʻa e taimi fakamamahi ko ení, naʻá ku ʻunuʻunu ofi ange ai ki he ʻOtuá.”