Taimi ʻOku ʻIkai Te Ke Toe Fie Moʻui Aí
KUÓ KE ongoʻi ʻikai lelei ʻi ha taimi pea ʻikai te ke loto ke ke toe moʻui? Te ke mahinoʻi nai ʻa e ongoʻi ʻa Adriana. Naʻá ne loto-moʻua lahi peá ne ongoʻi loto-mamahi mo tuēnoa ʻene ʻamanakí. Naʻe puke ʻa Adriana ʻi he ʻāvanga femaleleakí.
Fakakaukau ki he tangata ʻi Siapani ko Kaoru, ʻa ia naʻá ne tokangaʻi ʻene ongo mātuʻa mahamahaki mo taʻumotuʻa. “ʻI he taimi ko iá, naʻe lōmekina au ʻe he ngaahi tenge mālohi ʻi he ngāué,” ko ʻene fakamatalá ia. “Naʻe ʻi ai ha taimi naʻe ʻikai ke u toe fiekaia, pea ʻikai maʻu ha mohe lelei. Naʻe aʻu ʻou fakakaukau ko ha meʻa fakafiemālie ia kapau te u mate.”
Ko ha tangata Naisīlia ko Ojebode ʻokú ne pehē, “Naʻá ku faʻa loto-mamahi maʻu pē pea aʻu ʻou tangi, ko ia naʻá ku sio ki ha founga ke fakangata ai ʻeku moʻuí.” Ko e meʻa fakafiefiá, ko Ojebode, Kaoru, mo Adriana naʻe ʻikai te nau toʻo ʻenau moʻuí. Ka ʻi he taʻu taki taha kuo fai pehē ai ʻa e laui afe.
FEITUʻU KE MAʻU MEI AI ʻA E TOKONÍ
Ko e tokolahi taha ʻoku taonakitá ko e kakai tangata, ko e ʻuhingá naʻa nau mā ke kole tokoni. Naʻe pehē ʻe Sīsū ko e kakai puké ʻoku nau fiemaʻu ha toketā. (Luke 5:31) Ko ia kapau ʻokú ke maʻu ʻa e ongoʻi ko ení, kātaki ʻoua te ke mā ke kumi tokoni. Ko e tokolahi ʻoku nau loto-mafasiá kuo nau ʻiloʻi ʻoku ola lelei ʻa e tokoni fakafaitoʻó. Naʻe maʻu ʻe Ojebode, Kaoru, mo Adriana ha ngaahi tokoni fakafaitoʻo. ʻI he taimí ni ʻoku nau fekuki lavameʻa ange ai mo honau tuʻungá.
ʻE lava nai ke tokoni ʻa e kau toketaá pe ko e talanoa ki ha tokotaha faifaleʻi ke na fakatou fakaleleiʻi ʻa e loto-mafasiá. Ko e faʻahinga ʻoku fehangahangai mo e meʻa ko ení ʻoku nau toe fiemaʻu ʻa e poupou kaungāongoʻi mei he fāmilí mo e ngaahi kaungāmeʻá. Ko e kaumeʻa lelei taha ʻe lava ke maʻu ʻe ha taha, ko Sihova ko e ʻOtuá, ʻa ia ʻokú ne tokonaki mai ʻa e tokoni fakaofo fakafou ʻi heʻene Folofolá, ʻa e Tohi Tapú.
ʻOKU ʻI AI HA FAKALELEIʻANGA TUʻULOA?
Ko e faʻahinga ʻoku loto-mafasiá ʻoku nau fiemaʻu ha taimi ke faitoʻo pea fai ha feʻunuʻaki ʻi heʻenau founga moʻuí. Ka ʻo kapau ʻokú ke faingataʻaʻia ʻi he loto-mafasiá, ʻe lava ke ke fakatuʻotuʻa atu ki ha kahaʻu lelei, ʻo hangē ko ia naʻe fai ʻe Ojebode. ʻOkú ne pehē: “ʻOku ou fakatuʻotuʻa atu ki hono fakahoko ʻa e ʻAisea 33:24, ʻa ia ʻoku tomuʻa tala ai ʻe ʻi ai ha taimi ʻe ʻikai ke pehē ʻe ha taha ʻi he māmaní ‘ʻOku ou puke.’” ʻI he hangē ko Ojebode, maʻu ʻa e fakanongá mei he talaʻofa ʻa e ʻOtuá ki ha “māmani foʻou,” ʻa ia ʻe ʻikai toe ʻi ai ha “mamahi.” (Fakahā 21:1, 4) Ko e talaʻofa ko iá ʻoku kau ki ai ʻa hono fakangata ʻa e mamahi fakaeʻatamai mo e fakaeongo kotoa pē. Ko hoʻo ngaahi ongoʻi mamahí ʻe mole atu ia ʻo taʻengata. Ko hoʻo ngaahi ongoʻi mamahí heʻikai ʻaupito te ke toe “manatua ʻa e ngaahi meʻa muʻá, pea ʻe ʻikai ke ʻalu hake ia ʻi [ho] lotó.”—ʻAisea 65:17.