ʻE Lava Fēfē Ke Ke Maʻu ha Moʻui ʻOku Lelei Ange?

KO E moʻui ʻo e ʻaho ní ʻoku kehe ia mei he meʻa naʻe taumuʻa ki ai ʻa e ʻOtuá. Naʻe totonu ke fakafonu ʻa e māmaní ʻaki ʻa e kakai ʻoku nau fakaʻapaʻapaʻi ʻa e tuʻunga-hau ʻo e Tokotaha-Fakatupú, ʻo maʻu ʻaonga mei heʻene tatakí, pea tapua atu hono ngaahi ʻulungaanga fakaʻofoʻofá. Naʻa nau mei ngāue fiefia fakataha ʻi hono ʻohake honau ngaahi fāmilí, ʻiloʻi ha ngaahi meʻa foʻou, pea ngaohi ʻa e māmaní ko ha palataisi.

TALAʻOFA ʻA E ʻOTUÁ KE LILIU ʻA E MOʻUI ʻI HE MĀMANÍ ʻO FAKATATAU KI HEʻENE TAUMUʻÁ

• “ʻOkú ne fakangata ʻa e ngaahi taú ʻi he māmaní kotoa.”​—Saame 46:9.

• “Naʻe hoko mai ʻa e taimi kotofa . . . ke fakaʻauha ʻa e faʻahinga ʻoku nau fakaʻauha ʻa e māmaní.”​—Fakahā 11:18.

• “ʻE ʻikai ha taha ʻoku nofo ai te ne pehē: ‘ʻOku ou puke.’”​—ʻAisea 33:24.

• “Ko e ngāue ʻa honau nimá ʻe fiefia kakato ai ʻa e faʻahinga kuó u filí.”​—ʻAisea 65:22.

ʻE anga-fēfē hono fakahoko ʻa e ngaahi kikite ko ení? Kuo fili ʻe he ʻOtuá ʻa hono ʻAló ʻa Sīsū, ko ha Tuʻi ki he puleʻanga haohaoa ʻa ia ʻe pule mei hēvani ki he kotoa ʻo e māmaní. ʻOku ui ia ʻe he Tohi Tapú ko e Puleʻanga ʻo e ʻOtuá. (Taniela 2:44) ʻOku pehē ʻe he Tohi Tapú ʻo fekauʻaki mo Sīsū: “Ko e ʻOtuá te ne ʻoange kiate ia ʻa e taloni . . . , pea te ne pule ko e Tuʻi.”​—Luke 1:32, 33.

ʻI he ʻi māmani ʻa Sīsuú, naʻá ne fakahoko ha ngaahi ngāue fakaofo lahi ke fakahaaʻi ʻi heʻene hoko ko e Tokotaha Pulé te ne ʻai ke lelei ange ʻa e moʻui ʻa e faʻahinga ʻo e tangatá ʻi he moʻui ʻoku tau maʻu ʻi he ʻaho ní.

NAʻE FAKAHĀHĀ ʻE SĪSŪ ʻA E FOUNGA ʻE MAʻU ʻAONGA MEI AI ʻA E FAʻAHINGA TALANGOFUÁ

• Naʻá ne fakamoʻui ʻa e ngaahi mahaki kotoa pē, ʻo fakahāhaaʻi ai te ne toʻo ʻosi atu ʻa e faingataʻaʻia kotoa pē mei he faʻahinga ʻo e tangatá.​—Mātiu 9:35.

• Naʻá ne fakanonga ʻa e tahí, ʻo fakahaaʻi ai te ne maluʻi ʻa e kakaí ʻaki hono puleʻi ʻa e ngaahi mālohi ʻo natulá.​—Maʻake 4:36-39.

• Naʻá ne fafanga ha laui afe, ʻo fakahaaʻi ai te ne tokonaki ʻa e ngaahi fiemaʻu ʻo e moʻuí.​—Maʻake 6:41-44.

• Naʻá ne liliu ʻa e vaí ko e uaine ʻi ha mali, ʻo fakamoʻoniʻi ai te ne tokoniʻi ʻa e kakaí ke nau fiefia ʻi he moʻuí.​—Sione 2:7-11.

ʻE lava fēfē ke ke maʻu ʻa e moʻui naʻe teuteu ʻe he ʻOtuá ki he faʻahinga ʻoku nau ʻofa ʻiate iá? ʻOku ʻi ai ʻa e “hala” ʻoku fiemaʻu ke ke fou ai. ʻOku fakamatalaʻi ia ʻe he Tohi Tapú ko e “hala ʻoku taki atu ki he moʻuí, pea ko e tokosiʻi pē ʻoku nau ʻiloʻi iá.”​—Mātiu 7:14.

ʻILOʻI ʻA E HALA KI HA MOʻUI ʻOKU LELEI ANGE

Ko e hā ʻa e hala ki he moʻuí? ʻOku pehē ʻe he ʻOtuá: “Ko au Sihova, ko ho ʻOtuá, ʻa e Tokotaha ʻokú ne akoʻi koe ke ke maʻu ʻaonga aí, ʻa e Tokotaha ʻokú ne tataki koe ʻi he hala ʻoku totonu ke ke fou aí.” (ʻAisea 48:17) Ko e ʻalu ʻi he hala ko ení ʻa e founga moʻui lelei tahá.

Naʻe pehē ʻe Sīsū: “Ko au ʻa e halá pea mo e moʻoní pea mo e moʻuí.” (Sione 14:6) ʻI heʻetau tui ki he moʻoni naʻe akoʻi ʻe Sīsuú pea faʻifaʻitaki ki heʻene faʻifaʻitakiʻangá te tau lava ai ʻo ʻunuʻunu ofi ki he ʻOtuá pea maʻu ʻaonga mei ai.

ʻE lava fēfē ke ke ʻiloʻi ʻa e hala ki he moʻuí? ʻOku lahi ʻa e ngaahi lotú, ka naʻe fakatokanga ʻa Sīsū: “ʻOku ʻikai ko ia kotoa pē ʻoku pehē mai, ‘ʻEiki, ʻEiki,’ te ne hū ki he Puleʻanga ʻo hēvaní, ka ko ia pē ʻokú ne fai ʻa e finangalo ʻo ʻeku Tamai ʻoku ʻi hēvaní.” (Mātiu 7:21) Naʻá ne toe pehē: “ʻI honau ngaahi fuá te mou ʻiloʻi ai kinautolu.” (Mātiu 7:16) ʻOku lava ke tokoniʻi koe ʻe he Tohi Tapú ke ke ʻiloʻi ʻa e lotu moʻoní pea fakafaikehekeheʻi ia mei he lotu loí.​—Sione 17:17.

ʻE lava fēfē ke ke ʻalu ʻi he hala ki he moʻuí? ʻOku kau ki ai ʻa e hoko ʻo ʻiloʻi ʻa e Matavai ʻo e moʻuí: Ko hai ia? Ko hai hono hingoá? Ko e tokotaha fēfē ia? Ko e hā ʻokú ne fai maʻatautolú? Ko e hā ʻokú ne fiemaʻu mai ke tau faí?a

ʻOku loto ʻa e ʻOtuá ki he faʻahinga ʻo e tangatá ke nau fai ha meʻa lahi ange ia ʻi he ngāué, kaí, vaʻingá, mo hono tauhi ʻo e fāmilí. ʻE lava ke tau ʻiloʻi hotau Tokotaha-Fakatupú pea hoko ko hono kaumeʻa. ʻOku lava ke tau fakahaaʻi ʻoku tau ʻofa ʻiate ʻaki ʻa e fai ʻa hono finangaló. Naʻe pehē ʻe Sīsū: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha.”​—Sione 17:3.

LAKA ʻI HE ʻULUAKI SITEPU ʻO ʻETAU FONONGÁ

Ko e ako ke fakahōifuaʻi ʻa e ʻOtua moʻoni pē tahá ʻe fiemaʻu nai ki ai hono fai ʻo ha ngaahi liliu. ʻOku lava ke hoko ia ko ha pole. Ka ko hono moʻoní, ko ha fononga fakafiefia ia, ʻi ha toe meʻa pē, ʻo kamataʻaki ʻa e laka ʻi he ʻuluaki sitepú. Ke tokoniʻi koe ke ke maʻu ʻa e tali ki he ngaahi fehuʻi mahuʻinga ʻo fekauʻaki mo e ʻOtuá, ʻoku tuʻuaki atu ʻe he Kau Fakamoʻoni ʻa Sihová ha ako Tohi Tapu taʻetotongi ʻi he taimi mo e feituʻu ʻe feʻungamālie kiate koé. ʻE lava ke ke fetuʻutaki mai kiate kimautolu ʻi hono ngāueʻaki ʻemau uepisaiti ko e www.jw.org.