Ko ha Mēmipa Foʻou ʻo e Kulupu Pulé

ʻI HE pongipongi Pulelulu, Sanuali 24, 2018, naʻe fiefia ai ʻa e fāmili Pēteli ʻi ʻAmelika mo Kānatá ke fanongo ki ha fanongonongo makehe: Ko Tokoua Kenneth Cook, Jr., kuó ne kau ʻi he Kulupu Pule ʻo e Kau Fakamoʻoni ʻa Sihová.

Ko Tokoua Cook naʻe fanauʻi pea ʻohake ia ʻi Pennsylvania, ʻAmelika. Naʻá ne ako ʻa e moʻoní mei ha kaungāako ki muʻa pē ʻi heʻene maʻu tohi fakamoʻoni ako mei he kolisí pea naʻá ne papitaiso ʻi Sune 7, 1980. Naʻá ne kamata ngāue taimi-kakato ko ha tāimuʻa tuʻumaʻu ʻi Sepitema 1, 1982. Hili ha tāimuʻa ʻi he taʻu ʻe ua, naʻe fakaafeʻi ia ki Pēteli, ʻo kamata ʻene ngāue Pētelí ʻi Wallkill, Niu ʻIoke, ʻi ʻOkatopa 12, 1984.

ʻI he taʻu ʻe 25 hono hokó, naʻe ngāue ʻa Tokoua Cook ʻi he ngaahi vāhenga-ngāue kehekehe ʻi he Fale Pulusí mo e ʻŌfisi Pētelí. Naʻá ne mali mo hono uaifí, ʻa Jamie, ʻi he 1996, peá ne kau fakataha mo ia ʻi he ngāue Pētelí ʻi Wallkill. ʻI Tīsema 2009, naʻe vaheʻi ʻa Tokoua mo Tuofefine Cook ki he Senitā Fakaeako Taua Leʻo ʻi Patterson, Niu ʻIoke, ʻa ia naʻe vaheʻi ai ʻa Tokoua Cook ke ngāue ʻi he Potungāue Fetuʻutaki Faitohí. ʻI ʻEpeleli 2016, hili ha foki taimi nounou ki Wallkill, naʻe vaheʻi ʻa Tokoua mo Tuofefine Cook ki Brooklyn, Niu ʻIoke. ʻI he hili ha māhina ʻe nima mei ai, naʻá na hiki ki he ʻuluʻi ʻapitanga ʻi māmaní ʻi Warwick, Niu ʻIoke. ʻI Sanuali 2017, naʻe fakanofo ai ʻa Tokoua Cook ke ngāue ko ha tokotaha tokoni ki he Kōmiti Hiki-Tohi ʻa e Kulupu Pulé.