Ko ha Mēmipa Foʻou ʻo e Kulupu Pulé

ʻI he pongipongi Pulelulu, Sepitema 5, 2012, naʻe fai ai ha fanongonongo ki he fāmili Pēteli ʻi he ʻIunaite Seteté mo Kānata. Kamata ʻi Sepitema 1, 2012, naʻe kamata ngāue ai ʻa Mark Sanderson ko ha mēmipa ʻo e Kulupu Pulé.

Naʻe ʻohake ʻa Tokoua Sanderson ʻi San Diego, Kalefōnia, ʻAmelika, ʻe ha ongo mātuʻa Kalisitiane pea naʻá ne papitaiso ʻi Fepueli 9, 1975. Naʻá ne kamata ke ngāue ko ha tāimuʻa ʻi Saskatchewan, Kānata, ʻi Sepitema 1, 1983. ʻI Tīsema 1990, naʻá ne maʻu tohi fakamoʻoni ako ai mei he kalasi hono fitu ʻo e Akoʻanga Ako Fakafaifekaú (ʻoku ui he taimí ni ko e Ako Fakatohitapu Maʻá e Fanga Tokoua Taʻemalí) ʻi he ʻIunaite Seteté. Naʻe fakanofo ʻa Tokoua Sanderson ke ngāue ko ha tāimuʻa makehe ʻi he motu ʻo Niufaunileni, Kānatá, ʻi ʻEpeleli 1991. Hili ʻa e ngāue ko ha ʻovasia sēketi tokoni, naʻe fakaafeʻi ia ke ne hoko ko ha mēmipa ʻo e fāmili Pēteli ʻi Kānatá ʻi Fepueli 1997. ʻI Nōvema 2000, naʻá ne hiki ai ki he vaʻa ʻi he ʻIunaite Seteté, ʻa ia naʻá ne ngāue ai ʻi he Potungāue Maʻuʻanga Fakamatala Fakafalemahakí pea ki mui ai ʻi he Potungāue Ngāué.

ʻI Sepitema 2008, naʻe kau ai ʻa Tokoua Sanderson ʻi he Ako Maʻá e Kau Mēmipa ʻo e Kōmiti Vaʻá pea naʻe fakanofo leva ia ko ha mēmipa ʻo e Kōmiti Vaʻa ʻo Filipainí. ʻI Sepitema 2010, naʻe fakaafeʻi ai ia ke ne foki ki he ʻIunaite Seteté, ʻa ia naʻá ne ngāue ai ko ha tokoni ʻi he Kōmiti Ngāue ʻo e Kulupu Pulé.