ʻOkú Ke Manatuʻi?

ʻE lava ke ke tali ʻa e ngaahi fehuʻi ko ení makatuʻunga ʻi he Taua Leʻo 2019?

Ko e hā ʻa e ʻuhinga ʻo e talaʻofa ʻa e ʻOtuá: “ʻOku ʻikai ha meʻatau kuo faʻu ke faiʻaki ha kovi kiate koe ʻe teitei lavameʻa”? (ʻAi. 54:17)

ʻE lava ke tau falala ʻe maluʻi kitautolu ʻe he ʻOtuá mei he ngaahi mālohi fakaefakaʻauha hangē ko e “ʻita tōtōlili ʻa e kau pule kakahá.” (ʻAi. 25:4, 5) Heʻikai ʻaupito malava ke lavameʻa hotau ngaahi filí ʻi hono fai mai ha maumau tuʻuloa kiate kitautolu.—w19.01, p. 6-7.

Naʻe anga-fēfē ʻa e tapua atu mei he fakafeangai ʻa e ʻOtuá ki he kau Kēnaní mo e kau ʻIsileli talangataʻá ʻene fakamaau totonú?

Naʻe ʻomi ʻe he ʻOtuá ʻa e fakamaau ki he faʻahinga ko ia naʻa nau fai ʻa e ngaahi meʻa fakalielia fakaefehokotaki fakasino pe ngaohikoviʻi ʻa e kakai fefiné mo e fānaú. Naʻá ne tāpuakiʻi ʻa e kakai naʻa nau talangofua kiate iá pea fakafeangai totonu ki he niʻihi kehé.—w19.02, p. 22-23.

Ko e hā ʻoku totonu ke tau faí ʻi he taimi ʻoku lotu ai ha tokotaha taʻetui?

ʻE lava ke tau hanganaki fakalongolongo mo anga-fakaʻapaʻapa kae ʻikai lea “ʻēmeni” pe piki nima mo e niʻihi kehé. ʻE lava ke tau fai haʻatau lotu fakalongolongo pē.—w19.03, p. 31.

ʻOku mafatukituki fēfē ʻa e ngaohikovia ʻo ha kiʻi tama?

Ko hono ngaohikovia ʻo ha kiʻi tama ko ha angahala ia ʻoku fai ki he tokotaha maʻukoviá, ki he fakatahaʻangá, kau maʻu mafai fakamāmaní mo e ʻOtuá. ʻOku talangofua ʻa e kau mātuʻá ki he lao fakamāmani ki hono līpooti ha tokotaha ʻoku tukuakiʻi ki ha ngaohikovia.—w19.05, p. 9-10.

ʻE lava fēfē ke ke liliu pe fakaleleiʻi ho tūkunga fakaefakakaukau ʻa ia ʻokú ne tākiekina koe?

Ko e ngaahi sitepu tefitó eni: Talanoa kia Sihova ʻi he lotu. Fakalaulauloto fakataha mo e taumuʻa ke sivisiviʻi koe. Fili fakapotopoto ho ngaahi kaungāmeʻá.—w19.06, p. 11.

Ko e hā ʻe lava ke tau fai he taimi ní ke mateuteu ai ki he fakatangá?

ʻOku fiemaʻu ke tau fakaivimālohiʻi hotau vahaʻangatae mo Sihová. Falala ʻokú ne ʻofa ʻiate kitautolu pea heʻikai ʻaupito te ne liʻaki kitautolu. Lau fakaʻaho ʻa e Tohi Tapú pea lotu maʻu pē. Hoko ʻo tuipau ko e ngaahi tāpuaki ʻo e Puleʻangá ʻe hoko moʻoni. Ako maʻuloto hoʻo ngaahi veesi Tohi Tapu manakó mo e ngaahi hiva fakahīkihikí.—w19.07, p. 2-4.

Ko e hā ʻe lava ke tau fai ke fakahaofi ai hotau kāinga?

ʻOku mahuʻinga ke tau fakahāhā ʻa e kaungāongoʻi, tuku ke faifakamoʻoni hotau ʻulungaanga leleí pea hoko ʻo anga-kātaki mo fakapotopoto.—w19.08, p. 15-17.

ʻOku anga-fēfē hono fakaivifoʻou kitautolu hangē ko ia naʻe talaʻofa mai ʻe Sīsū ʻi he Mātiu 11:28?

ʻOku tau maʻu ʻa e kau ʻovasia Kalisitiane anga-ʻofa, kaungāmeʻa lelei tahá mo e ngāue lelei tahá.—w19.09, p. 23.

ʻOku lava fēfē ke ʻomai kiate kitautolu ʻe he ʻOtuá ʻa e holi mo e mālohi ke ngāué? (Fil. 2:13)

ʻI heʻetau lau ʻa e Folofola ʻa e ʻOtuá pea fakalaulauloto ki aí, ʻe lava ke fakaivia kitautolu ʻe he ʻOtuá, ʻo ne ʻomai ai kiate kitautolu ʻa e holi ke fai hono finangaló mo e mālohi ke ngāue. ʻOku lava ʻe hono laumālié ʻo fakaleleiʻi ʻetau ngaahi malavá.—w19.10, p. 21.

Ko e hā ʻa e ngaahi sitepu fakapotopoto ʻoku totonu ke tau fai ki muʻa ke fai ha fili mafatukituki?

Ko e ngaahi sitepu eni ʻe nima: Fai ʻa e fekumi fakaʻāuliliki. Lotu ki ha poto. Sivisiviʻi hoʻo fakaueʻilotó. Fokotuʻu ha ngaahi taumuʻa pau. Fakakaukau pau.—w19.11, p. 27-29.

Naʻe kamata ʻa e fakakaukau fekauʻaki mo e laumālie taʻefaʻamaté mei he meʻa naʻe tala ange ʻe Sētane kia ʻIví?

Ngalingali ʻikai. Naʻe ʻikai tala ange ʻe Sētane kia ʻIvi te ne hā ngali ʻokú ne mate ka naʻá ne tala ange heʻikai te ne mate. Naʻe ʻikai ha toe fakakaukau hala fakalotu naʻe hao ʻi he Lōmakí. ʻOku ngalingali naʻe kamata ʻa e tui ko ia ki he laumālie taʻefaʻamaté ki muʻa hono ʻai ʻe he ʻOtuá ke movete atu ʻa e kakai naʻa nau langa ʻa e taua ʻo Pēpelí.—w19.12, p. 15.