Puha Fehuʻi

◼ Ko e hā ʻa e ngaahi faʻahinga fakalea ʻoku fakaongoongoleleiʻi mai ke ngāueʻaki he lolotonga ʻo e ngaahi fakataha fakaefakatahaʻangá?

ʻI he taimi naʻe akoʻi ai ʻe Sīsū hono kau muimuí ke lotú, naʻá ne fakahinohinoʻi kinautolu ke nau lea kia Sihova ʻi hono tuʻunga ko “ʻEtau Tamai.” Ko e fakakaukau ko ʻeni fekauʻaki mo ha vahaʻangatae fakafāmili fakalaumālie ʻi he vahaʻa ʻo hono kau muimuí kotoa naʻe toe fakamamafaʻi ia ʻi he taimi naʻá ne tala ange ai kiate kinautolu “ko e ngāhi tokoua kotoa pe.” (Mt. 23:8) ʻI he ngaahi taimi lahi naʻe ngāueʻaki ʻe he kau ʻapositolo mo e kau ākonga ʻa Sīsuú ʻa e foʻi lea “tokoua” ʻi ha ʻuhinga hangatonu moʻoni. Naʻe lave ʻa Pita kia Paula ʻi he tuʻunga “ʻa siʻotau tokoua ʻofeina” pea naʻe lea ʻa Paula “ʻa siʻoku tokoua ko Taitusi,” pea mo “hota tokoua ko Timote.”—2 Pita 3:15; 2 Kol. 2:13; Hep. 13:23.

ʻI he vakai atu ki he vahaʻangatae fakalaumālie vāofi ko ʻení, ʻoku angamaheniʻaki ʻe he Kau Fakamoʻoni ʻa Sihová ʻenau feleaʻaki ʻi he tuʻunga ko e “tokoua” mo e “tuofefine.” ʻI he ngaahi fonua lahi taha ʻo e Hihifó ʻoku nau ʻai ʻeni fakataha mo e hingoa fakamuimuí ʻi he lolotonga ʻo e ngaahi fakataha fakaefakatahaʻangá koeʻuhí he ko e ngāueʻaki ʻo e ngaahi ʻuluaki hingoa ʻo ha taha ʻoku lava, ʻi he taimi ʻe niʻihi, ke ne fakatupunga ha ngaahi faʻahinga palopalema. Kapau ʻoku haʻu foʻou ha tokotaha ki heʻetau ngaahi fakatahá pea ʻoku ʻikai te tau fuʻu maheni mo ia, te ne malava ke ongoʻi naʻa tau fuʻu maheni mo iá kapau te tau uiʻaki ia hono ʻuluaki hingoá koeʻuhí he ko e ngaahi hingoa fakamuimuí ʻoku faʻa angaʻaki hono ngāueʻaki ia ʻi he taimi ʻoku fakatahataha ai ha kakai ki ha ngaahi fakataha faka-Kalisitiane ʻi he ngaahi fonua ko iá. Ke uiʻaki ha faʻahinga taʻumotuʻa honau hingoa ʻuluakí ʻoku vakai ki ai ha niʻihi ia ko hano ʻikai ke tokaʻi.

Kae kehe, ʻoku kehe ʻa e tuʻungá ia ʻi he lotolotonga ʻo e kau Polinisiá. ʻI Tonga, ʻoku angaʻaki ai hono ngāueʻaki ʻa e ngaahi hingoa ʻuluakí, naʻa mo e kakai taʻumotuʻá pea ʻi he ngaahi tuʻunga totonu pē, pea ʻoku ʻikai fai ha vakai ia ki he meʻá ni ko ha taʻefakaʻapaʻapa. Ko ia ai, ʻoku feʻungamālie ʻi he ngaahi fakataha ʻa e fakatahaʻanga ʻi Tongá ke fakalea ki he faʻahinga ʻoku ʻi aí ʻaki hono ngāueʻaki ʻa e “tokoua” mo e “tuofefine” fakataha mo honau ʻuluaki hingoá.

ʻE ʻikai te tau fakalea ki he faʻahinga mahuʻingaʻia foʻoú ʻi he tuʻunga ko e “tokoua” pe “tuofefine” koeʻuhí he ko e vahaʻangatae fakalaumālie ʻo e fāmili ʻa e ʻOtuá ʻoku ʻikai ke ʻi ai ia ʻi honau tuʻungá. Kae, ngāueʻaki pē ʻa honau ʻuluaki hingoá. Kapau ko e tokotaha mahuʻingaʻia foʻoú ko ha Pālangi, ʻe lava ke ke ngāueʻaki fakataha ʻa e hingoa ʻuluakí mo e fakamuimuí. ʻI he tafaʻaki ʻe tahá, ʻi he fakaofi atu ʻa e tokotahá ki he fakatapuí pea fakakaukau kiate ia ke hoko ko e taha ʻo e Kau Fakamoʻoni ʻa Sihová, ʻoku ʻikai nai hano fakahalaʻi ke ngāueʻaki ʻa e hingoa ʻuluakí fakataha mo e “tokoua” pe “tuofefine.”

ʻI he taimi ʻoku tau ngāueʻaki ai ʻa e “tokoua” pe “tuofefine” he lolotonga ʻo ʻetau ngaahi fakataha fakaefakatahaʻangá, ʻoku fakahaaʻi ai ha vahaʻangatae mohu tāpuekina lahi ʻaupito, ko ha vahaʻangatae fakafāmili ʻi he malumalu ʻo e Tamai pē ʻe taha, ko Sihova ko e ʻOtuá. (Ef. 2:19e) Ko ha haʻi ia ʻoku fuʻu vāofi ange pea ʻoku mahuʻinga lahi ange ia ʻi ha toe faʻahinga vahaʻangatae kehe.