“Tau O ki he Fale ʻo Sihova”
1 Naʻe tali mo e loto-fiefai ʻe Tēvita ʻa e fakaafe: “Tau o ki he fale ʻo Sihova.” (Sāme 122:1) Naʻe fakafofongaʻi ʻe he temipalé ʻa e “fale” ʻo Sihová, pea ko e feituʻu ia naʻe fakatahataha ki ai ʻa kinautolu naʻa nau loto ke lotu ki he ʻOtua moʻoní. Ko ha feituʻu ʻo e maluʻanga mo e melino. ʻI he ʻahó ni, ko e “fale” ʻo e ʻOtuá ʻa e fakatahaʻanga Kalisitiané ʻi māmani lahi, “ko e pou mo e tuʻunga ʻo e Moʻoni.” (1 Tīm. 3:15) Ko e kotoa ʻo e ngaahi tokonaki ki he fakamoʻuí ʻoku malava ke maʻu ia ʻo fakafou mai ʻi he founga ko ʻení. ʻI he ʻuhinga ko iá, kuo pau ke “tafe ki ai ʻa e ngaahi kakai kotoa pe” kapau ʻoku nau loto ke maʻu ʻa e ngaahi tāpuaki kuo talaʻofa ʻe ʻi he malumalu ʻo e pule ʻa e Puleʻanga ʻo e ʻOtuá.—ʻAi. 2:2.
2 ʻOku lau fakataha ki he “fale” ko ʻení ʻa e ngaahi fakatahaʻanga ʻoku lahi hake ʻi he 69,000 ʻi he ngaahi fonua ʻe 229. ʻOku ava pē ʻa e ngaahi matapā ʻo e ngaahi Kingdom Hall ʻi māmani lahi, pea ʻoku tokolahi hake ʻi he toko fā miliona ʻa e kau ngāue faivelenga ʻoku nau fai ʻa e fakaafe: “Haʻu! . . . Pea ko ia ʻoku ne loto ki ai, ke ne toʻo taʻetotongi ʻa e Vaiola.” (Fkh. 22:17) Ko e tokolahi kuo nau fanongo ki he pōpoaki ko ʻení pea kuo nau tali mo e houngaʻia. Kuo aʻu ki he niʻihi kehe ka kuo teʻeki ai ke nau haʻu ki he fale ʻo Sihová ʻaki haʻanau feohi mo e fakatahaʻanga Kalisitiané. Ko e faʻahinga ko iá ʻoku ʻi ai “ʻenau fiemaʻu fakalaumālie” ʻa ia ʻe lava ke fakafiemālieʻi mei he ngaahi tokonaki ʻoku maʻu pē ia ʻi he fakatahaʻangá. (Mt. 5:3, NW) ʻOku tau moʻui ʻi he ngaahi taimi faingataʻa, pea ʻoku vave ʻa e fakaofiofi mai ʻa e ngataʻanga ʻo e tuʻu ko ʻení. Ko ha fakakaukau taʻehohaʻa pe pipiko ʻe hoko ai ha toloi pea ʻe fakatuʻutāmaki. ʻOku fiemaʻu fakavavevave ki he kakaí ke nau kakapa atu ke “ʻunuʻunu atu ki he ʻOtua” ʻaki ʻa ʻenau ʻunuʻunu ofi ki heʻene kautahá. (Sēm. 4:8) ʻE malava fēfē ke tau tokoni kiate kinautolu?
3 Tataki ʻa e Kau Mahuʻingaʻiá ki he Kautahá: ʻI heʻetau ʻuluaki fetuʻutaki pē mo e faʻahinga mahuʻingaʻiá, ʻoku totonu ke tau taki ʻa ʻenau tokangá ki he kautahá. Neongo te tau lava nai ke maʻu ʻa e ngaahi konga Tohitapu mo fakamatala ki he ngaahi tokāteline tefito, ka ʻoku ʻikai ko kitautolu ʻa e matavai ʻo e ʻilo ko iá. Ko e meʻa hono kotoa pē kuo tau ako ko e maʻu ia mei he kautahá, ʻo fakafou mai ʻi he tamaioʻeiki angatonu mo poto ʻa ia ʻokú ne ʻomai ʻa e “meʻakai ʻi hono taimi totonu.” (Mt. 24:45-47) Ko hono kamataʻangá, ʻoku fiemaʻu ke fakatokangaʻi ʻe he kau foʻoú ʻoku lahi ange ʻa e meʻa ʻoku kaunga ki he lotu maʻá ka ʻoku ʻikai ko kitautolu pē pe ko e fakatahaʻanga fakalotofonuá; ʻoku ʻi ai ʻa e sōsaieti fokotuʻutuʻu maau mo fakateokalati ʻi māmani lahi ʻoku ngāue ʻi he tataki ʻa Sihová.
4 Ko e fakahinohino ʻoku tau maʻú ko e ʻomi meia Sihova, ʻa ia kuó ne talaʻofa ke tataki mo akoʻi kitautolu. (Sāme 32:8; ʻAi. 54:13) Ko e fakahinohino ko ʻení kuo fakamafola fakatefito ia ʻo fakafou ʻi heʻetau ngaahi tohí. Kapau ʻe lava ke tau tokoni ke fakautuutu ʻi he faʻahinga ʻoku mahuʻingaʻiá ha mahuʻingaʻia lahi ki heʻetau ngaahi tohí, ke nau fakatokangaʻi ko e matavai ia ʻo e fakahinohino fakahaofi moʻuí, ʻe ngalingali ʻe lahi ange ʻenau lau mo ngāueʻaki ʻa e pōpoaki ʻoku ʻi aí ʻi haʻanau liʻaki leva ia. ʻOku totonu ke tau ʻai maʻu pē mo ngāueʻaki ʻa e tohi ko ʻení ʻi ha founga ʻe fakautuutu ha mahuʻingaʻia ai. ʻOku akoʻi heni ʻa e kau foʻoú ke nau houngaʻia ʻi he kautahá pea ke nau falala ki heʻene ngaahi tokonakí.
5 Fakahā ke ʻilo ʻe he faʻahinga ʻoku mahuʻingaʻiá ʻoku ʻi ai ʻa e feituʻu faiʻanga fakataha ʻa ia ʻoku maʻu mei ai maʻu ai pē ʻa e fakahinohinó. ʻOange kiate kinautolu ʻa e tuʻasila ʻo e Kingdom Hall mo e taimi ʻoku fai ai ʻa e ngaahi fakatahá. Fakamatala ki he ngaahi faikehekehe ʻo ʻetau ngaahi fakatahá mo e ngaahi fakatahataha fakaelotu naʻa nau kau nai ki ai ki muʻá. ʻOku talitali lelei ʻa e tokotaha kotoa pē; ʻoku ʻikai ke fai ai ha tānaki pe kole paʻanga. Neongo ʻoku fai ʻe he kau faifekau pē kuo fakanofó ʻa e ngaahi polokalamá, ka ʻoku ʻi ai ʻa e faingamālie ki he tokotaha kotoa pē ke kau ki ai ʻaki haʻane fai ha ngaahi fakamatala pea kau ki he ngaahi konga ʻi he polokalamá. ʻOku talitali lelei ʻa e ngaahi fāmilí; ʻoku fakakau mo e fānaú ki he ngaahi fetalanoaʻaki faka-Tohitapú. Ko ʻetau kau faifekaú ʻoku ʻikai te nau tui ha ngaahi pulupulu pe ngaahi teunga makehe. ʻOku teuteuʻi fakaʻofoʻofa ʻa e Kingdom Hall pea ʻoku ʻikai ke ʻi ai ha ngaahi teʻelango, pe ngaahi ʻīmisi. Ko kinautolu ʻoku kau mai ki aí ʻoku meimei ko e faʻahinga ʻoku nofo ʻo ofi mai pē ki ai.
6 Tataki Anga-Fakalakalaka ʻa e Mahuʻingaʻia ʻi he Ngaahi Ako Tohitapú: Ko e taumuʻa tefito ʻo e ako Tohitapú ko e akoʻi ʻa e moʻoni ʻo e Folofola ʻa e ʻOtuá. ʻOku totonu ke ne toe fakatupu ʻi he tokotaha akó ha houngaʻia ki he kautaha ʻa Sihová pea ke ʻai ia ke ne ʻilo ʻa e fiemaʻu mātuʻaki mahuʻinga ke ne hoko ko e konga ʻo e kautahá. Ko e ngāue lahi naʻe fai ʻe Sīsū mo ʻene kau ākongá ʻi he ʻuluaki senitulí naʻe tohoaki ai ʻa e kau loto-totonú pea naʻá ne fakatahatahaʻi kinautolu ke nau ngāue ʻi he malumalu ʻo ha kulupu pule. ʻI he ngaahi feituʻu naʻe lelei ai ʻa hono talí, naʻe fokotuʻu leva ʻa e ngaahi fakatahaʻanga ke ne fai maʻu pē ʻa e akoʻi mo e fakahinohinó. Naʻe fakatupumālohi fakalaumālie kiate kinautolu naʻe kau ki aí, ʻo tokoni ia kiate kinautolu ke nau kātekina ʻa e ngaahi taimi ʻo e mamahí. (Hep. 10:24, 25; 1 Pita 5:8-10) ʻI hotau ʻahó ni ko e taumuʻa ia ʻa Sihová ke “falute ʻa e meʻa kotoa pe ʻia Kalaisi.” (ʻEf. 1:9, 10) Ko hono olá, ʻoku tau maʻu ʻa e “haʻa lotu” ʻi māmani lahi.—1 Pita 2:17.
7 ʻOku totonu ke kau ki he ako Tohitapu fakauiké ʻa e fakahinohino ʻe tokoni ki he kau akó ke nau houngaʻia ai ʻi he kautahá pea mo ngāueʻaongaʻaki ʻa e ngaahi tokonaki ki honau fakahaofí. Ngāueʻaki ha ngaahi miniti ʻi he uike taki taha ke lave pe fakamatala ki ha meʻa ʻo fekauʻaki mo e kautahá mo e anga hono fakalelé. ʻE lava ke ke maʻu ha ngaahi poini tokoni ki he talanoá ʻi he Taua Leʻo ʻo Nōvema 1, 1984. Ko e polosiua ko e Jehovah’s Witnesses in the Twentieth Century mo Ko e Kau Fakamoʻoni ʻa Sihova ʻOku Ngāue Fāʻūtaha ki he Finangalo ʻo e ʻOtua ʻi Māmani Lahi ʻokú na fakamatala ki he ngaahi tafaʻaki lalahi ʻo e kautahá pea mo e anga ʻo ʻenau ʻaonga nai kiate kitautolú. Ko hono fai ha fokotuʻutuʻu mo e kau akó ke sio ʻi he vitiō Jehovah’s Witnesses—The Organization Behind the Name ʻe tokoni ia ke nau sio tonu ai ki he meʻa ʻoku malavá. Ko hono filifili ʻa e ngaahi lipooti mo e ngaahi meʻa kuo hokosia mei he Yearbook ʻe lava ke fakahā ʻa e ola lelei ʻo e ngāue ʻi he ngaahi fonua mo e ngaahi sivilaise kehe meiate kitautolu. ʻE lava nai ke ngāueʻaki mo e ngaahi tohi kehe. Faifai atu pē ʻi ha vahaʻa taimi, pea fakamatala hokohoko lelei ki ha ngaahi meʻa ʻo hangē ko e ʻuhinga ʻoku tau ʻalu ai mei he fale ki he falé, ko e taumuʻa ʻo ʻetau ngaahi fakatahá, ʻoku anga-fēfē ʻa hono fakapaʻanga ʻa ʻetau ngāué, pea mo ʻetau ngāue ʻi māmani lahí.
8 Ko e hoko ʻo maheni mo e kau Fakamoʻoni kehé ʻe lava ke fakatupu ueʻi-loto ki he kau foʻoú, ʻo fakalahi ai ʻa ʻenau fakakaukau ki he fakatahaʻangá. ʻAve ʻa e kau malanga kehé ʻi he taimi ki he taimi ke nau kau ki he akó. Ko ha tokotaha ʻi he fakatahaʻangá ʻoku meimei tatau ʻa hona ʻātakaí pe meimei tatau ʻa ʻena ngaahi mahuʻingaʻiá ʻe tānaki atu ia ke lahi ai ʻa e anga ʻo e fakakaukau ʻa hoʻo tokotaha akó. Ko ha tokotaha nai ʻo e kau mātuʻá ʻe lava ke mo ō koeʻuhi pē ke na maheni. Ko hono fokotuʻutuʻu ki he ʻovasia fakafeituʻú pe ko hono uaifí ke kau ki he akó ʻe hoko nai ia ko ha tāpuaki moʻoni. Kapau ʻoku ʻi ai ha tokotaha Fakamoʻoni ʻoku nofo ʻo ofi mai ki ai, ko hono ʻai ke na maheni mo e tokotaha ako Tohitapú ʻe hoko nai ia ko ha toe fakalototoʻa ki he tokotaha akó ke kau ki he ngaahi fakataha ʻa e fakatahaʻangá.
9 Fakalototoʻaʻi ʻa e Kau Foʻoú ke Nau Haʻu ki he Ngaahi Fakatahá: ʻOku fiemaʻu ki he kau foʻoú ke nau fakatokangaʻi ʻa e mahuʻinga ke kau ki he ngaahi fakatahá. Feinga ke langalangaʻi ʻa ʻenau mahuʻingaʻiá. Fakahā ʻa e ngaahi kupu ʻe fai ai ʻa e Ako Taua Leʻó. Lave ki he ngaahi kaveinga ʻo e ngaahi malanga fakahāhā ʻe fai. Fakamatala ki he ngaahi meʻa mahuʻinga ʻe fai ʻa e lave ki ai ʻi he Ako Fakafaifekau Fakateokalatí mo e Ako Tohitapu Fakaefakatahaʻangá. Fakahā ʻa e anga ʻo hoʻo fakakaukau tonu ʻo fekauʻaki mo e meʻa kuó ke ako ʻi he ngaahi fakataha ko ʻení pea mo e ʻuhinga ʻoku fiemaʻu ai ke kau ki aí. Kapau ʻokú ke malava, ʻomai ia ʻi ha meʻalele. Ko ha telefoni ki ai ki muʻa ʻi he taimi fakatahá ʻe tokoni nai ke fakaʻaiʻai ia ke kau ki he fakatahá.
10 ʻI he haʻu ʻa ha tokotaha ako Tohitapu ki he fakatahá, ʻai ke ne ongoʻi ʻoku talitali lelei ia. Fakafeʻiloaki ia ki he niʻihi kehé, kau ki ai mo e kau mātuʻá. Kapau ʻokú ne haʻu ki he malanga fakahāhā, fakafeʻiloaki ia ki he tokotaha-malangá. Taki ia ke ne mamata ʻi he Kingdom Hall. Fakamatala ki he taumuʻa ʻo e ongo kānita ʻo e tohí mo e makasiní, ngaahi puha tokoni, laipeli, mo e potutohi fakataʻú. ʻAi ke ne ʻilo ko e holó ʻoku ʻikai ko e fale pē ki he lotu ka ko e toe senitā ia ʻoku fokotuʻutuʻu maau mei ai ʻa e ngāue fakamalanga fakalotofonuá.
11 Fakamatala ki he anga ʻo hono fai ʻo ʻetau ngaahi fakatahá. Fakahā ki he tokotaha akó ʻa e ngaahi tohi ʻoku ngāueʻakí. Fakahaaʻi ko e Tohitapú pē ʻa ʻetau tohi ako tefitó. ʻE lava ke kau ki ai ʻa e tokotaha kotoa pē, kau ki ai mo e fānau iiki. Fakamatala ki he fasi mo e ngaahi lea ʻi heʻetau tohi hivá naʻe faʻu pē ia ʻe he Kau Fakamoʻoni ʻa Sihova ke ngāueʻaki ʻi heʻetau lotú. Fakatokanga ki ai ʻa e kehekehe ʻo e ngaahi ʻātakai ʻo kinautolu ʻoku nau kau ki he fakatahá. Fai ha ngaahi fakamatala pau ʻo fekauʻaki mo e laumālie ʻo e anga-fakakaumeʻa mo e talitali kakai. Ko e mahuʻingaʻia anga-ʻofa mo loto-totonu pehē ní ko ha taha nai ia ʻo ha ngaahi meʻa mālohi taha ʻi hano ueʻi ʻa e tokotaha akó ke toe haʻu.
12 ʻUhinga ʻE Fakatoupīkoi Nai Ai ʻa e Niʻihi: ʻOku faʻa hoko neongo ʻa e meʻa hono kotoa kuó ke faí, ʻoku toumoua ʻa e niʻihi ke ʻunu ʻo ofi mai ki he kautahá. ʻOua te ke foʻi leva. Feinga ke ke ʻai koe ki he tuʻunga ʻokú ne ʻi aí. Mahalo pē ʻi he aʻu ki he taimi ko ʻení kuo ʻikai te nau ongoʻi moʻoni ʻa e fiemaʻu ke kau ki ha ngaahi fakataha fakaelotu tukukehe pē ʻa e ngaahi taimi makehe. ʻOku fakafaingataʻaʻiaʻi nai kinautolu ʻe he ngaahi mēmipa ʻo e fāmilí pe ngaahi kaungāmeʻa ofi. ʻOku nau ongoʻi loto-siʻi nai koeʻuhi ko e ngaahi fakamatala paetaku kuo fai ʻe he ngaahi kaungāʻapí. Pea ko e moʻoni, ʻoku fai kiate kinautolu ha ngaahi tohoaki kehekehe ʻi he meʻa fekauʻaki mo e tuli ki he ngaahi fakafiefia fakasōsialé. ʻOku nau sio nai ki he ngaahi meʻá ni ʻoku hangē ha moʻunga ʻe ʻikai ke lavaʻi; ʻoku fiemaʻu ke ke tokoni kiate kinautolu ke nau sio ki he ngaahi meʻa ʻi honau tuʻunga totonú pea ke nau “fakapapauʻi ʻa e ngaahi meʻa ʻoku mahuʻinga ange.”—Fili. 1:10, NW.
13 ʻOatu ha ngaahi ʻuhinga faka-Tohitapu ke fakaʻutumauku ai pē. Fakamamafaʻi ʻoku fiemaʻu fakavavevave kiate kitautolu hono kotoa ʻa e fakalototoʻa mo e langa hake fakalaumālie ʻa ia ʻoku tau maʻu mei heʻetau fakatahataha fakatahá. (Loma 1:11, 12) Naʻe fakahā mahino ʻe Sīsū ko e fakafepaki mei he fāmilí ʻoku ʻikai ko ha ʻuhinga lelei ia ke fakatoupīkoi ai. (Mt. 10:34-39) Naʻe ekinaki ʻe Paula kiate kitautolu ke ʻoua te tau mā ke fakahā fakahāhā kitautolu ko e kau ākonga ʻa Sīsū. (2 Tīm. 1:8, 12-14) Kuo pau ke mapuleʻi ʻa e ngaahi fiemaʻu mo e ngaahi fakaleluʻi fakaekitá; he ka ʻikai, te nau hoko ko e tauhele. (Luke 21:34-36) Ko kinautolu ʻoku nau taau mo e tāpuaki ʻa Sihová kuo pau ke nau ʻaufuatō, ʻoua ʻaupito ʻe fakapāpākū. (Kol. 3:23, 24) Ko hono fokotuʻu ha houngaʻia ki he ngaahi tefitoʻi moʻoni faka-Tohitapu peheé ʻe fakaava nai ai ʻa e hala kiate kinautolu ke nau fakalakalaka fakalaumālie.
14 ʻOku Ava ʻa e Ngaahi Matapaá: Ko e fale ʻo e lotu moʻoni ʻa Sihová kuo fakamāʻolungaʻi hake ia ʻi he niʻihi kotoa ko ē. Ko e fakaafé kuo fai ia ʻi māmani lahi ʻi he ngaahi fonua ʻe 229. “Haʻuā! ke tau ʻalu hake ki he moʻunga ʻo Sihova, . . . pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.” (ʻAi. 2:3) Ko e tali pau mei he kau foʻoú ʻe lava ke fakahaofi ai ʻa ʻenau moʻuí. Ko hono taki ʻa ʻenau tokangá ki he kautaha ʻa Sihová ko e taha ia ʻo e ngaahi founga lelei taha ʻe lava ke tau tokoni ai kiate kinautolu.