Tokoniʻi ʻa e Niʻihi Kehé Ke Nau Maʻu ʻa e Ngaahi Fakatahá
1 “Ko ha ngaahi kaumeʻa pē ʻoku nofo ofi mai . . . ʻoku nau loto ke maʻu ʻa e ngaahi fakatahá ʻoku fakaafeʻi loto-māfana atu ke nau fai pehē.” Talu mei he hā ʻa e fanongonongo ko ʻení ʻi he ʻīsiu ʻo e Zion’s Watch Tower ʻo Nōvema 1880 mo hono fakaafeʻi loto-vēkeveke ai ʻe he Kau Fakamoʻoni ʻa Sihová ʻa e kakaí ke nau fakatahataha fakataha ki ha fakahinohino faka-Tohitapu. (Fkh. 22:17) Ko ha konga taʻealatuku ʻeni ʻo e lotu moʻoní.
2 ʻOku Mātuʻaki Mahuʻinga ke Kau Ki Ai: ʻOku maʻu ʻa e ngaahi tāpuakí ʻi he taimi ʻoku tau feohi ai mo e fakatahaʻangá. ʻOku tau hoko ai ʻo maheni lelei ange mo hotau ʻOtua fakaofó, ʻa Sihova. ʻI he fakatahaʻangá, ʻoku tau fakatahataha fakataha ai ke “akonakiʻi e Jihova.” (Ai. 54:13, PM) ʻOku ʻomai ʻe heʻene kautahá ha polokalama hokohoko ʻo e fakahinohino faka-Tohitapu ʻa ia te ne tohoakiʻi kitautolu ke ofi ange ai kiate ia pea ʻomai mo e tokoni ʻaonga ʻi hono ngāueʻaki ʻa e “finagalo kotoabe oe Otua.” (Ng. 20:27, PM; Luke 12:42) ʻOku tokonaki mai ʻe he ngaahi fakatahá ʻa e ako fakafoʻituitui ki he pōtoʻi ʻi hono akoʻi ʻa e Folofola ʻa e ʻOtuá. Ko e ngaahi fakamanatu mei he ngaahi Konga Tohitapú ʻokú ne tokoniʻi kitautolu ke tau fiefia ʻi he ngaahi vahaʻangatae lavameʻa mo e niʻihi kehé pea mo Sihova tonu. Ko e feohi mo e faʻahinga ʻoku nau ʻofa ki he ʻOtuá ʻokú ne fakaivimālohiʻi ʻetau tuí.—Loma 1:11, 12.
3 Fai ha Fakaafe Fakahangatonu: Mei he ʻuluaki akó, fakaafeʻi ʻa e tokotaha ako Tohitapu kotoa pē ki he ngaahi fakatahá. ʻOange kiate ia ha tohi fakaafe. Langaʻi hake ʻene mahuʻingaʻiá ʻaki hoʻo vahevahe ange ha poini naʻá ne fakalototoʻaʻi koe mei he fakataha fakamuimuí pea ʻaki ʻa e fakakaukau ki ha meʻa ʻa ia ʻe fai ha lāulea ki ai ʻi he fakataha hono hokó. Fakamatalaʻi pe ʻoku fēfē ʻa e Fale Fakatahaʻangá, pea fakapapauʻi ʻokú ne ʻilo ʻa e founga ke ʻilo ai iá.
4 Kapau heʻikai ke maʻu fakataha leva ʻa e tokotaha akó, hokohoko atu ʻa hono fakaafeʻi iá. Vaheʻi ha ngaahi miniti siʻi ʻi he uike taki taha ke fakahaaʻi ange ai kiate ia ʻa e founga ʻoku fakalele ʻaki ʻetau kautahá. Ngāueʻaki ʻa e polosiua Ngāue ki he Finangalo ʻo e ʻOtuá pea mo e foʻi vitiō ko e Jehovah’s Witnesses—The Organization Behind the Name ke ne alāanga mo kitautolu pea mo ʻetau ngaahi fakatahá. ʻAve ha kau malanga kehe ke maheni ʻa e tokotaha akó mo kinautolu. ʻI he lotú, fakamālō kia Sihova koeʻuhi ko e kautahá pea lave ki he fiemaʻu ʻa e tokotaha akó ke feohi mo iá.
5 ʻOua te ke toumoua ke tokoniʻi ʻa e faʻahinga mahuʻingaʻia foʻoú ke fakatahataha mo kitautolu. ʻI he tupulaki ʻenau houngaʻia ʻia Sihová, ʻe ueʻi ai kinautolu ke nau ngāueʻaki ʻa e meʻa ʻoku nau akó pea ke hoko ko e konga ʻo e kautaha fāʻūtaha ʻa e ʻOtuá.—1 Kol. 14:25.