Ke Ngāueleleiʻaki ʻa e Ko e Taua Leʻo mo e Awake!

¹ Ko e Taua Leʻo mo e Awake! ko e ongo makasini mātuʻaki mahuʻinga mo ʻaonga lahi taha ʻe malava ke lau ʻe he kakaí ʻi he ʻahó ni. Ko e hā hono ʻuhingá? Koeʻuhi ko e ngaahi moʻoni fakalaumālie ʻoku ʻi aí ʻe malava nai ke iku ai ki ha lelei tuʻuloa ki he moʻui ʻa e kakaí. Kaekehe, ʻoku ʻi ai ha tokolahi ʻoku ʻikai te nau fuʻu tokanga lahi ki heʻenau fiemaʻu fakalaumālié, pe ʻoku ʻikai te nau ʻilo pe ʻe fakafiemālieʻi ʻenau fiemaʻú mei fē. Ko hotau monū ia ke faʻifaʻitaki ki he ʻapositolo ko Paulá ʻaki ʻetau tokoni ki he kakaí ke fakaava honau mata fakalaumālié.​—Mt. 5:3; Ng. 26:18.

² ʻAi ke Fakakaukau Pau mo Teuteu Lelei: ʻOku hangehangē ʻoku ʻi ai ʻa e kakai hangē ha sipí ʻi ho kauhalá ʻa ia te nau tali ʻa e moʻoní. Ko e meʻa pē ʻoku fiemaʻu ia ki ha niʻihi, ko ha fakalototoʻa anga-ʻofa pē ke nau lau ʻa e ngaahi makasiní. Ko ia ai, ʻai ke fakakaukau pau mo leʻo-afea ʻi hoʻo tuʻuaki ʻa e Ko e Taua Leʻo mo e Awake! ʻAi ke toʻo maʻu pē ha ngaahi makasini pea ke ngāueleleiʻaki ʻa e ngaahi faingamālie kotoa pē ke tufaki kinautolu, naʻa mo e taimi ʻoku tuʻuaki ai mo e ngaahi tohi kehé.

³ Ko e hā nai te ne ʻai kitautolu ke toe ola lelei ange ʻi hono tufaki ʻo e ngaahi makasiní? ʻUluaki, kuo pau ke tau mātuʻaki loto-hounga ʻa kitautolu tonu ki hono mahuʻinga ʻo e ngaahi makasiní. ʻOku totonu ke tau anga-maheni mo e ngaahi kupu ʻoku ʻi he ngaahi makasini ko ia te tau tuʻuakí, pea ʻe ʻai ʻe he meʻá ni ke fakalahi ange ʻetau falala mo ʻetau fakamātoato ke tuʻuaki kinautolú. Manatuʻi maʻu ʻa e fakakaukau ko iá ʻi hoʻo ʻuluaki lau ʻa e ngaahi makasiní. ʻAi ke tokanga ʻo fili ʻa e ngaahi poini ke fakaeʻa ʻi he ngāue fakamalangá. ʻEke hifo kiate koe: ‘ʻE tautefito kia hai ʻa e fakamānako ʻa e kupu ko ʻení? ʻE houngaʻia ki ai ʻe ha uaifi, ha taha kei talavou, pe ko ha tangata pisinisi nai? ʻE langaʻi ʻe he poini ko ʻení ʻa e mahuʻingaʻia ʻa ha taha kei ako, ʻa ha taha kuo ʻosi mali, ʻa ha taha ʻoku tokanga ʻo kau ki he ʻātakaí?’ Ke ola lelei moʻoni, ʻoku totonu ke tau malava ke fakaongongoleleiʻi ʻa e ngaahi makasiní ʻo fakatuʻunga ʻi heʻetau ʻilo fakafoʻituitui mo e fiefia naʻa tau maʻu mei he ngaahi kupu ʻoku feʻungamālie.

⁴ Ngāueleleiʻaki ʻa e Ngaahi ʻĪsiu Kuo Motuʻá: Manatuʻi, Ko e Taua Leʻo mo e Awake! ʻoku ʻikai ke mole hona mahuʻingá, neongo ʻoku teʻeki ai ke tufa ʻi he lolotonga ha māhina ʻe taha pe ua mei he ʻaho ko ia ʻoku hā ʻi he takafí. ʻOku ʻikai ke siʻi hifo ange ʻa e mahuʻinga ʻo e fakamatala ʻoku hā ʻi he makasiní ʻi he ʻalu ʻa e taimí, pea ʻoku ʻikai totonu ke tau toumoua ʻi hono tuʻuaki ʻo e ngaahi tatau kuo motuʻá ʻo kapau ʻoku nau kei ʻi ha tuʻunga lelei. ʻOku hā mei hono tuku ʻa e ngaahi makasini motuʻá ke fokotuʻu ʻo fuʻu lahi pea ʻikai ke ngāueʻaki kinautolú ʻa e ʻikai maʻu ʻa e loto-hounga ki he ngaahi meʻangāue mātuʻaki mahuʻinga ko ʻení. ʻOku ʻi he makasini taki taha ʻa e ngaahi moʻoni ʻa ia ʻoku malava nai ke ne hanga ʻo langaʻi mo fakafiemālieʻi ʻa e fiemaʻu fakalaumālié. ʻI he lelei ange ke ʻoua ʻe tuku ki he tafaʻakí ʻa e ngaahi ʻīsiu motuʻá pea ngalo kinautolu ia, ʻikai ʻe lelei ange ke fai ha feinga makehe ke tufaki kinautolu ki he kakai ʻoku mahuʻingaʻiá pe tuku ki he ngaahi ʻapi ʻoku ʻikai ke ʻi ai ha tahá kae ʻoua ʻe eʻa mai ki he halá?

⁵ Ko e makasini ko e Awake! kuó ne tokoniʻi ʻa e tokolahi ʻa ia ʻi he kamataʻangá naʻe ʻikai te nau fuʻu loko mahuʻingaʻia ki he ngaahi meʻa hehema fakalaumālié ke nau hoko ʻo tokanga ki heʻenau fiemaʻu fakalaumālié. Ko e Taua Leʻó ko e meʻangāue tefito ia ki he polokalama fafanga fakalaumālie ʻo e kakai ʻa Sihová. ʻOku fefakakakatoʻaki ʻa e ongo makasiní ni, pea ʻoku ʻi ai hona kaunga mātuʻaki mahuʻinga ʻi hono fakahoko ʻa e malangaʻi ʻo e ongoongo leleí.

⁶ ʻI heʻetau ngāueleleiʻaki ʻa e ngaahi faingamālie kotoa pē ke tuku atu ai ʻa e ngaahi makasiní, ʻoku tau tui pau ki heʻenau ola lelei ʻi hono fakalato ʻa e ngaahi fiemaʻu fakalaumālie ʻa kinautolu ʻoku hangē ha sipi. ʻOku totonu ke tauhi maʻu ʻa e anga ʻo e fakakaukau pau, teuteu lelei, pea ke kau maʻu pē ʻi he ngāue fakamalangá. ʻI he tuʻunga ko e kau malangaʻi ʻo e ongoongo leleí, ʻofa ko e kotoa ʻo kitautolu te tau ngāueleleiʻaki maʻu pē ʻa e ongo makasini ko e Taua Leʻo mo e Awake!