Fakaʻaliʻali e Ngaahi Makasiní ʻi Hoʻo Ngāue Fakafaifekaú

1, 2. Kuo anga-fēfē hono laveʻi ʻe he Taua Leʻo mo e ʻĀ Hake! ʻa e moʻui ʻa e kakaí?

¹ “ʻOku fakamānako, taimi tonu, pea fakatupu langa hake.” “Ko e ngaahi pepa fakalototoʻa lahi taha eni kuo faifai ange peá u laú.” ʻOku fakamatalaʻi lelei ʻe he ongo fakamatala ko ení ʻa e anga ʻo e ongoʻi ʻa e kau lautohi takatakai ʻi he māmaní ʻo fekauʻaki mo e Taua Leʻo mo e ʻĀ Hake! Ko e moʻoni, kuo fakamoʻoniʻi ʻene hoko ʻetau ngaahi makasiní ko ha ngaahi meʻangāue ʻaonga ia ʻi he aʻu ko ia ki he “kakai kotoa pe” mo e ongoongo leleí.—1 Tim. 2:4.

² Naʻe maʻu ʻe ha tangata pisinisi ha makasini ʻĀ Hake! ʻi ha kaveinga naʻe fakamānako kiate ia. Ki mui ai, naʻá ne lau ʻa e ʻīsiu naʻe ʻoange fakatahá ko e Taua Leʻo, ʻa ia naʻe ʻi ai ha kupu naʻá ne ueʻi ia ke ne sivisiviʻi ʻene tui fuoloa ki he tolu-tahaʻi-ʻotuá. Naʻe kamataʻi ai heni ʻene mahuʻingaʻiá. Hili ha māhina ʻe ono mei ai naʻá ne papitaiso. Naʻe maʻu tuʻumaʻu ʻe ha tangata ʻe taha ʻa e ngaahi makasiní ka naʻe ʻikai ʻaupito te ne lau kinautolu. Ko hono uaifí, ʻi he tafaʻaki ʻe tahá, naʻá ne fakataleʻi ʻa e Kau Fakamoʻoní ka naʻá ne lau ʻa e ngaahi makasini naʻe tuku ki hono husepānití. Naʻe laveʻi hono lotó ʻe he talaʻofa ʻa e Tohi Tapú ki ha palataisi fakaemāmani ʻa ia ʻe fakafonuʻaki e kakai māʻoniʻoní. ʻI he faai mai ʻa e taimí, ko ia, ko hono fohá mo hono tehiná ne nau hoko ko e kau sevāniti ʻa Sihova.

3. Ko e hā ʻa e ʻaonga ʻo hono tuʻuaki ʻa e ongo makasiní ko ha setí?

³ Tuʻuaki Kinaua ko ha Seti: Hangē ko ia ʻoku fakahaaʻi ʻe he ngaahi fakatātā naʻe toki ʻosi lave ki aí, ʻe ʻikai lava ke tau fakapapauʻi pe ko hai te ne lau ʻetau ngaahi makasiní pe ko e hā te ne langaʻi nai ʻenau mahuʻingaʻiá. (Koh. 11:6) Ko ia ai, ʻoku ʻaonga ke tuʻuaki fakataha ʻa e Taua Leʻo mo e ʻĀ Hake ko ha seti, neongo te tau fakaʻaliʻali tefito ʻa e makasini pē ʻe taha ʻi heʻetau tuʻuakí. ʻI he ngaahi tuʻunga ʻe niʻihi, ʻe lelei nai ke tuʻuaki ha ngaahi ʻīsiu kehekehe lahi ʻo ʻetau ongo makasiní ʻi ha ʻaʻahi.

4. ʻE malava fēfē nai ke tau fakataimitēpileʻi ʻetau ngāue fakamakasiní?

⁴ ʻOku ʻaonga ke fakataimitēpileʻi ha ʻaho ʻe taha ʻi he uike taki taha ke kau ai ʻi he ngāue fakamakasiní. ʻI he 2005 Calender of Jehovah’s Witnesses, ʻoku vaheʻi ai ʻa e Tokonaki kotoa pē ko ha “ʻAho Makasini.” ʻOku moʻoni, koeʻuhi ʻoku kehekehe ʻa e ngaahi tuʻunga fakalotofonuá mo e fakafoʻituituí, ʻe vaheʻi nai ʻe he niʻihi ha ʻaho kehe ke fai ai ha tokanga makehe ki hono tuʻuaki ʻetau ngaahi pepá. Ko ha konga eni ʻo hoʻo taimi-tēpile fakauiké?

5. Ko e hā ʻa e ngaahi faingamālie ke tufaki ai ʻa e ngaahi makasiní ʻoku totonu ke tau tokanga ki aí, pea ko e hā ʻe lava ke ne tokoniʻi kitautolu ke tau fai peheé?

⁵ Fokotuʻu ha Taumuʻa Fakafoʻituitui: Ko hono fokotuʻu ko ia ha taumuʻa fakamāhina fakafoʻituitui ʻo hono tufa ʻo e makasiní ʻe lava ke ne tokoniʻi kitautolu ke tau tokanga lahi ange ki hono tufaki ʻo e makasiní. ʻOku ʻi ai haʻo tukuʻanga makasini pau? ʻOkú ke tuʻuaki ʻa e ngaahi makasiní ki he faʻahinga ʻokú ke fetaulaki mo ia ʻi he ngāue fakafaifekaú? ʻE lava ke ke tuʻuaki ha ngaahi makasini ʻi he ngāue he halá, ʻi he feituʻu pisinisí pea ʻi he ngaahi feituʻu kakaí? ʻOkú ke ʻave ha ngaahi makasini ʻi hoʻo fefonongaʻakí, fakataú pea mo e ʻalu ki he ngaahi ʻapoinimení? Ngāueʻaongaʻaki ʻa e faingamālie feʻungamālie kotoa pē ke tokoniʻi ai ʻa e niʻihi kehé ke nau maʻu ʻaonga ai mei he Taua Leʻo mo e ʻĀ Hake!

6. ʻE lava fēfē ke tau ngāueʻaongaʻaki ʻa e ngaahi ʻīsiu motuʻa ange ʻo e ongo makasiní?

⁶ ʻE toe lava foki ke tau ʻai ko ʻetau taumuʻá ia ke tufaki ʻa e ngaahi ʻīsiu motuʻa ange ʻoku tau kei maʻú. Naʻa mo e ʻikai ke tufaki ʻa e ngaahi makasiní ʻi he māhina ʻe taha pe ua ʻo e ʻaho ʻo e ʻīsiú, ʻoku kei mahuʻinga pē ʻa e fakamatalá. Tufaki kinautolu ki he faʻahinga mahuʻingaʻiá. Ki he laui miliona ʻo e kakaí, kuo hoko ʻa e ongo makasini Taua Leʻo mo e ʻA Hake! “ko ha lea . . . ʻi hono taimi totonu.” (Pal. 25:11) ʻAi ke tau ngāueʻaki kinaua ke tokoniʻiʻaki ha toe laui miliona lahi ange ke nau hoko ʻo ʻiloʻi mo tauhi ʻa Sihova.