Toe ʻAʻahi ke Tokoni ki he Kakaí ke Nau Ako ki he Founga Te Nau Malava Ai ke Moʻui Taʻengatá
1 Talu hono tuku mai ʻa e tohi ko e Moʻui Taʻengatá, ne lahi ange he ngaahi tatau ʻe 65 miliona kuo pulusi ʻi he ngaahi lea kehekehe ʻe 115. Ko e tokolahi ʻo kinautolu kuo nau hoko he taimí ni ko e kau sevāniti ʻa Sihová naʻa nau ako ki he ngaahi moʻoni ʻa e Tohitapú mei he meʻangāue lelei ko ʻení. ʻI he māhiná ni mo e māhina ka hoko maí, te tau maʻu nai ʻa e faingamālie ke tuku atu ʻa e tohi ko ʻení ko e tokoni ki he ako ʻo e Tohitapú, pe ʻi he lolotonga ʻa e ngāue fakamalangá te tau feʻiloaki nai ai mo e kakai kuo nau ʻosi maʻu ia.
2 Ko e Toe ʻAʻahi Kiate Kinautolu Kuo Nau ʻOsi Maʻu ʻa e Tohí: ʻOku ʻi ai ʻa e kau malanga ʻe niʻihi kuo nau maʻu ha ola lelei ʻi heʻenau fakahanga ʻa e tokangá ki he ngaahi kaveinga fakahokohoko ʻoku ʻi he tohí pea ʻeke ki he tokotaha mahuʻingaʻiá pe ko e fē ʻa e kaveinga ʻokú ne mahuʻingaʻia aí. ʻI hono fili ʻe he tokotaha-ʻapí ha kaveingá, fokotuʻu atu ke ne lau ʻa e vahe ko iá ʻi he tohí ki muʻa ʻi he ʻaʻahi hoko maí.
3 Ki hono lahi taha ʻe malavá, ʻoku totonu ke tau fai ha alea ki ha taimi pau ke toe ʻaʻahi atu ai. Ki muʻa ke tau toe fokí ʻoku totonu ke tau teuteu ki ha fetalanoaʻaki ʻi ha ngaahi palakalafi ʻe niʻihi ʻo e vahe kuo fili ʻe he tokotaha-ʻapí. Kapau naʻe ʻikai te ne fakahā ʻa e meʻa ʻokú ne mahuʻingaʻia ki aí, te tau malava ke kamata ʻa e fetalanoaʻakí ʻi he vahe 1. ʻI he ʻosi ha fetalanoaʻaki ki ha ngaahi palakalafi ʻe niʻihi, ʻoku totonu ke tau langaʻi ha fehuʻi ʻa ia ko hono talí ʻe maʻu ʻi he ngaahi palakalafi hoko atú. ʻE hoko ia ko ha founga ke toe fai ai ha ʻaʻahi ke malava ʻo hokohoko atu ha ako ʻi he tohi ko e Moʻui Taʻengatá.
4 ʻOku moʻoni, kapau ʻoku ʻi ai ha ngaahi fehuʻi ʻa e tokotaha-ʻapí, ko e meʻa lelei tahá ke ʻuluaki fai ha fetalanoaʻaki ki ai. ʻOku hangehangē ʻe maʻu ʻa e tali ki heʻene ngaahi fehuʻí mei he tohí. ʻI heʻetau alāanga mo e ngaahi meʻa ko ia ʻi he tohí, te tau malava nai ke huke ki he ngaahi palakalafi feʻungamālie ko iá pea ngāueʻaki ʻa e fakamatalá ke tali ʻa e ngaahi fehuʻi naʻe langaʻi haké.
5 Toe ʻAʻahi Kiate Kinautolu Naʻa Tau Tuku ha Tuleki Kiate Kinautolu: Mahalo pē naʻa tau tuku ki he tokotaha-ʻapí ha tatau ʻo e tuleki ko e Māmani Foʻou Melino. ʻI heʻetau toe ʻaʻahí, te tau malava ke fai ʻa e fetalanoaʻakí ʻi he ngaahi ʻuluaki palakalafi pē ʻo e tulekí.
Kapau ʻe fakahā ha mahuʻingaʻia moʻoni mei he tokotaha-ʻapí, ʻi heʻetau aʻu ki he ngataʻanga ʻo e palakalafi ʻuluaki ʻi he peesi 3, ʻa ia ʻoku hiki ai ʻa e Sāme 37:29, te tau lea pehē ni nai:
◼ “ʻOku fokotuʻu mahino ʻe he ngaahi lea ko ení ʻa e meʻa ko ia ʻoku lāulea ki ai ʻi he tohí ni, Te Ke Malava ʻo Moʻui Taʻengata he Palataisi ʻi he Māmaní. Fakatokangaʻi ʻa e fakakaukau ko ia ʻi he palakalafi 3 ʻo e vahe 1 ʻi he kaveinga tokoni ‘ʻUhinga ʻE Lava Ke Tau Tui Ai.’” ʻE lava leva ke tau toki lau ʻa e palakalafi 3, lau ʻa e fehuʻí mei he tohí, pea hoko atu ki he palakalafi 4 mo e 5 ʻi he founga tatau. Pea te tau lea pehē ni leva: “Ko e hā kuo kehe ʻaupito ai mo e ngaahi tūkunga ʻa e ʻOtuá ʻa e ngaahi tuʻunga ko ʻeni he taimi ní? Ko e ngaahi palakalafi ʻe niʻihi ʻoku hoko maí te nau fakamatalaʻi ia, pea te u loto-lelei ke toe ʻaʻahi mai ʻi he uike kahaʻú ʻi he taimi tatau ke tali ʻa e fehuʻi ko iá kiate koe.” Kapau ʻoku fakahā mei he tokotaha-ʻapí ha mahuʻingaʻia moʻoni, te tau loto nai ke tuʻuaki ʻa e tohí ʻi he taimi pē ko iá. Pe te tau fakakaukau ke toki tuʻuaki ia ʻi he ʻosi ʻo ʻetau ʻaʻahi hoko maí.
6 Ke tuʻuaki ʻa e tohi ko e “Moʻui Taʻengata”, te tau lea pehē ni nai:
◼ “ʻOku ou tui pē te ke fiefia ke maʻu haʻo tatau ʻi he tohi ko ʻení. Te ke malava ke lau ia ki muʻa pea toe lahi ange ai ʻa e mahino te ke maʻu mei heʻeta fetalanoaʻaki ki ai ʻi he kahaʻú.” Kapau ʻe loto ʻa e tokotaha-ʻapí ke ne maʻu ʻa e tohí, te tau toki lea pehē ni leva: “Ko e ngāue ko ʻení ʻoku poupouʻi ia ʻi he tokoni fakapaʻanga loto-fiefoaki ki ai. Kapau te ke saiʻia ke fai ha tokoni ki he ngāue ʻa e Kau Fakamoʻoni ʻa Sihová ʻi māmani lahi, te ke lava ke fai pehē.”
7 Ko e ngāue mātuʻaki mahuʻinga ʻa e toe ʻaʻahi ke tokoni ki he kakaí ke nau ako ki he founga te nau malava ai ke moʻui taʻengatá. Naʻe fakahinohinoʻi ʻe Sīsū hono kau muimuí ke nau akoʻi ʻa e niʻihi kehé ʻo kau ki he ngaahi meʻa kuo akoʻi kiate kinautolú. ʻOku tau lotu kia Sihova ke fakatokolahi mai ʻa e kau ngāué. Ko ia ai, tau fai ʻe kitautolu ʻetau ngāue kuo vaheʻi mai ko hono kumi ʻa kinautolu ʻoku mahuʻingaʻiá mo akoʻi kinautolu ke nau hoko ko e kaungāngāue ʻi he ututaʻú.—Mt. 9:37; 28:19, 20.