Ngaahi Toe Foki Faingofua mo Ola Lelei
1 ʻOkú ke toutou fai ha ngaahi toe foki, pe ʻoku faʻa faingataʻa kiate koe koeʻuhi ko e ʻikai ke ʻiloʻi pe ko e hā ʻa e meʻa ke leaʻakí? ʻOku ʻikai ko e fiemaʻú ia ke ke ongoʻi loto-siʻi. Ko e ngaahi meʻa ʻe tolu te ne tokoniʻi koe ke ke lavameʻá: (1) teuteu lelei; (2) ko e malava ke fetalanoaʻaki ʻi ha poini ʻe taha pe ua ʻi ha ngaahi kaveinga faka-Tohitapu faingofua pē; mo e (3) loto-lelei ke fanongo ki he anga ʻo e fakakaukau ʻa e tokotaha-ʻapí.
2 ʻI he teuteu ki ha toe foki, fakakaukau pe ko e hā ʻa e kaveinga ʻe feʻungamālie ke fai ha fetalanoaʻaki ai mo e tokotaha-ʻapí. Ko ha tokotaha ʻoku kei ako? ʻOku tokolahi ʻa kinautolu ʻoku kei ako te nau maʻu ha taimi lahi ange ke fai ha fetalanoaʻaki ki ha ngaahi taumuʻa mei he Tohitapú ʻi he māhina ko ení he te nau mālōlō ai mei he akó. Te ke maʻu nai ha faʻahinga ʻoku nau fie fanongo ki he fanongonongo ʻo e Puleʻangá. Naʻá ke ʻeke ha fehuʻi ʻi he fakaʻosi ʻa hoʻo ʻuluaki ʻaʻahí, pe naʻe fakahā ʻe he tokotaha-ʻapí haʻane mahuʻingaʻia ʻi ha faʻahinga kaveinga pau? Toe vakai hoʻo ngaahi noutí, pea ke ngāueʻaki ʻa e tohi Reasoning ke maʻu ha fakamatala ʻa ia ʻoku fiemaʻú kae lava ke fai ha toe foki ola lelei. ʻI hoʻo toe fokí, ke ke anga-fakakaumeʻa mo māfana. Leaʻaki ʻa e hingoa ʻo e tokotaha-ʻapí.
3 Kapau naʻá ke tuku ha Ko e Taua Leʻo mo e Awake! ʻi he tokotaha-ʻapí, ʻe malava nai ke fakatuʻunga ʻa hoʻo toe fokí ʻi ha taumuʻa faingofua ʻe taha pe ua kuó ke fili mei he makasiní. Kapau naʻá ke tuku ha tuleki ʻi hoʻo ʻuluaki ʻaʻahí, te ke malava ke poupou ʻi he tulekí pē pe hoko atu hoʻo fakamatalá ʻaki haʻo lave ki ha taumuʻa feʻunga ʻi ha makasini pe ko ha polosiua.
4 Kapau naʻá ke tuku ʻa e tuleki ko e “Moʻui ʻi ha Māmani Foʻou Melino,” te ke pehē:
◼ “ʻI heʻeku ʻi heni ki muʻá, naʻá ta lau ʻo kau ki he talaʻofa ʻa e ʻOtuá ki ha māmani foʻou melino. Hangē ko e meʻa naʻá ta talanoa ki aí, ʻe hoko mai ʻa e ngaahi tuʻunga lelei ʻo fakafou mai ʻi he Puleʻanga ʻo e ʻOtuá. Ko e hā haʻo fakakaukau ki he meʻa ʻoku fiemaʻu ke tau fai ka tau hoko ʻo kau ʻi he māmani foʻou melino?” Tuku ke ʻi ai ha lau ʻa e tokotaha-ʻapí, pea ke toki fakahā leva ʻa e fakakaukau ko ia ʻoku ʻasi ʻi he Sāme 37:9, 11, 29.
5 Kapau naʻá ke tuku ʻa e tuleki “Ko e hā ʻa e ʻAmanaki ki he Ngaahi ʻOfaʻanga Kuo Mate,” ko e lea nounou ko ení te ne kamata nai ha fetalanoaʻaki:
◼ “ʻI he ʻosi ʻeta fetalanoaʻaki ki muʻá, naʻá ku tuku atu ʻa e tuleki ko eni Ko e hā ʻa e ʻAmanaki ki he Ngaahi ʻOfaʻanga Kuo Mate? ʻOku langaʻi ʻi he palakalafi tolú ʻa e ngaahi fehuʻi fakatupu tokanga: ‘Ko e hā ʻa e ʻuhinga ʻoku mate ai ʻa e kakai? ʻOku ʻi fē ʻa e kau mate? Pea ʻoku anga-fēfē ʻetau fakapapauʻi te tau toe moʻui?’ Ko e kaveinga tokoni hono hoko maí ʻoku pehē ‘Ko e Mate, mo e Meʻa ʻOku Hoko ʻi Heʻetau Mate,’ ʻokú ne tali ʻa e ngaahi fehuʻi taki taha ko iá. Kuo u toe maʻu mo e tatau ʻe taha ʻo e tulekí. Fakatokangaʻi ʻa e lau ko eni ʻoku ʻasi ʻi he palakalafi fā.” Pea ʻi he muimui ki ai ʻa e tokotaha-ʻapí, lau ʻa e palakalafí, kau ai mo e ongo konga Tohitapu ʻoku fakahā aí, pea ʻeke ki he tokotaha-ʻapí pe ko e hā ʻene fakakaukaú. Fanongo tokanga ki he meʻa te ne leaʻakí, pea hokohoko atu ʻa e talanoa ʻo fakatatau mo ia.
6 Lolotonga ʻa e fetalanoaʻakí, ʻe fakahā nai ʻe he tokotaha-ʻapí ha ngaahi fakakaukau ʻoku ʻikai ke totonu matematē. Nofo pē ʻi he taumuʻa ʻoku fai ki ai ʻa e talanoá, kae ʻoua ʻe fakakikihiʻi ʻa e meʻa kotoa pē te ne leaʻakí. Ko ha ngaahi fakakaukau taʻe faka-Tohitapu ʻokú ne maʻu ʻe toki fakatonutonu ia ki mui ʻi he ngaahi toe foki he kahaʻú.
7 Fakapapauʻi ke ke toe foki ki ha taha mahuʻingaʻia ʻaki hano fai ha ngaahi toe foki faingofua mo ola lelei he lolotonga ʻo ʻEpelelí.