Iku ʻa e Ngaahi Toe ʻAʻahí ki he Ngaahi Ako Tohitapu
1. Ko e hā ʻoku mātuʻaki mahuʻinga ai ʻa e ngāue toe ʻaʻahí?
1 Naʻe fekauʻi ʻe Sīsū ki hono kau muimuí ke ʻoua ʻe ngata pē ʻi he malangá kae pehē foki ke ‘ngaohi ʻa e kau ako, mo akoʻi kinautolu.’ (Mt. 28:19, 20) ʻOku fai ʻe ha tokotaha malanga ha fanongonongo ka ʻoku fai ʻe ha faiako ʻa e meʻa lahi ange. ʻOkú ne fakahinohinoʻi, fakamatalaʻi, pea ʻoatu mo e fakamoʻoni. Ko e founga ʻe taha ʻoku tau akoʻi ai ʻa e niʻihi kehé ko hono fai ʻa e ngaahi toe ʻaʻahi ki he faʻahinga mahuʻingaʻiá fakataha mo ha taumuʻa ke kamata ha ngaahi ako Tohitapu mo kinautolu.
2. Ko hai ʻoku totonu ke tau toe foki ki aí?
2 Ko hai ʻoku totonu ke ke fai ki ai ha ngaahi toe ʻaʻahí? Fakapapauʻi ke toe foki ki he faʻahinga kotoa ʻoku nau tali ʻa e ʻū tohí pe ʻoku nau fakahaaʻi naʻa mo ha kiʻi mahuʻingaʻia ʻi he ongoongo leleí. Kapau ʻokú ke maʻu ha taha mahuʻingaʻia ʻi he faifakamoʻoni ʻi ha feituʻu kakai, feinga ke maʻu ʻa e tuʻasila pe fika telefoni ʻa e tokotahá koeʻuhi ke lava ʻo fakatupulekina ʻa e mahuʻingaʻiá. Hoko ʻo fakatuʻamelie fekauʻaki mo hono kamata ʻa e ngaahi ako Tohitapú. Hokohoko atu ʻa e kumi ki he faʻahinga te nau tali ha tuʻuaki ke ako Tohitapú, pea ʻoku ngalingali te ke maʻu kinautolú.—Mt. 10:11.
3, 4. Ko e hā ʻoku kau ki hono fai ʻa e ngaahi toe ʻaʻahi ola leleí?
3 Fakahāhā ʻa e Mahuʻingaʻia Fakafoʻituitui: Ko e teuteu ki ha toe ʻaʻahi ola leleí ʻoku kamata ia ʻi he ʻuluaki ʻaʻahí. Ko e kau ʻevangeliō lavameʻá ʻoku nau fakatokangaʻi ʻa e ngaahi meʻa ʻoku mahuʻingaʻia ai ʻa e tokotaha-ʻapí, pea ʻoku nau ngāueʻaki ia ko ha makatuʻunga ki ha ngaahi fetalanoaʻaki lahi ange. ʻOku ʻiloʻi ʻe he niʻihi ʻoku ʻaonga ke langaʻi ha foʻi fehuʻi ʻi he fakaʻosinga ʻo e ʻaʻahí koeʻuhi ke fakaʻaiʻai ai ʻa e tokotaha-ʻapí ki he ʻaʻahi hoko maí. Ko ʻetau mahuʻingaʻia moʻoni ʻi he kakaí ʻokú ne hanganaki ʻai ke tau fakakaukau fekauʻaki mo kinautolu naʻa mo e hili ʻetau mavahe mei he matapaá, pea ʻokú ne ueʻi kitautolu ke tau toe foki ki ai ʻo ʻikai toloi. Kapau ʻe ala lava, feinga ke toe foki lolotonga ʻoku ʻikai ke tamatemate ʻa e mahuʻingaʻiá—ʻi loto ʻi ha ʻaho nai ʻe taha pe ua.
4 ʻI hono fai ha toe ʻaʻahi, feinga ke langa hake ʻi hoʻo fetalanoaʻaki ki muʻá. ʻAi ko hoʻo taumuʻá ia ke vahevahe ʻo ʻikai siʻi hifo ʻi ha poini Fakatohitapu fakatupu langa hake ʻe taha ʻi he taimi taki taha, pea loto-lelei ke fanongo. ʻAi ke ke ʻiloʻi lelei ange ʻa e tokotaha-ʻapí. Pea ʻi he ngaahi ʻaʻahi hoko atu aí, vahevahe ʻa e ngaahi moʻoni mei he Folofola ʻa e ʻOtuá ʻa ia ʻoku fekauʻaki hangatonu mo e ngaahi meʻa ʻokú ne tokanga ki aí.
5. Ko e hā ʻa e fakaofiofi faingofua ʻe lava ke ngāueʻaki ki hono kamata ʻa e ngaahi ako Tohitapú?
5 Tokanga ke Kamata ha Ako Tohitapu: Fai ʻa e ngaahi toe ʻaʻahí fakataha mo e taumuʻa ki hono kamata ha ako Tohitapu. ʻE lava fēfē ke fai eni? Fakahaaʻi te ke saiʻia ke vahevahe ha foʻi fakakaukau mahuʻinga, pea fakaava ki ha palakalafi ʻi he tohi ʻIlo pe ko e polosiua Fiemaʻu ʻa ia ʻokú ke fakakaukau ʻe fakamānako ki he tokotahá. Lau ʻa e palakalafí, lāulea ki he fehuʻí, pea fetalanoaʻaki ki ha taha pe ua ʻo e konga Tohitapu ʻoku haá. ʻE lava ke fai eni ʻi he matapaá tonu ʻi he miniti ʻe nima ki he hongofulu. Fakaʻosiʻaki hono langaʻi ʻa e foʻi fehuʻi hokó pea fai ha ngaahi fokotuʻutuʻu ke hokohoko atu ʻa e fetalanoaʻakí ʻi ha toe taimi.
6. ʻE lava fēfē ke tau fakahaaʻi ʻoku tau mahinoʻi ʻa e mahuʻinga ʻo hono fai ʻo e ngaahi toe ʻaʻahí?
6 Ko hono fakatupulekina ʻa e mahuʻingaʻia kotoa ʻoku tau maʻú ko ha tafaʻaki mātuʻaki mahuʻinga ia ʻo ʻetau ngāue fakafaifekaú. Ko ia ai, vaheʻi ʻa e taimi ʻi hoʻo taimi-tēpile fakauiké ki hono fai ʻa e ngaahi toe ʻaʻahí. Ko hono fai iá ʻe fakalahi ai ʻa e ola lelei ʻo hoʻo ngāue fakafaifekaú pea ʻe ʻomai ai ʻa e fiefia moʻoni.