Fakahoko Atu mei he Tulekí ki he Ngaahi Tohi Kehé
1 ʻI he kotoa ʻo e ngaahi makasini kuo pulusi ʻi he ʻaho ní, ko e Ko e Taua Leʻo mo e Awake! pē ʻokú na malava ke tokoni ki he kau lautohi loto-totonú ke maʻu ʻa e hala ki he moʻui taʻengatá. ʻI hoʻo fetalanoaʻaki mo e kakaí he lolotonga ʻo ʻEpeleli mo Mē, ʻe hā mahino ʻenau mahuʻingaʻia ʻi he fanongonongo ʻo e Puleʻangá, pea te ke fakahanga hangatonu ʻenau tokangá ki he makasini fakamuimui tahá pe ko e taha ʻo e ngaahi polosiua fakalanu ʻa e Sōsaietí. Ko ha niʻihi te nau ʻuluaki fakahā ha mahuʻingaʻia siʻisiʻi pē. ʻI he ngaahi tuʻunga pehē, te ke ʻuluaki fai nai ha fetalanoaʻaki ki ha poini ʻe taha pe ua ʻi ha tuleki; pea kapau ʻe fakahā ʻe he tokotaha-ʻapí haʻane toe mahuʻingaʻia, fakahoko atu leva mei he tulekí ki ha makasini pe ko ha polosiua ʻa ia ʻokú ke tuʻuaki.
2 Te ke lea pehē ni nai:
◼ “ʻOku tokolahi ʻa e kakai ʻoku nau loto-tatau ki he pehē, ʻi he māmaní ʻi he ʻahó ni ʻoku toe lahi ange ʻa e ngaahi palopalemá ia ʻi he ngaahi fakaleleiʻangá. ʻOkú ke ʻiloʻi ko e lahi taha ʻo ʻetau ngaahi palopalema lalahí naʻe kikiteʻi ia ʻe he Tohitapú?” Pea te ke toki hukeʻi ki he peesi 4 mo e 5 ʻo e tuleki ʻE Kei Tuʻu ʻa e Māmani ko Ení? ʻo fetalanoaʻaki ʻi ha niʻihi ʻo e ngaahi palopalemá.
3 Kapau ʻokú ke tuʻuaki ʻa e Ko e Taua Leʻo ʻo Māʻasi 1 pea ʻoku hā mai mei he tokotaha-ʻapí ha mahuʻingaʻia ʻi he meʻa ko ia kuó ke lau mei he tulekí, te ke lava ʻo tuhu ki he kaveinga ko ia ʻoku pehē “Ko Hono Fakahoungaʻi ʻa e Meʻaʻofa Maʻongoʻonga ko e Moʻuí” pea ke fakamatala ʻa e foaki-ʻofa ʻa e ʻOtua ko e moʻui taʻengatá ʻo hangē ko ia ʻoku hā ʻi he peesi 6 mo e 7. Pea ke fokotuʻutuʻu ke toe foki ʻi ha taimi faingamālie ke fai ha toe fetalanoaʻaki ki he meʻa ko iá.
4 Kapau ʻoku tuʻuaki ʻa e “Awake!” ʻo ʻEpeleli 8, te ke lava ʻo ngāueʻaki ʻa e lea kamata ʻoku hā ʻi he palakalafi 2 ʻo e kupu ko ení pea ke toe tānaki atu:
◼ “Ko e tokolahi ʻoku nau tālaʻa pe ʻe malava ʻe he ngaahi lotú mo e tuʻunga fakapolitikalé ke ne fakaleleiʻi ʻetau ngaahi palopalemá, pea ʻoku nau toe fifili pe ʻoku maʻu nai ʻe he kau saienisí ʻa e fakaleleiʻangá.” Pea ke lau ha poini feʻunga ʻi he kupu ko e “Can Science Meet the Challenges of the 21st Century?” ʻE fakamānako nai ʻa e kupu ko ení ki he kau talavou tokolahi kae tautefito kiate kinautolu ʻoku kei akó.
5 ʻI hono tuʻuaki ʻo e polosiua ko e “Vakai!” te ke ngāueʻaki ha lea kamata kehe nai:
◼ “ʻOku tokolahi ʻa e kakai ʻoku nau fifili pe ko e hā ʻa e meʻa ʻe hoko kiate kitautolu ʻi heʻetau maté. ʻOku pehē ʻe ha faʻahinga ʻoku tau ō ki hēvani pe ko heli nai; ʻoku kei taʻepau ia ki ha niʻihi. ʻOku fakaofo mo fakapapau ʻa e tali ʻoku fakahā ʻe he Tohitapú.” Pea te ke toki fai nai ha talanoa ki he ngaahi konga ʻo e tuleki Ko e hā ʻa e ʻAmanaki ki he Ngaahi ʻOfaʻanga Kuo Mate? Hili ia pea ke toki sio ki he peesi 16 mo e 17 ʻi he polosiua kapau ʻoku fakahā ʻe he tokotaha-ʻapí ha mahuʻingaʻia ʻi he tulekí.
6 Kapau ko ha tokotaha malanga kei foʻou koe, ʻoku pau te ke houngaʻia ʻi ha lea fakafeʻiloaki faingofua. Ko ia ʻave ha ngaahi tuleki ʻE Kei Tuʻu ʻa e Māmani ko Ení? pea muimui ki he fokotuʻu ko ia ʻoku hā ʻi ʻolunga ʻi he palakalafi 2.
7 Ko hotau monū ia ke ʻoatu ʻa e fanongonongo ʻo e fakamoʻuí ki he ngaahi ʻapi ʻo e kakaí. ʻI heʻetau fekumi kiate kinautolu ʻoku ‘taau moʻoní,’ tau ngāueleleiʻaki ʻetau ngaahi tulekí pea fakahoko mei ai ki he ngaahi tohi kehé ʻi haʻatau maʻu ʻa kinautolu ʻoku mahuʻingaʻiá.—Mt. 10:13.