Ngāueʻaki ʻa e Ngaahi Tulekí ke Kamata ha Ngaahi Fetalanoaʻaki
1 ʻIkai te ke loto-tatau ko hono fai ha fakamoʻoni ola leleí ʻoku fakatuʻunga lahi ia ʻi hoʻo tomuʻa kamata ʻa e ngaahi fetalanoaʻakí? Ko e polé ko hoʻo leaʻaki ha meʻa te ke maʻu ai ʻa e mahuʻingaʻia ʻa e tokotahá pea fakakau mai ia ki ai. Ka ʻe lava fēfē ke ola lelei hono fai ʻení?
2 Kuo ʻiloʻi ʻe he kau malanga tokolahi ko ha ngaahi foʻi lea siʻi pē kuo ʻosi teuteu leleí, ʻo tuʻuaki ha taha ʻo ʻetau ngaahi tuleki makatuʻunga ʻi he Tohitapú ʻe lava ke kamata ai ha ngaahi fetalanoaʻaki. ʻOku fakamānako ʻa e ngaahi kaveingá, pea ko e ngaahi fakatātaá ʻoku fakalanu mo fakaholomamata. ʻOku ʻikai ke lōmekina ʻe ha tuleki ha tokotaha, ʻo ʻoange ai ha ongoʻi ʻoku ʻi ai ha fakamatala lahi ke ne lau. Ka, ko e ngaahi pōpoaki nounou ʻi he ngaahi tulekí ʻoku fakatupu tokanga pea ʻoku lava ke ngāueʻaki ia ke iku atu ai ki ha ako Tohitapu.
3 Ko e founga ʻeni ʻo e ongoʻi fakafoʻituitui ʻa ha Fakamoʻoni ʻe taha: “ʻI he māmani femoʻuekina ko ʻení, ʻoku ʻikai ke faʻa fiemaʻu ʻe he kakaí ke nau fakamoleki ha taimi lahi ke lautohi ai, ka ko e fanga kiʻi tulekí ʻoku lōloa feʻunga pē ke nau ʻoatu ha pōpoaki mahuʻinga kae ʻikai ke fuʻu fuoloa ke fakatafokiʻi mamaʻo ai ʻa e kakaí ki muʻa ke nau vakai ki ai. Naʻá ku lau ʻa e ngaahi tuleki lahi, pea faifai atu pē ʻou ako ʻa e moʻoní.” ʻOua ʻaupito ʻe fakasiʻisiʻi ʻa e mālohi ʻo e Folofola ʻa e ʻOtuá ʻo hangē ko ia ʻoku fakamatalaʻi ʻi he ngaahi pōpoaki nounou ko ʻeni, kuo ʻosi pulusí.—Hep. 4:12.
4 Ngaahi Sitepu Faingofua ʻe Fā: Kuo maʻu ʻe he tokolahi ʻa e lavameʻa ʻi hono ngāueʻaki ha kiʻi fakaofiofi faingofua. (1) Fakahā ki ha tokotaha ha ngaahi tuleki ʻe niʻihi pea ʻeke ange kiate ia pe ko fē ʻa e taha ʻoku mahuʻinga kiate iá. (2) Hili hono fili ʻe he tokotahá ha taha, ʻeke ange ha fehuʻi ʻosi teuteuʻi lelei ʻa ia ʻokú ne fakaeʻa ha poini tefito ʻi he tulekí. (3) ʻI he tali ki he fehuʻí, lau ha palakalafi pe konga Tohitapu feʻungamālie mei he tulekí. (4) Kapau te ke maʻu ha tali lelei, hokohoko atu ʻa e fetalanoaʻakí ʻi he meʻa ʻi loto ʻi he tulekí pe lave ki ha lēsoni ʻi he polosiua Fiemaʻu pe ko ha vahe ʻi he tohi ʻIlo ʻa ia ʻokú ne ʻomai ha ngaahi fakamatala lahi ange. ʻI he founga ko ʻení te ke malava ai ke taki hangatonu atu ai ki ha ako Tohitapu. ʻE tokoniʻi koe ʻe he ngaahi fokotuʻu ʻoku hoko haké ke ke teuteu ʻa e meʻa ke leaʻakí ʻo ngāueʻaki ʻa e ngaahi tuleki ʻe faá.
5 Ko e kaveinga ʻo e tuleki “Ko Hai ʻOkú Ne Puleʻi Moʻoni ʻa e Māmaní?” ʻe fokotuʻu nai ia ko ha foʻi fehuʻi.
◼ Kapau ko e tali ki ai ʻa e tokotaha ko ia ʻokú mo talanoá ʻokú ne pehē ko e “ʻOtua” pe “ʻOku ʻikai te u ʻilo,” lau ʻa e ongo sētesi kamata ʻi he peesi 2 pea mo e ʻuluaki palakalafi ʻi he peesi 3. Fakaeʻa ʻa e 1 Sione 5:19 mo e Fakahā 12:9. Pe ʻoku veiveiua pe ʻikai ʻa e tokotahá ʻo fekauʻaki mo e ʻi ai ʻa Sētane ko e Tēvoló pe lāuʻilo ki heʻene tākiekina ʻa e māmaní, ʻoku lava ke ke ngāueʻaki ʻa e fakaʻuhinga ʻoku maʻu ʻi he kaveinga tokoni “Ko ha ʻIloʻanga ki ai mei he Ngaahi Tuʻunga ʻo e Māmaní” ke hoko atu ʻa e fetalanoaʻakí. Kapau ʻoku hā mai ha mahuʻingaʻia, tuʻuaki ke fakamatalaʻi pe ko e haʻu mei fē ʻa e Tēvoló, ʻo ngāueʻaki ʻa e ngaahi poini ʻi he peesi 3 mo e 4 ʻo e tulekí.
6 Ko e Tuleki “Ko e hā ʻa e ʻAmanaki ki he Ngaahi ʻOfaʻanga Kuo Mate?” te ne langaʻi nai ke vave ʻa e mahuʻingaʻiá. Te ke kamata nai ha fetalanoaʻaki ʻaki haʻo ʻeke:
◼ “ʻOkú ke fakakaukau te tau toe sio ki hotau ngaahi ʻofaʻanga kuo maté?” Hili ʻa e tali mai ʻa e tokotahá, tuhu ki he palakalafi hono ua ʻi he peesi 4 ʻo e tulekí pea lau ʻa e Sione 5:28, 29. Peá ke fakamatalaʻi leva ʻoku tokoni ia ke mahinoʻi ʻa e fakamatala ʻi lalo ʻi he ʻuluaki kaveinga tokoni ʻi he tulekí. Tuʻuaki ke fakamatalaʻi fakataha ia.
7 Ko e tuleki “Fiefia ʻi he Moʻui Fakafāmili” ʻoku fakamānako fakalūkufua ia ki he ngaahi fāmilí. Ko hono ngāueʻaki iá, ʻe lava ke ke pehē:
◼ “Ngalingali te ke loto-tatau ʻoku ʻohofi ʻa e fāmilí ʻi he ʻahó ni. ʻOkú ke fakakaukau ko e hā ʻe lava ke fai ke fakaivimālohiʻiʻaki ʻa e ngaahi haʻi ʻo e fāmilí?” Hili ʻa e tali mai ʻa e tokotahá, fakahanga ʻene tokangá ki he ngaahi poini ʻi he ʻuluaki palakafi ʻi he peesi 6. Toʻo ha taha ʻo e ngaahi konga Tohitapu ʻoku hiki ʻi he peesi 4 mo e 5 ʻo e tulekí, pea fakamatalaʻi ʻa e meʻa ʻoku ʻuhinga ki aí. Pea tuʻuaki leva ha ako Tohitapu taʻetotongi ʻi ʻapi.
8 Ko e tuleki “Ko e ʻUhinga Ke Ke Falala Ai ki he Tohitapu” ʻe ngāueʻaki nai mo e tuʻuaki ko ʻení:
◼ “Kuo fanongo ʻa e tokolahi taha ʻo e kakaí ʻi he talanoa ʻo Keini mo ʻĒpelí, ʻa ia ʻoku maʻu ʻi he ʻuluaki tohi ʻo e Tohitapú. ʻOku toe lave ʻa e fakamatala ʻi he Senesí ki he uaifi ʻo Keiní. Kuó ke fifili pe naʻá ne haʻu mei fē?” Ngāueʻaki ʻa e palakalafi fakamuimui ʻi he peesi 2 ʻo e tulekí ke ʻoatu ʻa e talí. Fakamatalaʻi ʻoku toe fakamatalaʻi ʻe he tulekí ʻa e ngaahi fakamatala mahuʻinga ʻa e Tohitapú ʻo fekauʻaki mo e meʻa ʻoku tukutauhi mai ʻe hotau kahaʻú. ʻI hono kamataʻaki ʻa e palakalafi hono tolu ʻi he peesi 5, hoko atu ʻa e fetalanoaʻakí, ʻo ngāueʻaki ʻa e ngaahi konga Tohitapu ʻokú ne poupouʻí.
9 Ko hono tufaki ʻo e ngaahi tuleki faka-Tohitapú ko ha founga fuoloa, mo ola lelei ia ʻo hono fanongonongo ʻa e ongoongo leleí. Koeʻuhí ʻoku nau faingofua ke toʻotoʻo ʻi ha feituʻu pē te ke ʻalu ki ai, te ke lava ʻo ngāue ola lelei ʻaki kinautolu ʻi hoʻo ngāue matapā-ki-he-matapaá pea ʻi he taimi ʻokú ke faifakamoʻoni ai ʻikai ʻi he founga anga-mahení. ʻOku fakahoko ʻe he ngaahi tulekí ha ngafa mahuʻinga ʻi hono fakahoko ʻo ʻetau ngāue fakafaifekaú. Fakapapauʻi ke toʻotoʻo ha ngaahi tuleki kehekehe, pea ngāueʻaki loto-fiefoaki kinautolu ke kamata ha ngaahi fetalanoaʻaki.—Kol. 4:17.