Ngāueʻaki ʻa e Folofola ʻa e ʻOtuá ʻOku Moʻui Ia!
“Ko e folofola ʻa e ʻOtuá ʻoku moʻui pea ko e koto mālohi.”—HEP. 4:12.
1, 2. Ko e hā naʻe tala ʻe Sihova kia Mōsese ke ne faí, pea ko e hā ʻa e talaʻofa naʻe fai ʻe Sihová?
SIOLOTO ATU ʻoku ʻai ke ke lea ki he tokotaha-pule māʻolunga taha ʻi he māmaní ko ha fakafofonga ʻo e kakai ʻa e ʻOtuá. ʻE anga-fēfē hoʻo ongoʻí? Te ke ongoʻi loto-moʻua, manavasiʻi, pea ʻikai nai lava ke lea. ʻE anga-fēfē haʻo teuteu ʻa e meʻa ke leaʻakí? Te ke malava ke lea mo e mafai ko ha talafekau ʻa e ʻOtuá?
2 Naʻe ʻi he tuʻunga tofu pē ko iá ʻa Mōsese. Ko ha tokotaha anga-fakatōkilalo moʻoni ia. (Nōm. 12:3) Ka naʻe fekau atu ia ʻe Sihova ke lea kia Felo, ko ha tangata anga-kovi ʻaupito mo hīkisia. Naʻe kole ʻe Sihova kia Mōsese ke ʻoatu ha fekau kia Felo. Ko e fekaú ke fakatauʻatāinaʻi ʻa e laui miliona ʻo e kakai ʻa e ʻOtuá mei he nofo pōpulá. (ʻEki. 5:1, 2) ʻE lava ke tau mahinoʻi ʻa e ʻuhinga naʻe ʻeke ai ʻe Mōsese kia Sihova: “Ko hai au ke u ʻalu kia Felo, pea ke u ʻomi ʻa haʻa Isileli mei Isipite?” Naʻe ongoʻi nai ʻe Mōsese naʻe ʻikai ke ne maʻu ʻa e malava ke lea kia Felo. Ka naʻe talaʻofa ʻe Sihova kia Mōsese heʻikai te ne toko taha. “Te u ʻiate koe,” ko e folofola ia ʻa Sihová.—ʻEki. 3:9-12.
3, 4. (a) Ko e hā naʻe manavasiʻi ai ʻa Mōsesé? (e) Ko e hā nai ʻe meimei tatau ai hoʻo ngaahi ongoʻí mo e ongoʻi ʻa Mōsesé?
3 Ko e hā naʻe manavasiʻi ai ʻa Mōsesé? Naʻá ne manavasiʻi naʻa ʻikai tali pe tokanga ʻa Felo ki ha talafekau meia Sihova ko e ʻOtuá. Naʻe toe manavasiʻi ʻa Mōsese naʻa veiveiua ʻa e kau ʻIsilelí pe naʻe fili ia ʻe he ʻOtuá ke ne taki atu kinautolu mei ʻIsipite. Naʻá ne pehē kia Sihova: “Ko eni, ʻe ʻikai te nau tui kiate au, pea ʻe ʻikai te nau tali ʻeku lea; he te nau pehe, Kuo ʻikai ha ʻa Sihova kiate koe.”—ʻEki. 3:15-18; 4:1.
4 Kae fēfē koe? Heʻikai nai ke ke lea ki ha tokotaha-pule māʻolunga. Kae fēfē kapau ʻoku faingataʻa ke ke talanoa ki he kakai ʻi ho feituʻu ngāué fekauʻaki mo Sihova mo hono Puleʻangá? Ko e fekau ʻa Sihova kia Mōsesé mo e meʻa naʻe hoko hili iá ʻe lava ke akoʻi mai ai ha lēsoni mātuʻaki mahuʻinga kia kitautolu.
“KO E HA ENA ʻI HO NIMA?”
5. Ko e hā naʻe ʻoange ʻe Sihova ki he nima ʻo Mōsesé, pea naʻe anga-fēfē hono tokoniʻi ia ʻe he meʻa ko iá ke ne maʻu ʻa e falala-paú? (Sio ki he ʻuluaki fakatātā ʻi he kupú ni.)
5 ʻI he taimi naʻe tala ange ai ʻe Mōsese kia Sihova naʻá ne manavasiʻi naʻa ʻikai tui ʻa e kakaí kiate iá, naʻe teuʻi ʻe he ʻOtuá ʻa Mōsese koeʻuhí ke ne hoko ʻo lavameʻa. ʻOku pehē ʻe he Tohi Tapú: “Pea folofola ʻa Sihova [kia Mōsese], Ko e ha ena ʻi ho nima? Pea ne pehe: Ko e tokotoko. Pea ne folofola mai, Si ia ki lalo. Pea ne si ia ki lalo, pea naʻe hoko ia ko e ngata; pea naʻe hola ʻa Mosese mei ai. Pea folofola ʻa Sihova kia Mosese, Mafao atu ho nima, ʻo puke ʻi hono iku: (pea ne mafao atu hono nima, ʻo ne kuku ia, pea naʻe liliu ia ʻi hono nima ko e tokotoko;) koeʻuhiā ke nau tui kuo ha kiate koe ʻa Sihova.” (ʻEki. 4:2-5) ʻI he mālohi ʻo e ʻOtuá, naʻe hoko ʻa e tokotokó ko ha ngata ʻi he nima ʻo Mōsesé! Ko e mana ko ení naʻe fakamoʻoniʻi ai ko Mōsesé ko e talafekau ʻa e ʻOtuá pea naʻá ne maʻu ʻa e mafaí meiate Ia. Naʻe tala ʻe Sihova kiate ia: “Te ke toʻo ʻa e tokotoko ko ena, pea ko e meʻa ko ia te ke faiʻaki ʻa e ngaahi fakaʻilonga.” (ʻEki. 4:17) ʻI he fakamoʻoni ko ení, naʻe malava ai ʻa Mōsese ʻo maʻu ʻa e falala-pau naʻe fiemaʻú ke ne ʻalu ʻo lea kia Felo pea ki he kakai foki ʻa e ʻOtuá.—ʻEki. 4:29-31; 7:8-13.
6. (a) Ko e hā ʻoku totonu ke ʻi hotau nimá ʻi he taimi ʻoku tau malanga aí, pea ko e hā hono ʻuhingá? (e) Fakamatalaʻi ʻa e founga ‘ʻoku moʻui ai ʻa e folofola ʻa e ʻOtuá’ mo e founga “ko e koto mālohi” ai iá.
6 ʻI he taimi ʻoku tau vahevahe ai ʻa e pōpoaki ʻa e ʻOtuá mo e niʻihi kehé, ko e hā ʻoku tau maʻu ʻi hotau nimá? ʻOku tau maʻu ʻa e Tohi Tapú, pea ʻoku tau vēkeveke ke ngāueʻaki ia. ʻOku fakakaukau ʻa e kakai ʻe niʻihi ko e Tohi Tapú ko ha tohi lelei pē ia. Ka ʻoku mahulu atu ai ʻa e Tohi Tapú. ʻOku maʻu ai ʻa e pōpoaki ʻa e ʻOtuá kia kitautolú. (2 Pita 1:21) ʻOku maʻu ai ʻa e ngaahi talaʻofa ʻa e ʻOtuá pea ʻoku tala mai ai kia kitautolu ʻa e meʻa ʻe fai ʻe hono Puleʻangá. Naʻe tohi ʻe Paula: “Ko e folofola ʻa e ʻOtuá ʻoku moʻui pea ko e koto mālohi.” (Lau ʻa e Hepelū 4:12.) ʻOku anga-fēfē ʻa e moʻui ʻa e folofola ʻa e ʻOtuá? Ko e kotoa ʻo e ngaahi talaʻofa ʻa Sihová ʻoku fakalakalaka atu ki honau fakahokó, pea ʻe lavameʻa fakaʻaufuli ia. (ʻAi. 46:10; 55:11) ʻI he taimi ʻoku mahinoʻi ai ʻe ha taha ʻa e ngaahi moʻoniʻi meʻa ko eni fekauʻaki mo e Folofola ʻa e ʻOtuá, ko e meʻa ʻokú ne lau ʻi he Tohi Tapú ʻe lava ke ueʻi mālohi ai ʻene moʻuí.
7. ʻE lava fēfē ke tau “tofa totonu ʻa e folofola ʻo e moʻoní”?
7 Kuo ʻomai ʻe Sihova kia kitautolu ʻene Folofola moʻuí, ʻa e Tohi Tapú. ʻI he meʻangāue ko ení, ʻe lava ai ke tau fakamoʻoniʻi ko e meʻa ʻoku tau leaʻakí ʻe lava ke falalaʻanga pea ʻoku haʻu ia mei he ʻOtuá. Ko e ʻuhinga ia ʻi he taimi naʻe akoʻi ai ʻe Paula ʻa Tīmoté, naʻá ne fakalototoʻaʻi ia ke “tofa totonu ʻa e folofola ʻo e moʻoní.” (2 Tīm. 2:15) ʻE lava fēfē ke tau ngāueʻaki ʻa e akonaki ʻa Paulá? ʻAki hono filifili lelei ʻa e ngaahi konga Tohi Tapu te tau lau ki he niʻihi kehé. Ko ʻetau taumuʻá ke aʻu ki he loto ʻo e niʻihi ʻoku fanongo mai kia kitautolú. Ko e ngaahi tuleki naʻa tau maʻu ʻi he 2013 naʻe faʻu ia ke ne tokoniʻi kitautolu ke fakahoko ia.
LAU HA KONGA TOHI TAPU KUO FILIFILI LELEI
8. Ko e hā naʻe leaʻaki ʻe he ʻovasia ngāue ʻe taha fekauʻaki mo e ngaahi tulekí?
8 Ko e kotoa ʻo e ngaahi tuleki foʻoú ʻoku nau sīpinga tatau. Ko ia ʻi he taimi ʻoku tau ʻiloʻi ai ʻa e founga ke ngāueʻaki ha taha, ʻoku tau ʻiloʻi ai ʻa e founga ke ngāueʻaki kotoa kinautolú. Naʻe tohi ʻe he ʻovasia ngāue ʻe taha ʻi Hauaiʻi, U.S.A.: “Naʻe ʻikai te mau ʻiloʻi ʻoku fuʻu ola lelei pehē ʻa e ngaahi meʻangāue foʻou ko ení ʻi he ngāue fale-ki-he-falé mo e faifakamoʻoni ki he kakaí.” Ko e hā ʻoku fuʻu faingofua ai ke ngāueʻaki ʻa e ngaahi tulekí? ʻOkú ne ongoʻi koeʻuhí ko e fehuʻi mo e ngaahi tali faingofua ʻoku ʻasi ʻi muʻá. Ko e tokotaha-ʻapí heʻikai te ne hohaʻa fekauʻaki mo hono ʻomai ha tali hala. ʻOku pehē ʻe he tokouá koeʻuhí ko e founga ʻoku hiki ai ʻa e ngaahi tulekí, ko e kakai tokolahi ange ʻoku nau loto-lelei ke talanoa, pea ʻoku taki atu eni ki he ngaahi fetalanoaʻaki lelei.
9, 10. (a) ʻOku anga-fēfē hono faʻu ʻetau ngaahi tulekí ke tokoniʻi kitautolu ke ngāueʻaki ʻa e Tohi Tapú? (e) Ko e ngaahi tuleki fē kuo ola lelei taha hoʻo ngāueʻakí, pea ko e hā hono ʻuhingá?
9 ʻOku maʻu ʻi he tuleki taki taha ha konga Tohi Tapu ʻosi filifili lelei ʻe lava ke tau lau ki he tokotaha-ʻapí. Ko e fakatātaá, ko e tuleki ʻE Toe Ngata Koā ʻa e Faingataʻá? ʻEke ki he tokotaha-ʻapí ʻa e fehuʻi ʻi he takafí. ʻE lava ke ne fili ʻa e tali “io,” “ʻikai,” pe “mahalo pē.” Pe ko e hā pē ʻene talí, huke pē ki loto pea pehē ange leva, “Ko e lau eni ʻa e Tohi Tapú.” Lau leva ʻa e Fakahā 21:3, 4.
10 ʻI he taimi ʻokú ke ngāueʻaki ai ʻa e tuleki ʻOku Fēfē Hoʻo Vakai ki he Tohi Tapú? ʻoku ʻikai mahuʻinga pe ko fē ʻi he tali ʻe tolú ʻoku fili ʻe he tokotaha-ʻapí. Huke pē ki loto ʻi he tulekí pea pehē: “ʻOku pehē ʻe he Tohi Tapú ‘ko e potu Folofola kotoa pē kuo fakamānavaʻi ia ʻe he ʻOtuá.’” ʻE lava ke ke tānaki atu, “Ko hono moʻoní, ʻoku lahi ʻa e meʻa ʻoku leaʻaki ʻe he konga tohi ko iá.” Fakaava leva hoʻo Tohi Tapú, pea lau kotoa ʻa e 2 Tīmote 3:16, 17.
11, 12. (a) ʻI he founga fē ʻe lava ke ke ngāueʻaki ai ʻa e ngaahi tulekí ke ʻai hoʻo ngāue fakafaifekaú ke fakafiefia angé? (e) ʻE lava fēfē ke tokoniʻi koe ʻe he ngaahi tulekí ke ke teuteu ki he ngaahi toe ʻaʻahí?
11 Te ke fili nai ke lau mo fakamatalaʻi lahi ange ʻa e tulekí. ʻE fakatuʻunga eni ʻi he tali ʻa e tokotaha-ʻapí. Kae tatau ai pē pe ko e hā ʻa e tali ʻa e kakaí, kuo nau maʻu ʻa e pōpoakí mei he tulekí, pea kuó ke lau kia kinautolu ha niʻihi ʻo e Folofola ʻa e ʻOtuá. Neongo kapau te ke lau pē ha veesi ʻe taha pe ua ʻi he ʻuluaki taimi ʻokú ke ʻaʻahi ai kia kinautolú, ʻe lava ke ke toe foki ki ai ʻamui ange pea hoko atu ʻa e fetalanoaʻakí.
12 ʻI he tuʻa takafi ʻo e tuleki taki taha ʻoku ʻi ai ʻa e kaveinga tokoni ko e “Ke Fakakaukau ki Ai.” ʻI he kaveinga tokoni ko ení, ʻoku ʻi ai ʻa e ngaahi konga Tohi Tapu mo ha fehuʻi ʻe lava ke lāulea ki ai ʻi ha toe ʻaʻahi. ʻI he tuleki ko e ʻOku Fēfē Hoʻo Vakai ki he Kahaʻú? ʻoku pehē ʻi he fehuʻí: “ʻE liliu fēfē ʻe he ʻOtuá hotau māmaní ki he lelei angé?” ʻOku hā ai ʻa e Mātiu 6:9, 10 mo e Taniela 2:44. ʻI he tuleki ko e ʻE Toe Moʻui Mai Koā ʻa e Kau Maté? ʻoku pehē ʻi he fehuʻí: “Ko e hā ʻoku tau tupu ai ʻo motuʻa pea maté?” ʻOku hā ai ʻa e Sēnesi 3:17-19 mo e Loma 5:12.
13. Fakamatalaʻi ʻa e founga ke ngāueʻaki ai ʻa e ngaahi tulekí ke kamata ha ngaahi ako Tohi Tapu.
13 ʻOku faʻu ʻa e ngaahi tuleki ko ení ke tokoniʻi kitautolu ke kamata ha ngaahi ako Tohi Tapu. ʻE lava ʻe ha taha ʻo sikeni ʻa e kouti ʻi mui ʻi ha tuleki, pea ʻe ʻave hangatonu ai ia ki heʻetau Uepisaití. ʻI aí, ʻe fakaafeʻi ia ke ako ʻa e Tohi Tapú. ʻOku toe hā ʻi he ngaahi tuleki ko ení ʻa e polosiua Ongoongo Lelei mei he ʻOtuá! Ko e tuleki taki taha ʻoku lave ki ha lēsoni ʻi he polosiua ko ení. Ko e fakatātaá, ko e tuleki ko e Ko Hai ʻOkú Ne Puleʻi Moʻoni ʻa e Māmaní? ʻoku taki atu ai ki he lēsoni 5 ʻo e polosiua ko iá. Ko e tuleki ko e Ko e Hā ʻa e Kī ki he Moʻui Fakafāmili Fiefiá? ʻoku taki atu ai ki he lēsoni 9. Ko e ngaahi tuleki ko ení ʻoku faʻu ia ke tokoniʻi kitautolu ke ngāueʻaki ʻa e Tohi Tapú ʻi heʻetau ʻuluaki ʻaʻahí mo e ngaahi toe ʻaʻahí. ʻI he founga ko ení te tau kamata nai ai ha ngaahi ako Tohi Tapu lahi ange. Ko e hā ʻe lava ke ke toe fai ke ngāueʻaki ai ʻa e Folofola ʻa e ʻOtuá ʻi ha founga ola leleí?
LĀULEA KI HA KAVEINGA ʻOKU FAKAKAUKAU KI AI ʻA E KAKAÍ
14, 15. ʻE lava fēfē ke ke faʻifaʻitaki ki he faʻifaʻitakiʻanga ʻa Paulá ʻi hoʻo ngāue fakafaifekaú?
14 Naʻe mātuʻaki mahuʻingaʻia ʻa Paula ʻi hono mahinoʻi ʻa e fakakaukau “ʻa e kakai tokolahi taha ʻe ala lavá” ʻi heʻene ngāue fakafaifekaú. (Lau ʻa e 1 Kolinitō 9:19-23.) Ko e hā hono ʻuhingá? Naʻá ne loto ke tokoniʻi ʻa e “ngaahi faʻahinga kakai kotoa pē,” fakatouʻosi ʻa e kau Siú mo e niʻihi kehé, ke ako ʻa e moʻoní koeʻuhí ke malava ai ʻo fakahaofi kinautolu. (Ngā. 20:21) ʻE lava fēfē ke tau faʻifaʻitaki ki he faʻifaʻitakiʻanga ʻa Paulá ʻi heʻetau teuteu ki he ngāue fakafaifekaú mo e malanga ki he “ngaahi faʻahinga kakai kotoa pē”?—1 Tīm. 2:3, 4.
15 ʻI he māhina taki taha, ʻoku maʻu ʻi he Ko ʻEtau Ngāue Fakafaifekau ʻa e ngaahi fokotuʻu ki he founga ke ʻoatu ai ʻetau pōpoakí. ʻAhiʻahi ngāueʻaki kinautolu. Kae fēfē kapau ko e kakai ʻi ho feituʻu ngāué ʻoku nau hohaʻa fekauʻaki mo ha kaveinga kehe? Teuteu ke leaʻaki ha meʻa te nau mahuʻingaʻia ai. Ko e hā ʻoku hohaʻa ki ai ʻa e kakai takatakai kiate koé? Fili ha konga Tohi Tapu ʻoku felāveʻi mo e kaveinga ko iá. ʻOku fakamatala ha ʻovasia sēketi mo hono uaifí ki he founga ʻoku malava ai ke na ngāueʻaki lahi ange ʻa e Tohi Tapú ʻi heʻena ngāue fakafaifekaú: “Ko e tokolahi taha ʻo e faʻahinga ʻi he ʻapí te nau fakaʻatā kimaua ke lau ha veesi ʻe taha kapau te ma fakanounou pē pea hangatonu ki he poiní. Hili ha lea fakafeʻiloaki anga-maheni mo e Tohi Tapú ʻi homa nimá, ʻokú ma lau ʻa e konga Tohi Tapu.” ʻI he ngaahi palakalafi hoko maí, te tau lāulea ai ki he niʻihi ʻo e ngaahi kaveinga, ngaahi fehuʻi, mo e ngaahi konga Tohi Tapu ʻa ia kuo fakamoʻoniʻi ʻene ola lelei ʻi he ngāue fakafaifekaú. Te ke loto nai ke ʻahiʻahi ngāueʻaki ha niʻihi ʻo kinautolu ʻi ho feituʻu ngāué.
ʻOkú ke ngāueʻaki ola lelei ʻa e Tohi Tapú mo e ngaahi tulekí ʻi hoʻo ngāue fakafaifekaú? (Sio ki he palakalafi 8-13)
16. Fakamatalaʻi ʻa e founga ʻe lava ke ngāueʻaki ai ʻa e ʻAisea 14:7 ʻi he ngāue fakafaifekaú.
16 Kapau ʻokú ke nofo ʻi ha feituʻu ʻoku faihia mo fakamālohi, te ke ʻeke nai ki ha taha: “ʻE lava ke ke sioloto atu ki he ongoongo ko ení ʻoku hā ʻi he peesi ʻuluaki ʻo ha nusipepa: ‘ʻOku malōlō ʻa mamani katoa, ʻoku nonga, ʻoku nau pa mavava’? Ko e meʻa ia ʻoku leaʻaki ʻe he Tohi Tapú ʻi he ʻAisea 14:7. Ko e moʻoni, ʻoku maʻu ʻi he Tohi Tapú ʻa e ngaahi talaʻofa lahi ʻa e ʻOtuá fekauʻaki mo ha taimi nonga ʻe vavé ni ke hoko mai.” Fakahaaʻi ange leva te ke lau ha taha ʻo e ngaahi talaʻofa ko iá mei he Tohi Tapú.
17. ʻE lava fēfē ke tau ngāueʻaki ʻa e Mātiu 5:3 ʻi ha fetalanoaʻakí?
17 ʻOku faingataʻa ki he kakai tangata tokolahi ʻi ho feituʻú ke tokonaki maʻa honau ngaahi fāmilí? Kapau ko ia, te ke kamata nai ha fetalanoaʻaki ʻaki hoʻo ʻeke: “Ko e hā ʻa e lahi ʻo e paʻanga ʻoku fiemaʻu ʻe ha tangata koeʻuhí ke hoko ʻo fiefia ai hono fāmilí?” Hili ʻa e tali ʻa e tokotahá, te ke pehē nai: “ʻOku maʻu ʻe he kakai tangata tokolahi ʻa e paʻanga lahi ange ia ai, ka ʻoku kei taʻetopono pē honau ngaahi fāmilí. Ko ia, ko e hā ʻa e meʻa ʻoku fiemaʻu moʻoní?” Lau leva ʻa e Mātiu 5:3 pea tuʻuaki ha ako Tohi Tapu.
18. Ke fakafiemālieʻi ʻa e niʻihi kehé, ʻe lava fēfē ke ke ngāueʻaki ʻa e Selemaia 29:11?
18 ʻOku faingataʻaʻia ʻa e kakai ʻi ho feituʻú koeʻuhí ko e hoko ha fakatamaki ki muí ni mai? ʻE lava ke ke kamata ha fetalanoaʻaki ʻaki hoʻo pehē: “Ko ʻeku haʻú ke ʻoatu ha fakafiemālie. (Lau ʻa e Selemaia 29:11.) Naʻá ke fakatokangaʻi ʻa e meʻa ʻe tolu ʻoku fiemaʻu ʻe he ʻOtuá maʻa kitautolú? Ko e ‘fakakaukau lelei,’ ko ha ‘ʻamui,’ mo ha ‘ʻamanaki.’ ʻOku lelei ke ʻiloʻi ʻokú ne fiemaʻu ke tau maʻu ha moʻui lelei. Ka ʻe malava fēfē ia?” Huke leva ki ha lēsoni feʻungamālie ʻi he polosiua Ongoongo Lelei.
19. Fakamatalaʻi ʻa e founga ʻe lava ke ngāueʻaki ai ʻa e Fakahā 14:6, 7 ʻi he talanoa mo e kakai ʻoku nau mahuʻingaʻia ʻi he lotú.
19 ʻOkú ke nofo ʻi ha feituʻu ʻoku mahuʻingaʻia ai ʻa e kakaí ʻi he lotú? Kapau ko ia, te ke kamata nai ha fetalanoaʻaki ʻaki hoʻo ʻeke: “Kapau ʻe lea atu ha ʻāngelo kiate koe, te ke fanongo ki he meʻa te ne tala atú? (Lau ʻa e Fakahā 14:6, 7.) ʻOku pehē ʻe he ʻāngeló ‘manavahē ki he ʻOtuá,’ ko ia ko hai ʻa e ʻOtua naʻá ne lave ki aí? ‘Ki he Tokotaha naʻá ne ngaohi ʻa e langí pea mo e māmaní.’ Ko hai ia?” Lau leva ʻa e Saame 124:8, ʻa ia ʻoku pehē: “Ko hotau tokoni ʻoku ʻi he huafa ʻo Sihova, ʻa ia ne ne ngaohi ʻa e langi mo e fonua.” Fakahaaʻi ange leva pe te ke fakamatala lahi ange kia Sihova ko e ʻOtuá.
20. (a) ʻE lava fēfē ke ngāueʻaki ʻa e Palōveepi 30:4 ke akoʻi ki ha taha ʻa e huafa ʻo e ʻOtuá? (e) Ko e hā ʻa e konga Tohi Tapu kuo ola lelei hoʻo ngāueʻaki ʻi he ngāue fakafaifekaú?
20 Te ke kamata nai ha fetalanoaʻaki mo ha tokotaha kei siʻi ʻaki hoʻo pehē: “Te u saiʻia ke lau ha konga Tohi Tapu ʻa ia ʻoku ʻeke ai ha fehuʻi mātuʻaki mahuʻinga. (Lau ʻa e Palōveepi 30:4.) ʻOku ʻikai lava ʻe ha tangata ke fai ʻa e ngaahi meʻá ni, ko ia ko e veesi ko ení kuo pau ʻoku lave ia ki hotau Tokotaha-Fakatupú.a ʻE lava fēfē ke tau ʻiloʻi ʻa hono huafá? Te u fiefia ke fakahaaʻi atu ia ʻi he Tohi Tapú.”
NGĀUEʻAKI ʻA E MĀLOHI ʻO E FOLOFOLA ʻA E ʻOTUÁ ʻI HOʻO NGĀUE FAKAFAIFEKAÚ
21, 22. (a) ʻE lava fēfē ke liliu ʻe ha konga Tohi Tapu kuo filifili lelei ha moʻui ʻa ha taha? (e) Ko e hā ʻokú ke fakapapauʻi ke fai ʻi he ngāue fakafaifekaú?
21 Heʻikai ʻaupito te ke ʻilo ʻa e anga ʻo e tali ʻa e kakaí ki ha konga Tohi Tapu ʻa ia kuo filifili lelei. Ko e fakatātaá, ko e Fakamoʻoni ʻe toko ua ʻi ʻAositelēlia naʻá na tukituki ʻi ha matapā ʻo ha fefine kei siʻi. Ko e taha ʻo kinaua naʻá ne ʻeke ange, “ʻOkú ke ʻilo ʻa e huafa ʻo e ʻOtuá?” pea lau leva ʻa e Saame 83:18. “Naʻá ku ʻohovale ʻaupito!” ko e lea ia ʻa e fefiné. “Hili ʻena mavahé, naʻá ku fakaʻuli ʻi he kilomita ʻe 56 (maile ʻe 35) ki ha fale-tohi ke vakaiʻi ʻa e ngaahi liliu Tohi Tapu kehé pea kumi leva ʻa e huafá ʻi ha tikisinale. ʻI heʻeku tuipau ko e huafa ʻo e ʻOtuá ko Sihová, naʻá ku fifili pe ko e hā ha toe meʻa naʻe ʻikai te u ʻilo.” Naʻe vave ʻa ʻene kamata ako Tohi Tapu mo hono husepāniti ʻi he kahaʻú, pea ki mui ai naʻá na papitaiso.
22 Ko e Folofola ʻa e ʻOtuá ʻoku ʻi ai hono mālohi ke liliu e moʻui ʻa e kakaí. ʻI he taimi ʻoku lau ai ʻe ha taha ʻa e Tohi Tapú, ʻe lava ke ne fakatupulekina ha tui mālohi ki he ngaahi talaʻofa ʻa Sihová. ʻE ueʻi ia ʻe he tui ko ení ke ne ngāueʻaki ʻa e meʻa ʻokú ne akó. (Lau ʻa e 1 Tesalonaika 2:13.) Ko e pōpoaki ʻa e Tohi Tapú ʻoku mālohi ange ia ʻi ha meʻa pē ʻe faifai ange ʻo lava ke tau leaʻaki. Ko ia tau fakapapauʻi ke ngāueʻaki ʻa e Folofola ʻa e ʻOtuá ʻi heʻetau ngāue fakafaifekaú ʻi he lahi taha ʻe ala lavá. ʻOku moʻui ia!
a Sio ki he Taua Leʻo ʻo Mē 15, 2002, peesi 5.