Tulitāupau ki he Ngaahi Ngāue Fakateokalatí he Lolotonga ʻa e Taimi Mālōloó
1 ʻOku fakahoko mai ʻe he taimi mālōloó ʻa e ngaahi faingamālie lahi ke kau ai ki he ngaahi ngāue kehekehe. Ko e tokolahi taha ʻo kitautolú ʻoku tau saiʻia ke fakaʻaongaʻi ʻetau mālōloó ʻaki hono fai ha meʻa kehe mei he ngāue ʻoku faʻa faí pea maʻu ai ha mālōlō. Kae kehe, ʻoku totonu ke tau tokanga telia naʻa tau fakaʻatā ke veuveuki ai ʻa ʻetau ngāue fakateokalati ʻoku fai tuʻumaʻú.—Fili. 3:16.
2 ʻOku tau vēkeveke ʻo fakatuʻamelie atu ki he fakataha fakavahe ʻoku fai ʻi he taʻu kotoa pē. Kuó ke fakaangaanga pau ke ke maʻu ia, ʻo fai ha fokotuʻutuʻu ki he meʻalelé pea mo e nofoʻangá ʻo ka fie maʻu? Kuó ke fakakaukau ke fakakau mai ha taha kehe mei hoʻo fakatahaʻangá ʻokú ne fie maʻu nai ha tokoni fakafoʻituitui? Ko hono fakahā lelei ʻo e anga-ʻofa peheé ʻe maʻu nai ai ʻa e ngaahi tāpuakí ki he faʻahi ʻe ua.
3 Kapau te ke ʻatā, ʻo hangē ko e lolotonga ʻa e tutuku ʻa e akó, kuó ke fakakaukau ʻo kau ki he kakapa atu ke kau lahi ange ki he ngāue fakamalangá? Kuo ʻilo ʻe he tokolahi ko e taimi lelei ʻa e tutuku ʻa e akó ke nau kole ai ke hoko ko e kau tāimuʻa fakataimi. Kuo faʻa fakaʻatā mai ʻe he meʻá ni ʻa e ngaahi monū lahi ange ʻi he ngāue ʻa Sihová. ʻE lava ke maʻu ʻa e fiefia lahi ʻaupito ʻe he ngaahi fāmilí ʻi he ngāue fakamalangá ʻi heʻenau ngāue fakataha ai ʻi ha ngaahi ʻaho kakato. Tatau ai pē pe ko e hā ʻa e tuʻunga ʻokú ke ʻi aí, te ke lava ke fakalahi ange ʻa e taimi kuó ke fakamoleki ʻi he ngāue fakamalangá? ʻOku totonu ke maʻu ʻe he tokolahi ange ʻa e ngaahi ʻaonga mei he kau ʻi he ngāue fakamalangá ʻi he efiafí.
4 Fēfē ke tokoni atu ki ha fakatahaʻanga ʻoku fie maʻu ki ai ha tokoni ke aʻu ki he ngaahi feituʻu kotoa pē kuo vaheʻi ki aí? ʻE ʻi ai nai ha niʻihi kehe ʻi hoʻo fakatahaʻangá te nau saiʻia ke ʻalu fakataha mo koe ʻi he uike ʻe taha pe ua ke fai ha ngāue ʻi ha feituʻu ʻoku lahi ange ai ʻa e fie maʻú. Kapau ʻoku tokosiʻi ʻa e faʻahinga te nau fie ʻalu mo koé, mahalo pē ʻe saiʻia ʻa e kau malanga ʻe niʻihi mei he fakatahaʻanga hono hokó ke ʻalu mo kimoutolu. Kapau ʻoku fakangatangata pē ʻa e mamaʻo te ke lava ke fononga aí, ʻe fokotuʻu mai nai ʻe he ʻovasia fakafeituʻú ha fakatahaʻanga ofi mai ʻa ia te nau houngaʻia ʻi hoʻo tokoní.
5 ʻOkú ke fakaangaanga ke ʻalu ʻo ʻeva mālōlō ki ha feituʻu kehe? Kapau ko ia, ʻokú ke fakaangaanga ke maʻu ʻa e ngaahi fakataha ʻi he feituʻu te ke ʻaʻahi ki aí? Fēfē ke ngāue fakataha mo e ngaahi tokoua aí ʻi he ngāue fakamalangá? Ko hono fakakau ʻeni ki hoʻo ʻeva mālōloó ʻe hoko ʻo fuʻu lelei kiate koe mo e niʻihi kehe. (Loma 1:11, 12) ʻIkai ke ngata aí, ʻe lava ke ke fai fakamoʻoni ʻikai ʻi he founga mahení he lolotonga hoʻo folaú? ʻAi ke fakapapauʻi kuó ke ʻalu mo hoʻo Tohi Tapú mo e ngaahi tohi kehe ʻe niʻihi. Ngāueʻaki ha konga ʻe niʻihi ʻo ho taimi ʻokú ke ʻatā aí ke lau ha meʻa pe fai hoʻo ako ʻi he Tohi Tapú ʻa ia naʻe totonu ke ke fai ki muʻa atú. Manatuʻi, neongo ʻoku fie maʻu kiate kitautolu ʻi he taimi ʻe niʻihi ha ʻeva mālōlō mei he ngāue fakamāmaní, ka ʻoku ʻikai totonu ke tau toʻo atu ha faʻahinga taimi mei heʻetau ngāue kia Sihová.
6 ʻOku totonu ke tokanga ʻa e kau mātuʻá ke maau ʻaupito maʻu ai pē ʻa e ngāue ʻa e fakatahaʻangá. Kapau ʻe ʻalu ha taha ʻo e kau mātuʻá pe ko ha taha ʻo e kau sevānití ki ha feituʻu, ʻoku totonu ke fai ha ngaahi fokotuʻutuʻu ke tokangaʻi honau ngaahi fatongiá. Ko hono tomuʻa fakahā ʻi ha taimi feʻunga ki muʻa ki he ʻovasia pulé ʻa e taimi ʻe mamaʻo ai ʻa e ngaahi tokoua ko ení, ʻe tokoniʻi ai ia ke ne fakapapauʻi ke fai ha ngaahi liliu ʻe feʻunga mālié.
7 ʻIo, ʻe lava ke hoko ʻa e taimi mālōloó ko e vahaʻa taimi femoʻuekina ʻaupito. Ka ʻe lava ke veuveuki faingofua ʻe he ngaahi meʻa ʻoku nau fakaleluʻi kitá ʻa e ngāue fakamalanga fekauʻaki mo e Puleʻangá ʻoku lelei ʻa hoʻo angaʻaki hono fai tuʻumaʻú. Ngāueʻaongaʻaki ʻa ho ngaahi faingamālie he lolotonga ʻa e taimi mālōloó. ʻAi ke fakapapauʻi ʻa e ngaahi meʻa fakalaumālie mo totonu ke ke fakamuʻomuʻá, pea piki maʻu leva kiate kinautolu.—Fili. 1:10.