Ko e Hā Hoʻo Ngaahi Palani ki he Faʻahitaʻu ʻAfuá?
1 ʻIkai ʻoku moʻoni ʻoku ngalingali ʻe ʻikai te tau aʻusia ʻetau ngaahi taumuʻa mahuʻingá ʻi he taimi ʻoku tau palani ai ʻa e founga lelei taha ke ngāueʻaki ai ʻa e taimi ʻoku tau ala maʻú? ʻOku ʻomai ʻe he faʻahitaʻu ʻafuá maʻatautolu ha ngaahi faingamālie kehekehe ke fakamuʻomuʻa ai ʻa e ngaahi mahuʻingaʻia fakateokalatí. (Pal. 21:5) Ko e hā ʻa e niʻihi ʻo e ngaahi meʻá ni?
2 Ko e Fakataha-Lahi “Founga ʻa e ʻOtuá ki he Moʻuí” ko e taha ia ʻo e meʻa ʻoku totonu kiate kitautolu kotoa ke fakakau ʻi heʻetau ngaahi palaní. ʻOku ʻi ai ʻa e kau fakafofonga kuo fili ʻa ia te nau maʻu ʻa e ngaahi fakataha-lahi fakavahaʻapuleʻanga ʻi mulí. ʻI ʻAokosí, te tau fai ai ha fakataha-lahi fakavahe fakalotofonua. Fokotuʻutuʻu ʻa e taimi mālōlō mei he ngāué mo e akó koeʻuhí ke ke ʻi ai ʻi he ʻaho taki taha ʻo e fakataha-lahí. Kapau ʻoku fiemaʻu, fokotuʻutuʻu fakalelei ki ho nofoʻangá pea ki hoʻo folaú ki muʻa.
3 Fēfē ke palani ke fakatupulekina hoʻo ngāue fakamalangá he lolotonga ʻo e faʻahitaʻu ʻafuá? Ko e siʻi ange ʻo e ngaahi ʻaho ʻuhá mo e hauhau ʻi he ʻeá ʻokú ne fakaʻatā nai ai koe ke ke fakamoleki ʻa e taimi lahi ange ʻi he ngāue fakamalangá. Ko e tutuku ʻa e akó ʻoku maʻu ai ʻa e faingamālie ʻe he toʻutupú ke ngāue tāimuʻa tokoni he lolotonga ʻo e māhina ʻe taha pe lahi ange hoko maí. ʻE toe lava ʻa e niʻihi kehé ke palani ki muʻa ke ngāue tāimuʻa tokoni ʻi ʻAokosi, he ʻe ʻi ai ʻa e fakaʻosinga ʻo e uike kakato ʻe nima. ʻI ʻAokosi ko ení, ʻi heʻetau fakaʻosi ʻa e taʻu fakangāué, ko ha feinga fakataha ʻe fai ʻe he tokotaha kotoa pē ke kau kakato ʻo ka malava ki he ngāue fakafaifekaú.
4 ʻOkú ke palani ke tokoni ki ha fakatahaʻanga ofi mai ʻoku fiemaʻu tokoni ki hono ngāueʻi honau feituʻú? ʻE lava ʻe he ʻovasia fakafeituʻú ʻo fakahā ki he kau mātuʻá ʻo kau ki he ngaahi fiemaʻu ʻi ho feituʻú. Pe, kapau ʻokú ke taau pea te ke saiʻia ke kole ki he Sōsaietí ke ngāueʻi ʻa e feituʻu ʻoku tātātaha ke ngāueʻí pe teʻeki ke vaheʻí, maʻu ha tohi kole mei hoʻo kau mātuʻá. Kapau te ke mālōlō ʻo mavahe mei ʻapi, palani ke maʻu ʻa e ngaahi fakatahá pea kau ki he ngāue fakamalangá fakataha mo e fakatahaʻanga ʻi he feituʻu ko iá. Kapau ʻokú ke ʻaʻahi ki ha ngaahi kāinga ʻoku ʻikai ko e Kau Fakamoʻoni ʻa Sihova, teuteu ki muʻa ha ngaahi founga te ke vahevahe nai ai ʻa e moʻoní mo kinautolu.
5 Ko e hā hoʻo ngaahi palani ki he faʻahitaʻu ʻafuá? ʻOku ʻikai ha veiveiua ʻokú ke fiemaʻu ke mālōlō lelei ho sinó. Kae ʻoua ʻe tukunoaʻi ʻa e ngaahi faingamālie mahuʻinga ange ʻoku ʻi aí ke fakaivimoʻuiʻi fakalaumālie koe ʻaki ʻa e hokohoko atu ke fakamuʻomuʻa ʻa e Puleʻangá ʻi hoʻo moʻuí.—Mt. 6:33; Ef. 5:15, 16.