ʻOkú Ke Tūtuuʻi ʻo Fuʻu Hulu?
1 ʻOku ʻi ai ʻa e palōvepi: “Ko e lahi ange ʻa hoʻo feinga ʻi hono fai ha meʻa, ko e toe lahi ange ia ʻa e ʻaonga te ke maʻú.” ʻOku moʻoni ʻeni tautautefito ʻi he fekauʻaki mo ʻetau lotú. Ko e lahi ange ʻa e taimi mo e feinga ʻoku tau fai ke teuteu ai ki he ngaahi fakatahá, malangaʻi ʻa e pōpoaki fekauʻaki mo e Puleʻangá, pea mo hono fakahā ʻa e ʻofa ki hotau ngaahi tokouá, ko e toe lahi ange ai pē ia ʻo ʻetau tupu fakalaumālié. ʻOku toe moʻoni foki ʻa e tuʻunga ʻoku fehangahangai mo iá. Kapau ʻoku ʻikai te tau loto-lelei ke ngāue tōtōivi pe ʻoku tau fakapāpākū ʻi he meʻa ʻoku tau faí, ʻe malava ke tau ʻamanekina moʻoni ke maʻu ha ngaahi ola fakafiemālie?
2 Naʻe mālie ʻa e lea ʻa e ʻaposetolo ko Paulá ʻo kau ki he tefitoʻi moʻoni ko ia ʻi he 2 Kolinitō 9:6: “Kae manatu, Ko ia ʻoku fakakaisiʻi ʻene fakaheka ʻe fakakaisiʻi foki ʻene utu mai: pea ko ia ʻoku fakakailahi ʻene fakaheka ʻe fakakailahi foki ʻene utu mai.” ʻOkú ke tūtuuʻi ʻo fuʻu hulu?
3 Ako Tohi Tapu Fakafoʻituitui: Ke tau hoko ko e kau faifekau fua lelei, kuo pau ke tau ʻuluaki tūtuuʻi ʻo fuʻu hulu ʻi heʻetau ako fakafoʻituituí. ʻOku totonu ke tau mātuʻaki fie kai ʻa e ngaahi meʻa fakalaumālié. (Sāme 119:97, 105; Mt. 5:3) Koeʻuhi ʻoku fie maʻu ke fai leva ha ngāue ki he ngaahi meʻa ʻoku tau tokanga ki ai ʻi he moʻui fakaʻahó, ʻoku pau ke fai fakakaukauʻi ha feinga ke fakatupu ʻa e lāuʻilo moʻoni fekauʻaki mo ʻetau fie maʻu fakalaumālié. Ko e tokolahi taha ʻo kitautolu, ʻoku fie maʻu ʻe he meʻá ni ke “toʻo ha taimi mei he ngaahi ngāue kehé.” (ʻEf. 5:16, NW) Ko e faʻahinga ʻe niʻihi kuo nau fokotuʻutuʻu ke mālanga hake pongipongia ange ʻi he ʻaho ʻe niʻihi ke fai ʻa e ako fakafoʻituituí. Kuo vaheʻi ʻe he faʻahinga kehe ʻa e ngaahi efiafi poʻuli ʻe niʻihi ki he taumuʻa ko ʻení. ʻI he founga fē ʻoku tau utu ʻo fuʻu hulu mai aí? ʻOku tau maʻu ʻa e tui mālohi ange, ʻa e ʻamanaki lelei ange, mo e anga ʻo e fakakaukau ʻoku fiefia mo pau ange.—Loma 10:17; 15:4; 1 Pita 1:13.
4 Ngaahi Fakataha ʻa e Fakatahaʻangá: ʻI he Sāme 122:1 naʻe pehē ai ʻe Tēvita: “Ne u fiefia ʻi heʻenau pehe kia kita, “Tau o ki he fale ʻo Sihova.” ʻOkú ke maʻu ʻa e ongoʻi tatau mo ia? ʻOku ʻuhinga ʻa e tūtuuʻi ʻo fuʻu hulú ki he maʻu maʻu pē ʻa e ngaahi fakataha ʻe nima fakauiké. Fakapapauʻi pē ʻiate koe ʻe ʻikai te ke tuku ʻa e ʻea koví ke ne taʻofi koe. ʻOku faʻa hoko, ko e lahi ange ʻetau lavaʻi ʻe kitautolu ʻa e ngaahi faingataʻaʻiaʻangá, ko e toe lahi ange ia ʻa e ngaahi tāpuaki te tau maʻú.
5 ʻAi ke tōmuʻa hoʻo haʻú pea ke kiʻi nofo fuoloa ange ʻi he ʻosi ʻa e fakatahá ke kau ki ha fetalanoaʻaki fakatupu langa hake fakataha mo ho ngaahi tokouá. ʻAi ke fano atu hoʻo feohí ke fakakau ki ai ʻa e faʻahinga kehe lahi taha te ke malavá. Teuteu lelei ki he Ako Taua Leʻó mo e ngaahi fakataha kehé koeʻuhi ke ke tūtuuʻi ʻo fuʻu hulu ʻaki hono fai ha tali ʻo fakatatau ki he faingamālie te ke maʻú. ʻI hoʻo faʻa “fakaviviku” ʻa e faʻahinga kehe ʻi he lolotonga ʻa e ngaahi fakatahá, ʻe toe faʻa “fakaviviku” mai mo koe foki.—Pal. 11:25.
6 Ngāue Fakamalangá: Ko e tefitoʻi moʻoni ko ʻeni fekauʻaki mo e tūtuuʻi ʻo fuʻu hulú ʻoku lahi taha nai hono moʻoní fekauʻaki mo e ngāue fakamalangá. Ko e lahi ange ʻa e taimi ʻoku tau fakamoleki ki aí, ʻoku ngalingali te tau utu mai ʻo toe lahi ange ai ʻa e ngaahi meʻa te tau hokosiá, ko e ngaahi toe ʻaʻahi ʻoku fua leleí, mo e ngaahi ako Tohi Tapu ola leleí.
7 ʻOku kau ki he tūtuuʻi ʻo fuʻu hulu ʻi he ngāue fakamalangá ʻa hono tuʻunga leleí pea mo hono lahí foki. Ko e tohi Reasoning ko e tokoni mātuʻaki lelei ia ke tokoniʻi kitautolu ke ʻai ke tupu ange ʻa e tuʻunga lelei ʻo ʻetau ngāue fakamalangá. ʻOku fakahokohoko ʻi he peesi 9-15 ʻa e ngaahi lea kamata lahi hake he 40 ʻoku nau lave ki he ngaahi kaveinga ʻe 18 ke tokoni ke fakatupu ʻa e fie fanongó ʻi he ngaahi ʻapí. Kapau te ke maʻu ha toko taha fie fanongo, fakapapauʻi ke hiki ha nouti ʻo kau kiate ia koeʻuhi ke ke toe ʻaʻahi ki ai pea ke utu mai ʻa e fua ʻo hoʻo tūtūʻí. ʻOfa pē ʻe iku ʻa hoʻo ngaahi feingá ki ha ako Tohi Tapu, pea ke malava ke akoʻi ki ha toko taha kehe ʻa e founga ke tūtuuʻi ai ʻo fuʻu hulu.
8 Kapau te tau tūtuuʻi ʻo fuʻu hulu, te tau ʻamanekina ke maʻu ʻa e ngaahi tāpuaki lahi ange meia Sihova.—Mal. 3:10.