Ko e Tūtuuʻi Lahí ʻOku ʻOmai Ai ʻa e Ngaahi Tāpuaki Lahi
1 Ko kitautolu kotoa ʻoku tau fakatuʻotuʻa atu ki hono fakahoko ʻo e ngaahi tāpuaki maʻongoʻonga ʻoku ʻi he Folofola ʻa e ʻOtuá. Naʻa mo e taimí ni, ʻoku ʻai ʻe Sihova ke ala maʻu ʻa e ngaahi tāpuaki lahi ʻa ia ʻokú ne tānaki mai ʻa e fiefia ki heʻetau moʻuí. Kae kehe, ko e lahi ʻo ʻetau maʻu ʻaonga fakafoʻituituí, ʻoku fakatuʻunga lahi ia ʻi he feinga ʻoku tau faí. Hangē ko ia ko hono fakalea ia ʻe he ʻapositolo ko Paulá, “ko ia oku tūtūi lahi, e utu lahi foki.” (2 Kol. 9:6, PM) Fakakaukau atu ki he ongo tafaʻaki ʻe ua ʻa ia ʻoku ngāueʻaki ki ai ʻa e tefitoʻi moʻoni ko ení.
2 Ko ʻEtau Ngāue Fakafaifekau Fakafoʻituituí: Ko hono vahevahe atu ʻa e ongoongo leleí ki he kakaí ʻi heʻene ʻi hotau mālohí ke fai ha fakamoʻoní ʻoku ʻomai ai ʻa e ngaahi pale lahi. (Pal. 3:27, 28) ʻOku taau ke fakaongoongoleleiʻi, ʻoku tūtuuʻi lahi ʻa e tokolahi ʻaki hono fakalahi ʻenau kau ʻi he ngāue fakafaifekaú, ʻo kau ai ʻa e ngāue tāimuʻa tokoní pe tāimuʻa tuʻumaʻú. Ko kitautolu kotoa ʻe lava ke tau tūtuuʻi lahi ʻaki ʻa e toe foki tōtōivi ke fakatupulekina ʻa e mahuʻingaʻia kotoa pē ʻoku maʻú pea ʻi hono tuʻuaki ha ako Tohitapu ʻi ha taimi pē ʻoku faingamālie ai. (Loma 12:11) Ko ʻetau ngāue mālohi ʻi he ngaahi founga ko ení ʻe iku ia ki he hokosia ʻo e ngaahi meʻa fakatupu langa hake pea fakatupulekina ai ʻetau fiefia ʻi heʻetau ngāue fakafaifekaú.
3 Poupouʻi ʻa e Ngaahi Meʻa ʻo e Puleʻangá: Naʻe fai ʻe Paula ʻa ʻene fakamatala fekauʻaki mo e ‘tūtūi lahí’ ʻi he fekauʻaki mo e foaki fakamatelié. (2 Kol. 9:6, 7, 11, 13, PM) ʻI he ʻahó ni, ʻoku lahi ʻa e meʻa ʻe lava ke tau fai ʻi ha founga fakaesino mo fakamatelie ke poupouʻi ʻa e ngaahi meʻa ʻo e Puleʻangá. ʻE lava ke tau tokoni ʻi hono langa ʻa e ngaahi Fale Fakatahaʻangá mo e ngaahi Holo ʻAsemipilií. ʻE toe lava ke tau fakafaingamālieʻi kitautolu ke kau ʻi hono fakamaʻa mo hono tauhi ʻa e ngaahi feituʻu ko eni ki he lotu moʻoní. Tānaki atu ki ai, ʻe lava ke tau tokoni fakapaʻanga ki he ngaahi fakamole ʻa e fakatahaʻanga fakalotofonuá pea pehē ki he ngāue malangaʻi ʻo e Puleʻangá mo e ngaohi-ākonga ʻi māmani lahí. ʻI heʻetau fai kotoa ʻetau tafaʻakí, he fiefia ē ko kitautolu ke sio ki he tāpuaki lahi ʻa Sihová ʻi he ngāue ko eni kuo hilifaki mai ʻe he ʻOtuá!—Mal. 3:10; Luke 6:38.
4 ʻOku naʻinaʻi mai kia kitautolu ʻa e Folofola ʻa e ʻOtuá ‘ke tau ngāue ʻaonga, ke tau koloaʻia ʻi he ngāue lelei, ke tau nimahomo ʻo ʻangafietokoni.’ ʻI heʻetau tokanga ki he enginaki ko iá, ʻoku tau maʻu ai ʻa e ngaahi tāpuaki lahi he taimí ni. ʻI he taimi tatau, ʻoku tau “faʻoaki ai [maʻatautolu] ha tuʻunga lelei ki he ʻamui [mo e] moʻui moʻoni” ka hoko maí.—1 Tim. 6:18, 19.