Ko Hono Tokoniʻi ʻa e Niʻihi Kehé ke Nau Fakalāngilangiʻi Hotau Toko Taha Ngaohí
1 ʻOku tau ongoʻi nai ʻo hangē ko ia ko e tangata tohi sāmé ʻi heʻene pehē: “ʻE Sihova, . . . ko e matavai ʻo e moʻui ʻoku ʻi he ʻAfiona”? (Sāme 36:5, 9) Ko e hā ʻa e meʻa te tau fai ke tokoniʻi ʻa e niʻihi kehé ke nau houngaʻia pea fakahā ʻa e fakalāngilangí kia Sihova ko hotau Toko Taha Fakatupú? Te tau tuʻuaki atu ʻa e “Vakai! ʻOku Ou Fakafoʻou ʻa e Meʻa Kotoa Pe” ʻi he lolotonga ʻo Suné. Ko e polosiuá ni ʻoku tuʻu-ki-muʻa moʻoni ʻi hono tokonaki mai ai ʻa e fakamoʻoni pau ʻo e ʻi ai ʻa e ʻOtuá pea ʻokú ne fakahā mahino mai ʻa e taumuʻa ʻa e ʻOtuá ki he kahaʻú. ʻOkú ne toe langaʻi hake ʻa e falala ki he Tohi Tapú ko e Folofola ia ʻa e ʻOtuá. ʻOku pau ʻoku tau fie maʻu ʻa e toko taha kotoa pē ke nau fakalāngilangiʻi ʻa Sihova ko e ʻOtuá.
2 Ko ha fetalanoaʻaki faingofua mo hangatonu ʻeni.
ʻI he hili ʻo e fakafeʻiloaki ki he toko taha ʻapí, peá ke ʻeke ange:
◼ “ʻOkú ke fakakaukau ko e maté ko ha fili pe ko ha kaumeʻa? [Tuku ke ne tali.] Fakatokangaʻi ʻa e lau ʻa e Folofola ʻa e ʻOtuá ko e Tohi Tapú ʻi he 1 Kolinitō 15:26. [Lau.] Ko ia, fakatatau ki he Tohi Tapú ko e maté ko e fili. Ko e hā ʻoku pehē ai ko e maté ko e fili pea ko e hā ʻa e maté? ʻOku tali ʻe he polosiuá ni ʻa e ngaahi fehuʻí ni. Ko ia te u saiʻia ke ʻoatu ia maʻau koeʻuhi ke ke toe vakai pē ʻiate koe ki he ngaahi talí.”
3 ʻI he hili hono fakafeʻiloaki koé, te ke lea pehē ni nai:
◼ “Koeʻuhi ʻoku ʻi ai ʻa e ngaahi palōpalema lahi ʻi he māmaní ʻi onopooni, ko e tokolahi ʻo e kakaí ʻoku nau fifili pe ʻe fai ʻe he ʻOtuá ha meʻa ke ne fakangata ʻa e fulikivanú. Ko e hā hoʻo fakakaukau? [Tuku ke ne tali.] Fakatokangaʻi ʻa e fakamatala ʻa e Tohi Tapú ʻo kau ki he meʻá ni. [Lau Fakahā 16:14-16.] Kuó ke fanongo nai ʻo fekauʻaki mo e foʻi lea ko e ʻĀmaketone? [Tuku ke ne tali.] Fakatatau ki he konga tohí ni ko e tau ia ʻa e ʻOtuá ke fakangata kotoa ʻa e fulikivanu.” Fakahā ki he toko taha ʻapí ʻa e polosiua ko e “Vakai!”, pea fakahanga ʻa e tokangá ki he tefitoʻi fakakaukau ʻoku hā ʻi he palakalafi 49 mo e 50 ʻi he peesi 25-26. Kapau ʻoku fakahā ʻe he toko taha ʻapí ʻokú ne fie fanongo peá ne ʻave ʻa e polosiuá, tala ange kiate ia ko e taimi hono hoko te ke toe ʻaʻahi mai aí te ke talanoa ʻo fekauʻaki mo e fehuʻi, Ko e hā ʻa e kahaʻu ʻo e tangatá pea mo e māmaní?
4 Ko e toe founga ʻe taha ke faí ko e tuhu ki he takafi ʻo e polosiua ko e “Vakai!” peá ke pehē:
◼ “ʻI he ʻahó ni ʻoku mau ʻeke ki homau ngaahi kaungāʻapí, Te ke saiʻia nai ke moʻui ʻi ha feituʻu fakaʻofoʻofa pehē ni? [Tuku ke ne tali.] ʻOkú ke ʻiloʻi nai ko e meʻá ni ia naʻe kikiteʻi ʻi he Tohi Tapú ʻe hoko ʻi heni tonu ʻi he māmaní? [Fakaeʻa ha ngaahi konga Tohi Tapu ʻe niʻihi ʻi he fakamatala ʻi lalo ʻi he peesi 4.] ʻOku totonu ke tau sivi tāutaha ʻa e ngaahi fakamoʻoní ke sio pe ʻoku alafalalaʻanga ʻa e talaʻofa ko ʻení.” Kapau ʻe tali ʻe he toko taha ʻapí ʻa e polosiuá, langaʻi hake ha fehuʻi ke ke tali ia ʻi hoʻo toe ʻaʻahi hono hokó.
5 ʻOkú ke fakaʻamu nai ke tokoniʻi ʻa e niʻihi kehé ke nau ako ki he ngaahi moʻoni fakaofo ʻo kau ki hotau Toko Taha Fakatupú pea mo ʻene taumuʻa anga-ʻofa ki heʻene ngaahi meʻa kuo fakatupú? ʻE tokoniʻi koe ʻe he polosiua ko e “Vakai!” ke ke fai ʻa e meʻá ni. ʻOkú ne fakalāngilangiʻi hotau Toko Taha Fakatupu Maʻongoʻongá, ko Sihova ko e ʻEiki Hau Fakalevelevá, ʻaki hono fakahīkihikiʻi ʻene ngaahi ngāué pea fakahā mahino ʻene ngaahi taumuʻa fakaofo ke fakamāʻoniʻoniʻi hono huafá pea ke tāpuakiʻi ʻa e faʻahinga ʻo e tangatá ʻo fakafou mai ʻi he Puleʻanga ʻo Kalaisí.