Ko Hono Tuʻuaki ʻo e Tohi Fāʻūtaha ʻi he Lotu
1 ʻOku laui miliona ʻa e kakai kuo nau lotuʻaki ʻa e ngaahi lea ko ia ʻoku hā ʻi he Lotu ʻa e ʻEikí, “Ke hoko mai hoo bule.” (Mt. 6:9, 10, PM) Ka neongo iá, ko e tokolahi ʻoku nau tui kuo ʻosi kamata ke pule ʻa e Puleʻangá ia ʻi heni ʻi he māmaní koeʻuhi kuo ʻosi maʻu ʻe he kakaí ʻa e “Kōsipelí.” Ko e ongoʻi ia ʻa e niʻihi tokua ko e Puleʻangá ʻoku fakahēvani pea ʻe toki maʻu pē ia ʻi he hili ha mate ʻa ha taha. Ko e tohi Fāʻūtaha ʻi he Lotu ki he ʻOtua Moʻoni Pē Taha ʻoku maʻá e faʻahinga kakai peheé kotoa. Ko e tohí ni ʻoku ʻikai ngata pē ʻi heʻene ʻomai fakaʻāuliliki ʻa e fakamatala ʻosi fakatotoloʻi ʻo kau ki he meʻa fekauʻaki mo e Puleʻanga ʻo e ʻOtuá ka ʻokú ne toe fakahaaʻi foki pē ʻe anga-fēfē ʻetau hoko ko ha tokotaha lotu fakahōifua ʻa e ʻOtua moʻoni pē taha ko Sihová. ʻI he lolotonga ʻo Suné te tau tuʻuaki ai ʻa e tohi leleí ni.
2 Te ke fili nai ke fai ha tuʻuaki nounou hangē ko ʻení:
◼ Fakaava ki he peesi 84 mo e 85, pea lea: “Tokolahi ʻa e kakai te nau saiʻia ke nofo ʻi ha ngaahi tuʻunga hangē ko ʻení. ʻOkú ke ʻiloʻi ko e meʻa tofu pē ia ʻoku tau lotu ki aí ʻi he taimi ʻoku tau lotu ai ‘Ke hoko mai hoo bule’? ʻOkú ke fakakaukau ko e hā ʻa e meʻa ʻe fai ʻe he Puleʻangá maʻá e faʻahinga ʻo e tangatá? [Tuku ke ne tali.] Fakatokangaʻi ʻa e lau ʻa ʻAisea 65:21, 22.” Hili hano lau, fakamatalaʻi nounou ʻa e founga ʻe hanga ai ʻe heʻene taumuʻá ʻo liliu ʻa e māmaní ke hoko ko ha palataisí. Kapau ʻoku hā ha mahuʻingaʻia, hoko atu ʻa e fetalanoaʻakí ki he palakalafi 10-13 ʻo e peesi 81-83. Toki tuʻuaki leva ʻa e tohí.
3 Kapau ʻokú ke fiemaʻu ke aʻu vave ki he poiní, ʻe lava ke ke pehē:
◼ “Kuo ʻi ai nai haʻo fifili pē ʻe malava fēfē ke ke maʻu ha ʻaonga lahi ange mei hoʻo lau Tohitapú?” Tuhu ki he kaveinga ʻo e tohí pea huke ki he peesi 27 ʻo fakamatalaʻi ʻa e puha ʻi he peesi ko iá, pea talaange foki ko e tohí ni ʻokú ne ʻomai ʻa e ngaahi tali fakafiemālie mei he Tohitapú. Kapau ʻoku fakahaaʻi ha mahuʻingaʻia pea tuʻuaki ʻa e tohí mo fakamatalaʻi ʻa e fokotuʻutuʻu ko ia ʻo e foaki meʻaʻofá.
4 Pe te ke ʻahiʻahi nai ʻeni:
◼ “ʻOku tui ʻa e kakai ʻe niʻihi ʻoku ofi ʻa e ngataʻangá. Ko e hā hoʻo fakakaukaú? [Tuku ʻa e tokotahá ke ne tali.] Fakatokangaʻi ʻa ia ʻoku lau ki ai ʻa e 2 Pita 3:10-13.” Huke ki he palakalafi 4 ʻo e peesi 177 pea fakamatalaʻi ʻa e ʻuhinga ʻo e konga Tohitapu ko iá pea mo e ʻuhinga ʻoku mahuʻinga ai ke tauhi maʻu ʻi he ʻatamaí ʻa e ʻaho ʻo Sihová.
5 Ko e tohí ni ʻe malava ke hoko ia ko ha tāpuaki ki he kakai loto-totonu ko ia kuo takihalaʻi ʻe kinautolu ʻoku nau akoʻi ʻa e ngaahi loi fakalotú. Ko e fakamatala moʻoni ko ia ʻi he tohi Fāʻūtaha ʻi he Lotu ki he ʻOtua Moʻoni Pē Taha, ʻe malava ke ne tokoniʻi ʻa e faʻahinga peheé ke tupulaki ʻi he houngaʻia ki hotau Tokotaha-Fakatupú, ʻa ia ʻoku tokanga angaʻofa mai kiate kitautolú pea faifai atu pē ʻo nau kau fakataha mo kitautolu ʻi hono malangaʻi ʻo e ongoongo lelei ʻo e Puleʻanga ʻo e ʻOtuá.—Mt. 24:14.