Ko e ʻIlo mei he ʻOtuá ʻOkú Ne Tali ʻa e Ngaahi Fehuʻi Lahi
1 Ki muʻa ke ke ʻilo totonu ʻa e moʻoní, ngalingali naʻá ke maʻu ha ngaahi fehuʻi lahi fekauʻaki mo e moʻuí ʻa ia naʻe ʻikai malava ke ke tali. Ko ha fiefia lahi ē ka ko koe ʻi hoʻo maʻu ʻa e ngaahi tali makatuʻunga mei he Tohitapú ki he ngaahi fehuʻi ko iá! ʻI he taimí ni, kuó ke malava ke tokoniʻi ʻa e niʻihi kehé ke nau maʻu ʻa e ngaahi tali tatau. (Fakafehoanaki mo 2 Timote 2:2.) Te ke malava ʻo vahevahe mo kinautolu ʻa e ʻilo ʻo e ʻOtuá ʻa ia ʻoku taki atu ki he moʻui taʻengatá. (Sione 17:3) Ka ʻe lava fēfē ke ke tokoniʻi ha taha ke ne houngaʻia ʻi he mahuʻinga ʻo e ʻilo ko ʻení? Sai, fakakaukau ki ha ngaahi fehuʻi naʻe tali ʻe he moʻoní maʻau. Ko e hā ʻa e meʻa ʻoku holi ʻa e kau fekumi ki he moʻoní ke ʻiló? Ko hoʻo fakakaukau ki he ngaahi meʻá ni ʻe lava ai ke ne tokoniʻi koe ke tuʻuaki ʻa e tohi ʻIlo ʻA Ia ʻOku Taki Atu ki he Moʻui Taʻengatá. Ko e ngaahi fokotuʻu ʻoku hoko haké te ne tokoniʻi nai koe ʻi he taimi ʻokú ke teuteu ai ke faifakamoʻoni he lolotonga ʻo Suné.
2 Koeʻuhi ko e kakai tokolahi ʻoku nau fifili ki he ʻuhinga ʻoku lahi pehē fau ai ʻa e faingataʻá ʻi he māmaní, ko e fakalea ko ʻení ʻe maʻu nai ai ha tali lelei:
◼ “ʻI he hoko ʻa e ngaahi fakatamakí pe ko e taimi ʻoku tupulekina ai ʻa e faihiá mo e fakamālohí, ʻoku faʻa ʻeke ʻe he kakaí ʻa e ʻuhinga ʻoku hoko ai ʻa e ngaahi meʻa fakalilifu peheé. Ko e hā hoʻo talí?” Tuku ke ne tali pea fakamālō ki ai. Huke foki ki he vahe 8 ʻi he tohi ʻIlo, pea fakahanga ʻa e tokangá ki he meʻa ʻoku fakahā mai ʻi he palakalafi 2. Fakamatalaʻi ko e tohi ko ʻení ʻokú ne ʻomai ʻa e fakamatala faka-Tohitapu ki he ʻuhinga ʻoku hoko ai ʻa e ngaahi meʻa koví ni, peá ke pehē: “Kapau te ke palōmesi mai te ke lau ia, te u saiʻia ke tuku ʻa e tatau ko ʻení maʻau.” Kapau ʻoku talitali lelei ʻa e tohí, fakamatalaʻi ʻa e fokotuʻutuʻu ki hono fai ha tokoni.
3 ʻI he taimi te ke toe foki ai ki ha feituʻu naʻá ke tuku ai ha tohi “ʻIlo,” te ke pehē nai:
◼ “ʻOku ou mahuʻingaʻia ʻi he fakamulituku naʻá ke aʻu ki aí ʻo kau ki he ʻuhinga ʻoku lahi pehē fau ai ʻa e faingataʻá ʻi he māmaní. ʻOkú ke loto-tatau mo e tali ʻa e Tohitapú ʻoku hā ʻi he tohí?” Tuku ke ne tali. Lau ʻa e palakalafi 17 ʻi he peesi 77 ʻi he tohi ʻIlo, pea tala ange ke ne lau mai ʻa e Loma 9:14 mei heʻene Tohitapú. Pea ke pehē leva: “Ko e ongoongo leleí ʻoku pehē, ʻoku ʻikai ko e ʻOtuá naʻá ne fakatupunga taʻetotonu mai kiate kitautolu ʻa e mamahí mo e faingataʻá. Kuó ne talaʻofa mai te ne ʻomai maʻatautolu ʻa e moʻui taʻengata ʻi he melino mo e fiefia. ʻOku fakakaveinga ʻa e vahe ʻuluaki ʻi he tohi ko ʻení, ko e ‘ʻE Lava ke Ke Maʻu ha Kahaʻu Fiefia!’ Te u saiʻia ke fakamatalaʻi atu ʻa e founga ʻe lava ke hoko ai ia ʻo moʻoni kiate koe, pea mo e faʻahinga ʻokú ke ʻofa aí.” Huke ki he vahe 1, pea fakahāhaaʻi ʻa ʻetau founga fai ʻo e akó. Ako ʻa e vahé ki he lahi taha ʻe malavá ʻo fakatatau ki he ngaahi tuʻungá.
4 Te ke fili nai ke ngāueʻaki ʻa e lea kamata ʻoku ʻasi ʻi he peesi 14 ʻo e tohi “Reasoning,” ʻi he kaveinga “Taʻumotuʻa/Mate”:
◼ “Kuó ke ʻeke hifo kiate koe, ‘Ko e maté ko e ngataʻanga ia ʻo e meʻa kotoa pē? Pe ʻoku ʻi ai ha meʻa kehe ʻi he hili ʻa e maté?’ [Tuku ke ne tali.] ʻOku fakamatalaʻi ʻe he Tohitapú ha faʻahinga fehuʻi ʻoku tau maʻu nai ʻo fekauʻaki mo e maté. [Lau ʻa e Koheleti 9:5, 10.] ʻOkú ne toe fakahā mai ʻoku ʻi ai ha ʻamanaki moʻoni ki he faʻahinga ʻoku nau maʻu ʻa e tuí. [Huke ki he palakalafi 13 ʻi he peesi 84 ʻi he tohi ʻIlo; lau pea fakamatalaʻi ʻa e ngaahi lea ʻa Sīsū ʻoku hā ʻi he Sione 11:25.] Ko e vahe ko ʻení fakakātoa ʻoku faʻufaʻu ia ke ne tali ʻa e fehuʻi, Ko e hā ʻoku hoko ki he faʻahinga ʻoku tau ʻofa ai kuo maté? Kapau te ke saiʻia ke lau ia, ʻe lava ke u tuku ʻa e tatau ko ʻení maʻau.” Tuku ki he tokotaha-ʻapí ha faingamālie ke ne fai ha tokoni.
5 ʻI hono fai ʻa e toe ʻaʻahí, ʻe lava ke ke fakafoʻou ʻa e fakamahení pea ke pehē leva:
◼ “Ki muʻá, naʻá ta talanoa ai fekauʻaki mo e meʻa ʻoku hoko ʻi he taimi ʻoku mate ai ha taha. ʻOku tui ʻa e kakai tokolahi ko ha moʻui hili ʻa e maté ʻoku ʻi hēvani pe ʻi heli. Ka kuó ke fakakaukau fekauʻaki mo e malava ke toe moʻui ʻa e maté ʻi heni tonu ʻi he māmaní? [Tuku ke ne tali.] Fakatatau ki he Tohitapú, ko e faʻahinga ʻe toetuʻú te nau ʻi he lotolotonga ʻo e kau anga-malū ʻe nofo ʻi he māmaní. [Lau ʻa e Sāme 37:11, 29, fakamatalaʻi leva ʻa e palakalafi 20 ʻi he peesi 88 ʻo e tohi ʻIlo.] Ko e ʻamanaki ko iá ʻokú ne ʻoatu ʻa e fakafiemālie ki he laui miliona ʻo e kakai ʻoku nau moʻui ilifia ki he maté. ʻE tokoni ʻa e tohi ko ʻení ke lelei ange ai hoʻo mahino fekauʻaki mo e meʻa ko iá. ʻE lava nai ke u fakahāhaaʻi hono foungá?”
6 Kapau ʻokú ke saiʻia ʻi ha tuʻuaki faingofua, te ke ʻahiʻahiʻi nai ʻa e taha ko ʻení:
◼ “ʻOku ou saiʻia ke fakahā atu kiate koe ha fakatātā ʻi he tohi ko ʻení, ʻIlo ʻA Ia ʻOku Taki Atu ki he Moʻui Taʻengatá. ʻIkai ko ha fakatātā fakaʻofoʻofa ʻeni?” Fakaava ʻa e tohí koeʻuhi ke lava ʻa e tokotaha-ʻapí ʻo sio ki he peesi 4-5. Tuku ke ne tali. Lau foki ʻa e ngaahi lea ʻi he peesi 5. Fakaʻosi ʻaki hoʻo pehē: “Te ke lava ʻo tuku nai ʻa e tohi ko ʻení maʻau ke ke lautohi ai. ʻOku ʻikai ha totongi ki ai, ka ʻoku mau talitali lelei ha ngaahi tokoni siʻisiʻi ki heʻemau ngāue ʻi māmani lahí.” ʻAi ke ke ʻilo ʻa e taimi lelei taha ke toe foki ai ʻo ʻaʻahi ki ha mahuʻingaʻia ʻoku hā mai.
7 ʻOku tau maʻu ʻa e ʻilo mei he ʻOtuá ʻa ia ʻokú ne tali ʻa e ngaahi fehuʻi mahuʻinga ʻi he moʻuí. Teuteu fakamātoato, pea ʻe tāpuakiʻi ʻe Sihova hoʻo ngaahi feinga ke vahevahe atu ʻa e fakamatala fakahaofi-moʻui ko ʻení ki he faʻahinga ʻoku nau kumi ki he moʻoní.