ʻOku Fie Maʻu ki he Toʻutupú ha Faʻifaʻitakiʻanga Lelei

¹ ʻOku tau fiefia ʻi heʻetau maʻu ʻa e toʻutupu ʻoku nau ‘fakamālōʻia ʻa e huafa ʻo Sihová.’ (Sāme 148:​12, 13) Ko e tokolahi ʻiate kinautolu ʻoku nau kei taʻu siʻi ʻaupito. Ko ʻenau fakalakalaká ʻoku fakapapauʻi lahi ʻi he akoʻi mo e faʻifaʻitakiʻanga ʻoku tokonaki ʻe heʻenau ngaahi mātuʻá pea pehē ki he kakai lalahi kehe ʻi he fakatahaʻangá. Kae kehe, ʻoua ʻe taʻe tokangaʻi, ʻa e tākiekina ʻoku fai ʻe he toʻutupu kehé, tautautefito ki he toʻutupu ʻoku nau lalahi angé mo e faʻahinga ʻoku taʻu siʻi angé. Kapau ʻokú ke ʻi he kulupu ʻo e taʻu ko ʻení, ko e ngaahi fakamatala ko ení ʻe ʻaonga nai kiate koe.

² Ko e toʻutupu ʻoku teʻeki ai ke nau taʻu 13 ʻo faai haké ʻoku nau hehema maʻu pē ke faʻifaʻitaki ki he toʻutupu ʻoku nau taʻu hongofulu tupu lahí. ʻOku nau maʻu ʻa e holi fakanatula ke nau hangē ko e faʻahinga ʻoku nau feohi vāofi mo iá. ʻOku nau hehema ke hanga ki he kau talavou kehe ʻoku nau lalahi angé pea hā mai ʻoku nau ngali maʻu ʻa e ʻilo mo ha ngaahi fakalakalaka lelei ange. Ko hono olá, ʻoku nau faʻifaʻitaki nai ki hoʻo leá mo hono ʻulungāangá pea pehē pē ki hoʻo houngaʻia ki he ngaahi meʻa mahuʻinga fakalaumālié pea mo hoʻo kau ʻi he ngaahi ngāue kehe ʻi he fakatahaʻangá.

³ ʻI hoʻo hoko ko e toko taha taʻu hongofulu tupu lahí, ʻokú ke maʻu ha faingamālie pea mo ha fatongia mamafa. ʻI he taimi ko ení, ko hoʻo faʻifaʻitakiʻangá te ne tākiekina ho kaungā talavou ʻoku kei siʻi angé. ʻEke hifo kiate koe, ‘Ko e hā ʻa e faʻahinga takiekina ʻokú ke ngāueʻaki ki he faʻahinga siʻi angé? ʻOku ou fakakaukau mafamafatatau, fakaʻehiʻehi mei he ngaahi fakakaukau fakasesele mo e “ngaahi holi fakatalavou” fehālaakí? ʻOku ou fakahāhā ʻa e talangofua mo e fakaʻapaʻapa ki heʻeku ongo mātuʻá, kau mātuʻá, mo e niʻihi kehe ʻoku taʻumotuʻá?’ (2 Tīm. 2:22; Kol. 3:20) Ko e meʻa te ke leaʻakí mo faí ʻe hoko ia ko e meʻa lahi ki he fakalakalaka fakalaumālie ʻa e faʻahinga kei siʻi ange ʻoku nau fakatokangaʻi hoʻo ngaahi ngāué.

⁴ Ko hono malangaʻi ʻa e pōpoaki ʻo e Puleʻangá ko e ngāue tefito ia ʻa e fakatahaʻangá. Ko hoʻo lotoʻaki mo hoʻo kau maʻu pē ki aí ʻe hoko ia ko e fakalototoʻa ki ho kaungāmeʻá ke nau toe longomoʻui ange. Kapau te ke malava ke kau ki he ngāue tāimuʻá, ʻe ueʻi ai ho kaungāmeʻá ʻi ha founga tatau. ʻI hoʻo tali maʻu pē ʻi he ngaahi fakatahá pea pole ke ke tokoni ki hono fai ha ngāue ʻoku fie maʻu ʻi he Kingdom Hall ʻe toe hoko ia ko ha faʻifaʻitakiʻanga lelei.

⁵ Neongo naʻe ʻikai ke kei taʻu siʻi ʻa Tīmote ʻi he taimi naʻe ʻoange ai ʻe Paula kiate ia ʻa e akonaki ko ʻení, ko kimoutolu ʻa e kau talavou ʻoku ʻi he taʻu 13 ki he 19, ʻoku malava ke mou ngāueʻaki ia: “Kaekehe ke ke hoko ko e toko taha ke faʻifaʻitaki ki ai ʻe he kakai lotu, ʻi he lea, ʻi he ʻulungaanga, ʻi he ʻofa, ʻi he tui, ʻi he angamaʻa.” (1 Tīm. 4:12) Ko hoʻo lotoʻaki mo hoʻo kau faivelenga ʻi he ngāue ʻa Sihová ʻe ueʻi ai ho kaungāngāué mo e faʻahinga kei siʻi ange ʻoku nau vakai atú ʻi ha founga langa hake, ʻo tokoniʻi ai kinautolu ke nau hoko ʻo laka ki muʻa ʻo hoko ko e tangata kakato fakalaumālie. (ʻEf. 4:13) Ko e faʻahinga ʻoku ʻi he taʻu 13 ki he 19 ʻa ia ʻoku nau kau ki he ngaahi fāmili kuo nau toki kamata ke akó ʻoku tohoaki mai nai ki he moʻoní ʻaki ʻa e meʻa ʻoku nau vakai mai ʻoku hā meiate koé.

⁶ Ko e meʻa mahuʻinga lahi tahá, ko hoʻo tōtōivi ʻi hono fakahāhā ʻa e ʻulungāanga fakaʻotuá ʻokú ne ʻomai ʻa e lāngilangi kia Sihova mo ʻene kautahá. (Pal. 27:11) Ko e toko taha ʻoku fakatokanga meʻa loto-totonú te ne ofo nai ʻi he faikehekehe hā mahino ʻiate koe mo e toʻutupu ʻo e māmaní. Ko ia ʻokú ke maʻu ha faingamālie taʻe hano tatau ke ke tokoniʻi ʻa e toʻutupú ʻi he lolotonga ʻo hoʻo fai ha tokoni mahuʻinga ʻi hono fakamālōʻia ʻa Sihová.​—Sāme 71:17.