Tokoni Anga-ʻOfa Kiate Kinautolu ʻOku Fie Fanongó
1 ʻI hono tataki ʻe he ʻāngelo ʻa Sihová ki he ʻItiopea naʻá ne fie fanongo moʻoni ki he moʻoni ʻo e Folofola ʻa e ʻOtuá, naʻe tokoni anga-ʻofa ʻa Filipe kiate ia ke ne maʻu ʻa e mahino ki he meʻa naʻá ne laú. (Ng. 8:26-39) ʻOku tau fai ha feinga makehe ke tokoni kiate kinautolu ʻoku nau fie fanongó? ʻOku totonu ke tau fai pehē, koeʻuhí he ko e fekau kuo vaheʻi mai mei he ʻOtuá kiate kitautolú ʻoku kau ki ai ʻa e ngaohi ākongá. (Mt. 28:19, 20) Ko e hā ʻoku lava ke tau fai ke tokoni kiate kinautolu?
2 Vaheʻi ha taimi ʻi he uike taki taha ke fai ai ʻa e ngaahi toe ʻaʻahí. Fai ha fokotuʻutuʻu ke ʻaʻahi kiate kinautolu naʻa nau fie fanongó, mo feinga ke hoko atu ʻa e fetalanoaʻaki ʻi he Tohi Tapú naʻe kamata ʻi hoʻo ʻuluaki ʻaʻahí. Fakakaukau ki he kolo ko hono kamata ha ako Tohi Tapu. Toe foki maʻu pē ʻo tuʻuaki ʻa e tatau fakamuimui taha ʻo e Taua Leʻo mo e Awake! ʻI hono maʻu ʻa e fie fanongo moʻoní, te ke tuʻuaki nai ʻa e tukuhaú.
3 Kapau naʻá ke fetalanoaʻaki ʻi hoʻo ʻuluaki ʻaʻahí ki he mahuʻinga ʻo e Tohi Tapú, te ke hoko atu nai ʻa e fetalanoaʻakí ʻo ngāueʻaki ʻa e fokotuʻu mei he peesi 66 ʻo e tohi “Reasoning” ʻo pehē:
◼ “ʻOku pehē ʻe he niʻihi ko e akonaki ʻa e Tohi Tapú ʻoku ʻikai ke kei ʻaonga ia ʻi hotau māmaní ʻi onopooni. Ko e hā ʻa hoʻo fakakaukau ki he meʻa ko iá? [Tuku ke ne tali.] ʻIkai te ke loto-tatau ki he pehē ko ha tohi ʻokú ne tokonaki mai ʻa e akonaki fakapotopotó ʻe malava ke tau maʻu ai ha fāmili moʻui fiefia ʻoku ʻaonga? [Tuku ke ne tali.] Kuo liliu ʻa e ngaahi lau fakafuofua mo e ngaahi angafai ʻo fekauʻaki mo e moʻui ʻa e fāmilí, pea ʻoku ʻikai ke lelei ʻa e ngaahi ola ʻoku tau sio ki ai ʻi he ʻaho ní. Ka ko e ngaahi fāmili ʻoku nau ngāueʻaki ʻa e fakamatala ʻa e Tohi Tapú ʻoku nau fiemālie mo fiefia.” Lau ʻa e Kolose 3:18-21. Tuʻuaki ʻa e tuleki Ko e ʻUhinga Ke ke Falala Ai ki he Tohi Tapu, mo fakahā ʻoku tau tuʻuaki ʻa e polokalama ako Tohi Tapu taʻetotongi.
4 Te ke lava ʻo kamata ha fetalanoaʻaki ʻo fekauʻaki mo e tuʻunga ʻo e maté ʻi he founga ko ʻeni:
◼ “Kuo lahi ʻa e lāulea ʻo fekauʻaki mo e tuʻunga ʻo e maté. Ko e hā ʻa hoʻo fakakaukau ki he meʻa ʻoku hoko kiate kitautolu ʻi heʻetau maté? [Tuku ke ne tali.] Ko e lahi taha ʻo e ngaahi lotú ʻoku nau akoʻi ʻoku hokohoko atu pē ʻa ʻetau moʻuí ʻi ha ngaahi fōtunga kehe. Kuo ofo ʻa e tokolahi ʻi heʻenau ʻiloʻi ʻa e lau ʻa e Tohi Tapú ʻo fekauʻaki mo e meʻá ni. [Lau ʻa e Koheleti 9:5.] Neongo ʻoku ʻikai ke toe ʻilo ha meʻa ʻe he maté, ka ʻoku ʻikai ke ngalo kinautolu. Kuo talaʻofa ʻe he ʻOtuá ʻe toe fakafoki mai kinautolu ke nau moʻui ʻi he pule mai ʻa hono Puleʻangá.” Huke ki he peesi 162 ʻi he tohi Moʻui Taʻengata, pea fetalanoaʻaki ʻi he ngaahi veesi Tohi Tapu mo e ngaahi fakatātā aí. Fokotuʻutuʻu ki ha toe ʻaʻahi, mo e taumuʻa ke kamata ha ako Tohi Tapu.
5 Kapau ʻokú ke loto ke fai ha fakamatala lahi ange ʻo fekauʻaki mo e fakakaukau ʻa e Kalisitiané ki he taú ʻi he lotolotonga ʻo e ngaahi puleʻangá, te ke loto nai ke ke lea pehē ni:
◼ “ʻOku tui ʻa e niʻihi ko e taú ko e founga pē ia ke fakaleleiʻi ʻaki ʻa e ngaahi fekeʻikeʻí. ʻOku fēfē ʻa hoʻo fakakaukau ʻo fekauʻaki mo e meʻa ko iá? [Tuku ke ne tali.] ʻOku fakahā ʻi he Tohi Tapú ʻoku fiemaʻu ʻe he ʻOtuá ʻa e kakaí ke nau nofo fakataha ʻi māmani lahi ʻi he malumalu ʻo e pule ʻa e Puleʻanga ʻo e ʻOtuá.” Sio ki he peesi 26-27 ʻo e polosiua “Vakai! ʻOku Ou Fakafoʻou ʻa e Meʻa Kotoa Pe.” Fakahā te ke toe foki ange ʻo fakamatala ki he ʻuhinga naʻe akoʻi ai ʻe Sīsū ke tau lotu ke ‘fai ʻa e finangalo ʻo e ʻOtuá ʻi he māmaní ʻo hangē ko ia ʻi hēvaní.’—Mt. 6:10.
6 Naʻe fakahā moʻoni ʻe he ʻiunoke ʻItiopeá ʻa ʻene taʻemalava ke ne maʻu ʻa e mahinó ʻo kapau ʻe ʻikai ke tokoniʻi ia ʻe ha tokotaha. (Ng. 8:31) Naʻe ʻoange anga-ʻofa ʻe Filipe ʻa e tokoni naʻá ne fiemaʻú. ʻOku lava ke tau fakahā ʻa ʻetau ʻofa moʻoni ki he niʻihi kehé ʻaki ʻetau tokoni kiate kinautolu ʻi he founga tatau.