Ngaahi Toe ʻAʻahi mo ha Taumuʻa
1 ʻI hono fai ʻo ha toe ʻaʻahi, ʻoku totonu ke ke feinga ke ngāueʻaki ha konga Tohitapu te ne tānaki atu ki he tokotaha ko iá ʻa e ʻilo ki he kaveinga ʻi he Tohitapú ʻa ia naʻá mo fetalanoaʻaki ai ki muʻá.
2 Ko e taha ʻo e ngaahi kolo ʻi he fai ʻo e ngaahi toe ʻaʻahi ki he makasini naʻe tukú ko hono kamata ai ha tufaʻanga makasini pau. ʻE ola lelei nai ha tuʻuaki faingofua ʻo hangē ko ʻení:
◼ “ʻOku ou ʻamanaki pē naʻá ke saiʻia ʻi he kupu ʻi he Taua Leʻo naʻá ku tuku kiate koé ʻa ia naʻe fakamatala ki he ʻuhinga ʻoku totonu ai ke tau manavahē ki he ʻOtuá. ʻI he ʻahó ni ʻoku ou haʻu mo ha kupu ʻi he makasini Taua Leʻo fakamuimui tahá ʻokú ne ʻeke, ‘ʻOku Puleʻi ʻe he ʻOtuá ʻa e Māmaní?’ Ko ha fehuʻi lelei ia, ʻikai ko ia?” ʻE lava ke ke hoko atu ʻaki haʻo pehē: “ʻOku fifili ʻa e kakai tokolahi: Kapau ʻoku fakatou anga-ʻofa ʻa e ʻOtuá mo mālohi-fakaleveleva, ko e hā ʻoku hoko ai ʻa e ngaahi meʻa fakamanavaheé? Kātaki ʻo tali ʻa e makasini ko ʻení pea ʻe fakalototoʻaʻi ai koe ʻe he tali totonu ʻoku ʻomai ʻi he Folofola ʻa e ʻOtuá.” Pea tala ange te ke toe foki atu ke ʻoange ʻa e ngaahi tatau hono hoko maí pea toe fetalanoaʻaki nai ki he talaʻofa ʻa e ʻOtuá ki he faʻahinga ʻo e tangata talangofuá. Manatuʻi ko e taimi kotoa pē te ke ʻave ai ʻa e ngaahi makasiní, te ke lava ʻo lipooti ia ko e toe ʻaʻahi.
3 Kapau naʻá ke tuku ʻa e kupu “Ko e Talaʻofa ki ha Māmani ʻIkai ʻI Ai ha Fakameleʻi?” te ke pehē nai:
◼ “ʻE anga-fēfē nai ʻa e moʻui ʻi he māmani ko ʻení kapau ʻe ʻikai ke toe ʻi ai ha mele? [Tuku ke ne tali.] Tuku muʻa ke u fakahā atu kiate koe ʻa e meʻa naʻe talaʻofa ʻe he ʻOtuá te ne faí.” Lau ʻa e Sāme 37:10, 11, pea fakamatalaʻi ʻa e ngaahi meʻa ʻe hoko ʻi hono fai ʻa e finangalo ʻo e ʻOtuá ʻi he māmaní. Fakamanatu ki he tokotaha ko iá ʻa e meʻa naʻe akoʻi ʻe Sīsū ki heʻene kau ākongá ke nau lotu ke hoko maí ʻo hangē ko ia naʻe hiki ʻi he Mātiu 6:9, 10. Tokoniʻi ia ke ne fakakaukau ki he ʻuhinga ʻo e ngaahi lea ʻa Sīsuú. Kapau ʻoku ʻi ai ha mahuʻingaʻia moʻoni, te ke tuʻuaki nai ha tukuhau ki he Taua Leʻo pe Awake! pea fai ha ngaahi fokotuʻutuʻu ke toe foki ki ai ki ha toe fetalanoaʻaki.
4 Ko e kamata ʻo ha ako Tohitapu ko ha kolo mahuʻinga ia ʻi heʻetau ngāue fakafaifekaú. Kuó ke ʻosi fai nai ha ngaahi ʻaʻahi ki ha tokotaha ʻa ia naʻá ne tali ʻa e ngaahi makasiní. Fēfē ke ke ngāueʻaki ʻeni ʻi hoʻo ʻaʻahi hono hoko maí?:
◼ “ʻOku maʻu ʻe he kakaí ʻa e ngaahi fakakaukau lahi mo faikehekehe ʻo fekauʻaki mo e lotú mo hono mahuʻinga ʻi he moʻui ʻi onopooní. ʻOku ʻi ai ʻa e ngaahi tui ʻoku ʻuhinga kehekehe ʻo fekauʻaki mo e ʻuhinga kuo fakaʻatā ai ʻe he ʻOtuá ʻa e fulikivanú pe ko e ʻuhinga ʻoku tau tupu ai ʻo motuʻa pea maté. Ko e kakai ʻe niʻihi ʻoku nau fie ʻilo ki he founga ke fai ai ʻa e lotú pea fanongoa ʻe he ʻOtuá.” Fakaava ha taha ʻo ʻetau ngaahi tohi ki he ako Tohitapú ki ha kupu ʻokú ke pehē ʻe mahuʻinga ki he tokotaha-ʻapí, pea fakatātaaʻi fuonounou ʻa e anga ʻo hono fai ʻo ha ako.
5 Ko Sihová ko e ʻOtua ʻo e taumuʻa. Tau faʻifaʻitaki ki ai ʻi he lolotonga ʻo ʻOkatopá ʻaki ʻa hono fai ʻo e ngaahi toe ʻaʻahí mo ha taumuʻa.