ʻAonga mei he Ngaahi Malanga Fakahāhā Kuo Fakatonutonú

¹ Naʻe totonu hono fakamatalaʻi ʻa e hisitōlia fakaonopooni ʻo e Kau Fakamoʻoni ʻa Sihová ʻi he ngaahi lea ʻo e Palōvepi 4:18: “He ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie.”

² ʻI he fetāiaki mo ʻení, ko e fakatahaʻanga Kalisitiané ʻoku nau hokohoko atu ke maʻu ʻa e fakamahino faingatonu mo e ngaahi fakamatala kakato ʻo aʻu mai ki he taimi ní ʻo e ngaahi akonaki ʻa e Tohi Tapú. (Mt. 24:​45-47) ʻOkú ke lau nai ha ngaahi fakatātā ʻo e meʻá ni ʻa ia naʻá ke fakatokangaʻi talu mei hoʻo kamata ke feohi mo e Kau Fakamoʻoni ʻa Sihová. Ko e ngaahi fakataha ʻa e fakatahaʻanga, kau ai mo e ngaahi malanga fakahāhā, ʻoku tokoniʻi ai kitautolu ke tau hokohoko atu hono fakatupulekina ʻa e maama ʻo e moʻoní.

³ Ngaahi ʻAutilaine Kuo Fakatonutonu: Ki muí ni, kuo ʻai ʻe he Sōsaietí ke feʻunga mo e taimí ni ha ngaahi ʻautilaine malanga fakahāhā ʻe niʻihi. Ko e ngaahi fakamatala feʻunga mo e taimi ní kuo fakatahaʻi ʻiate kinautolu, pea ko e ngaahi poini mahuʻingá kuo fakamaʻalaʻala. Kapau ko e fakatahaʻangá te nau maʻu ʻa e ʻaonga kakato ʻo e ngaahi fakamatala feʻunga mo e taimi ní, ko e ngaahi tokoua ʻoku nau fai ʻa e ngaahi malanga fakahāhaá ʻoku totonu ke nau ngāueʻaki pē ʻa e ngaahi ʻautilaine fakamuimui taha.

⁴ ʻI ha vakai ke maʻu ʻa e ʻaonga fakalūkufua mei he ngaahi malanga fakahāhaá, fai ha fakakaukau ki he ngaahi kaveinga ʻo e ngaahi malanga ʻe faí. Ki muʻa ke ke kau ki he Malanga Fakahāhaá, feinga ke manatuʻi ʻa e fakamatala fakamuimui taha mei he maʻuʻanga fakateokalati ki he kaveingá. Ko ia, ʻi he lolotonga ʻo hoʻo fanongó, fakakaukau ki he anga ʻo e fakamatala. Fakatokangaʻi ha ngaahi founga foʻou ʻo hono ngāueʻaki ʻa e ngaahi meʻa moʻoni ko iá ʻi he kahaʻu. ʻOku fakapapauʻi ai te ke maʻu ʻa e ʻaonga lahi taha mei he ngaahi malanga fakahāhā kuo fakatonutonú.

⁵ ʻOku Totonu ke Fakamatalaʻi ʻa e Ngaahi Malanga Fakahāhaá pea Toe Ueʻi ʻa e Kau Fanongó: ʻI he taimi naʻe lea ai ʻa Sīsuú, naʻe aʻu ki he loto ʻo ʻene kau fanongó. ʻI he fakaʻosi ʻo ʻene Malanga ʻi he Moʻungá, ko e malanga fakahāhā ʻiloa taha ia kuo fai, ʻo hangē ko ia ʻoku pehē ʻe he Mātiu 7:​28, PM: “Bea ofo ae kakai i he ene akonaki.”

⁶ ʻI hono manatuʻi ʻa e faʻifaʻitakiʻanga ʻa Sīsuú, ko e kulupu ʻo e kau mātuʻá ʻoku totonu ke nau fakapotopoto ʻi hono tali ha tokotaha foʻou ke ne fai ʻa e malanga fakahāhā, vaheʻi pē ha niʻihi ʻo e ngaahi tokoua ʻoku nau hoko ko e kau faiako lelei, te nau pīkitai ofi ki he ngaahi ʻautilaine ʻa e Sōsaieti, pea mo pukepuke ʻa e tokanga ʻa e kau fanongó. Ko e ngaahi tokoua kuo vaheʻi ki he monū ke nau fai ʻa e ngaahi malanga fakahāhaá ʻoku totonu ke nau hokohoko atu ʻi he feinga ke fakaʻau ke toe lelei ange ʻenau pōtoʻi leá, ʻo tali ha faʻahinga akonaki pē pea mo e ngaahi fokotuʻu kuo nau maʻu mei he kau mātuʻá.

⁷ Hangē ko ia naʻe leaʻaki ʻi he ʻAisea 65:​13, 14, ko e tuʻumālie fakalaumālie ʻo e kakai ʻa e ʻOtuá ʻoku hokohoko atu ʻo hā mahino. Ko e fokotuʻutuʻu ki he ngaahi malanga fakahāhaá ko e taha ia ʻo e ngaahi founga lahi ʻoku tau hoko ai ko e kau “ako ʻa Sihova.”​—ʻAi. 54:13.