Ko ha Ongoongo ʻo e Puleʻangá Makehe ki he Tokotaha Kotoa Pē

¹ Te tau kamata mei ʻEpeleli 24 ʻa hono tufa ʻa e Ongoongo ʻo e Puleʻangá makehe ʻa ia kuó ne langaʻi ʻa e mahuʻingaʻia ʻa e kakai ʻoku tokangá ʻi he feituʻu kotoa pē! Ko e pōpoaki ʻoku ʻi aí ʻoku ʻikai ke ngata pē ʻi heʻene taimi totonú ka ʻoku toe fakavavevave foki. ʻOku fakahāhā ʻe he kau malanga ʻi he fakatahaʻanga kotoa pē ʻa ʻenau poupou ʻaufuatō, ʻo nau loto ke ʻave ʻa e pōpoakí ni ke maʻu ʻe he kakai ʻe laui afe. ʻOkú ke kakapa atu ki ha kau kakato ki ai?

² Naʻe ʻoatu ha Ongoongo ʻo e Puleʻangá ki he fakatahaʻanga taki taha, ʻo fakafuofua ki he taki 50 ki he tokotaha malanga taki taha pea 250 ki he tāimuʻa taki taha. Ko e fiha naʻá ke malava ʻo tufá? Kapau naʻe ʻikai te ke malava ke tufa ki he lahi naʻá ke ʻamanaki ki aí, kuó ke fakakaukau ki he ngaahi founga ke fai ke toe lahi ange ai ki muʻa ke ngata hono tufá ʻi Mē 14? Fēfē ke hoko ko ha tāimuʻa tokoni? ʻE lava ke ke ngāueʻaongaʻaki ʻa e ngaahi fakataha malanga ʻoku fakalahi atu ʻi he lolotonga ʻo e uiké, ʻo hangē ko e ngaahi fakataha ki he fakamoʻoni ʻi he efiafí?

³ ʻE vakaiʻi fakalelei ʻe he kau mātuʻá pe ʻoku ngāueʻi ʻa e ngaahi kauhalá. Kapau ʻoku ʻikai ke lava ʻo ngāueʻi ha ngaahi konga ʻe he fakatahaʻanga naʻe vaheʻi ki aí, ʻoku totonu ki he kau mātuʻá ke nau fetuʻutaki ki he ngaahi fakatahaʻanga ofi maí ʻo kole ki ha tokoni. Ko ʻetau ngaahi feinga ʻaufuatoó, fakataha mo e fengāueʻaki lelei ʻa e ngaahi fakatahaʻangá, ʻoku totonu ke lava ai pē ʻa e ngāué ia.

⁴ Ngalingali kuó ke hokosia ha fiefia lahi ange ʻi he ngāué ni koeʻuhi he ʻoku fuʻu tokolahi ʻa e malava ke kau ki aí, kau ai ʻa e kau malanga foʻoú mo e tamaikí. Ko e ʻamanakí, ko e laumālie ʻo e fiefia ko ʻení ʻe tolonga, ʻo fakalototoʻaʻi kotoa ke muimui ki ai ʻi hono fai ʻa e ngaahi toe ʻaʻahi ki he faʻahinga naʻa nau tali leleí. Naʻe naʻinaʻi ke tau tauhi ha ngaahi lēkooti fale-ki-he-fale ʻoku totonú, hiki ʻa kinautolu naʻa nau fakahā ʻa e mahuʻingaʻiá. ʻI he fakaʻosinga ʻo Meé ko e taimi lelei ia ke nōfoʻi ai ʻi hono fai ʻa e ngaahi toe ʻaʻahí mo ha kolo ke kamata ha ngaahi ako foʻou.

⁵ Ko e hā ʻe lava ke tau leaʻaki ʻi heʻetau toe fokí? Te ke ʻilo nai ʻoku ola lelei ke pehē: “ʻOkú ke manatuʻi nai ʻa e fakamatala naʻe pulusi ʻa ia naʻá ku ʻoatu ki mui ní; ʻoku ou ʻamanaki pē naʻá ke maʻu ha faingamālie ke lau mo fai ha fakakaukau ki he meʻa ko iá. ʻOku ueʻi ʻe he fakamatala ko iá ʻa e fetalanoaʻaki lahi ʻi hotau feituʻú, koeʻuhi he ʻoku lave ki he ngaahi meʻa mahuʻinga ʻoku fehangahangai mo e faʻahinga kotoa ʻo e tangatá.” Lave ki ha niʻihi ʻo e ngaahi fakamatala fakatupu-fakakaukau ʻi he peesi hono uá, pea ʻeke ange: “ʻOkú ke fakakaukaú ko e hā ʻoku fiemaʻu ke tau fai ke fakapapauʻi ai ʻoku tau mateuteu ki he meʻa ʻe hoko ʻi he kahaʻú?” Tuku ke ne tali. Kapau ʻoku mahuʻingaʻia, fakamatala ki he ngaahi poini kehe ʻi he peesi 2-4 ʻo e Ongoongo ʻo e Puleʻangá, pea tuʻuaki ʻa e ako Tohitapú pea kapau ʻoku ʻikai malava, ko e ongo makasini fakamuimui tahá.

⁶ Kapau ʻokú ke ngāue ʻi ha kauhala ʻo ha fakatahaʻanga kehe, fakapapauʻi ke ʻoatu ʻa e ngaahi hingoa ʻo ha faʻahinga mahuʻingaʻia naʻá ke ʻilo koeʻuhi ke lava ʻo fai ʻa e ngaahi toe ʻaʻahí ʻe he kau malanga ʻi he fakatahaʻanga ko iá. ʻOku pehē pē, kapau ʻe kole ke ke fai ha ngaahi toe ʻaʻahi, fakapapauʻi ke fai leva ia.

⁷ Ko hono tufa makehe ʻo e Ongoongo ʻo e Puleʻangá ni kuó ne fakatupu ʻa e loto-māfana mo ueʻi kotoa kitautolu ke fakalahi ange ʻa ʻetau ngaahi feinga ʻi he ngāue fakamalanga ʻo e Puleʻangá. ʻOku lava ke tau tui pau ʻe hoko ko e lavameʻa lahi ʻaupito, ʻa e tupulekina ʻa e ʻilo ʻa e kakai ʻi he feituʻu kotoa pē ki he huafa lahi ʻo Sihová mo ʻene taumuʻá. (ʻAi. 12:​4, 5) Ko e lahi ange ʻo ʻetau malava ke faí, ko e fakautuutu ai pē ia ʻo ʻetau fiefiá.​—Sāme 126:3.