“Ko e Mileniume Foʻoú—Ko e Hā ʻOku Tauhi Mai ʻe he Kahaʻú Maʻaú?”
1 Ko e fehuʻi ko iá kuo ʻi he ngaahi ʻatamai ia ʻo e kakai takatakai ʻi he foʻi māmaní. Neongo ʻa hono fakahoko ʻe he faʻahinga ʻo e tangatá ʻa e meʻa lahi ʻi he ngaahi senitulí, ʻoku fakaʻataʻatā ʻe he kakaí honau lotó koeʻuhí he ko e ngaahi palopalema tefito kuó ne fakahohaʻasi ʻa e faʻahinga ʻo e tangatá ʻi he ngaahi mileniumé ʻoku kei hoko pē ia. (Siope 14:1; Sāme 90:10) ʻOku lava ke maʻu mei fē ʻe he faʻahinga ʻo e tangatá ʻa e fakafiemālié?
2 Lolotonga ʻa e māhina ko ʻOkatopa mo Nōvemá, te tau maʻu ai ha faingamālie makehe ke ʻoatu ki hotau ngaahi kaungāʻapí ʻa e tali ki he fehuʻi ko iá. ʻO anga-fēfē? Fakafou ʻi hono tufa ʻa e Ongoongo ʻo e Puleʻangá Fika 36. ʻOku fakakaveinga ia “Ko e Mileniume Foʻoú—Ko e Hā ʻOku Tauhi Mai ʻe he Kahaʻú Maʻaú?” Lolotonga ʻa e ʻuluaki konga ʻo ʻOkatopá, te tau tuʻuaki ai ʻa e ngaahi makasini Taua Leʻo mo e Awake! Pea mei he Mōnité leva, ʻOkatopa 16, ki he Falaite, Nōvema 17, te tau kau ai ki hano tufaki lahi ʻa e Ongoongo ʻo e Puleʻangá Fika 36. ʻI he lolotonga ʻa e feingangāue ko ʻení, te tau tokangataha ai ki hono tufaki ʻa e Ongoongo ʻo e Puleʻangá Fika 36 ʻi he ngaahi ʻaho lolotonga ʻo e uiké. ʻI he ngaahi fakaʻosinga ʻo e uiké, te tau tuʻuaki ai ia fakataha mo e ngaahi makasini lolotongá.
3 Te Ke Kau Kakato ki Ai? Ko e kau mātuʻá, kau sevāniti fakafaifekaú, pea mo e kau tāimuʻá te nau loto ke takimuʻa ʻi he feingangāue ko ʻení, koeʻuhí he ko kinautolu ʻoku takimuʻa ʻi he ngāué. Kuo feʻunuʻaki ʻe he kau malanga tokolahi honau ngaahi tuʻungá ka nau tāimuʻa tokoni he lolotonga ʻo e māhina ʻe taha pe ua ʻo hono fai ʻo e tufá. ʻOku palani ʻa e niʻihi kehe ke fakamoleki ha taimi lahi ange ia mei he taimi ko ia ʻoku angaʻaki ʻi he ngāue fakafaifekaú.
4 Ko e kau faiako ʻo e Ako Tohi ʻa e Fakatahaʻangá ʻoku lava ke ngāueʻaki kinautolu ki hono fakalototoʻaʻi ʻa e mēmipa kotoa pē ʻo ʻenau kulupú ke nau kau kakato ki hono tufaki ʻa e Ongoongo ʻo e Puleʻangá Fika 36. ʻOku ʻi ai nai ha kau malanga ʻe niʻihi kuo nau hoko ʻo ʻikai longomoʻui ʻi he ngāue fakamalangá. ʻOku totonu ki he kau mātuʻá ke nau ʻaʻahi ki he faʻahingá ni ke sio pe ko e hā ha meʻa ʻe lava ke fai ke tokoniʻi ai kinautolú. Mahalo pē ko ha ngaahi fokotuʻutuʻu ʻe lava ke fai ki ha tokotaha malanga taukei ke ngāue fakataha mo e tokotaha ʻikai longomoʻui taki taha ʻi he ngāue fakamalangá he lolotonga ʻo e ongo māhina ko ʻení. Ko e tuʻuaki faingofua ʻo e Ongoongo ʻo e Puleʻangá Fika 36 ko e meʻa pē ia ʻoku fiemaʻu ke toe fakafoki mai ʻaki ʻa e kau malanga ko ʻení.
5 ʻE hoko ʻeni ko ha faingamālie lelei ki he kau ako Tohitapu ʻoku nau mei ʻosiki ʻa e tohi ʻIlo pea ʻoku nau taau ko e kau malanga teʻeki ai papitaisó ke nau kamata ke kau ki he ngāue fakafaifekaú. Naʻa mo e kau talavoú ʻe lava ke nau kau lelei ki he ngāue fakafiefia ko ʻení.
6 Ko e meʻa pē ʻoku fiemaʻú ko ha tuʻuaki faingofua. Te ke pehē nai:
◼ “ʻOku ou foaki loto-lelei atu hoku taimí ke tokoni ki hono tufa ʻa e pōpoaki mahuʻinga taha ko ʻení ki he fāmili kotoa pē ʻi [hingoa ʻo e koló pe vahefonuá]. Ko hoʻo tatau ʻeni. Kātaki ʻo lau ia.” ʻOku lelei nai ke ʻoua ʻe ʻave ha kato malanga ʻi hono tufa ʻa e Ongoongo ʻo e Puleʻangá Fika 36.
7 Ngaahi Fakataha ʻOsi Teuteuʻi Lelei ki he Ngāue Fakamalangá: Kuo pau ki he kau mātuʻá ke nau sio ko e ngaahi fokotuʻutuʻu ki he ngāue fakaefakamoʻoní ʻoku fakatou faingamālie mo ʻaonga. ʻOku tautefito ki he ʻovasia ngāué ʻa e totonu ke ne fakapapauʻi ʻoku lahi ʻa e feituʻu ngāue fale-ki-he-fale mo e feituʻu fakapisinisi ʻoku maʻú koeʻuhí ke malava ʻa e tokotaha kotoa pē ke kau kakato ki he ngāué. Kapau ʻe malava, ʻoku totonu ke fokotuʻutuʻu ʻa e ngaahi fakataha ngāue fakamalangá ki he ʻaho ʻo e uike taki taha, ki he ngaahi fakaʻosinga ʻo e uiké, pea ki he efiafí. ʻOku lava ke fai ha ngaahi fokotuʻutuʻu ke fai ha fakataha ʻi he efiafí koeʻuhi ke ʻaonga ki he fānau akó, kau ngāue sifí pea mo e niʻihi kehé.
8 Meʻa ke Fai Fekauʻaki mo e ʻIkai-ʻi-ʻApí: Ko ʻetau taumuʻá ke tau lea ki he tokotaha-ʻapi lahi taha ʻe malavá. Kapau ʻoku ʻikai ha taha ʻi ʻapi ʻi he taimi ʻokú ke ʻaʻahi atu aí, tohiʻi ʻa e tuʻasilá peá ke toe ʻaʻahi ki ai ʻi ha taimi kehe ʻo e ʻahó. Kapau ko e uike fakaʻosi ʻo e feingangāué ʻoku ʻikai te ke lavameʻa ʻi he feʻiloaki mo e faʻahinga ko ʻeni ʻi he ʻapí, te ke tuku nai maʻanautolu ha tatau ʻo e Ongoongo ʻo e Puleʻangá Fika 36 ʻi ha feituʻu ʻe ʻikai ke sio atu ki ai ʻa e faʻahinga ʻoku feʻaluʻakí. ʻE fakahinohinoʻi nai ʻe he kau mātuʻa fakalotofonuá ʻa e fakatahaʻangá ke tuku ha tatau ʻo e Ongoongo ʻo e Puleʻangá Fika 36 ʻi he ngaahi ʻikai-ʻi-ʻapí ʻi he ʻuluaki ʻaʻahí he taimi ʻoku fai ai ʻa e ngāué ʻi he ngaahi feituʻu ʻutá pea mo e ngaahi feituʻu ʻoku lahi ange ka ʻe ʻikai malava ke ngāueʻi he lolotonga ʻo e feingangāué.
9 ʻAi Ke Tau Femoʻuekina! ʻOku totonu ki he ngaahi fakatahaʻangá ke nau feinga ke ngāueʻi honau feituʻú ki muʻa ʻi he ngataʻanga ʻo e feingangāué ʻi Nōvema 17. Kapau ʻoku lahi ho feituʻú, ʻe ngāue toko taha nai ha kau malanga ʻe niʻihi ʻi ha feituʻu ko ē ʻoku ʻaonga mo malú. Ko e fokotuʻutuʻu ko ʻení ʻe ʻai ai ke faingofua ke aʻu ki he faʻahinga taau tokolahi taha ʻe malavá. Fakapapauʻi ke tauhi ha lēkooti lelei ʻo e mahuʻingaʻia kotoa pē naʻe maʻú.
10 ʻOku totonu ke tomuʻa fakakaukau atu ʻa e kau mātuʻá ki he lahi ʻo ha toe ngaahi makasini ʻe fiemaʻu ʻe he fakatahaʻangá pea ʻota pē ʻo fakatatau ki ai. ʻOku ʻikai fiemaʻu ke ʻota ʻa e Ongoongo ʻo e Puleʻangá Fika 36, koeʻuhí he ʻe fakafolau atu pē ha ngaahi tatau ki he fakatahaʻanga taki taha. ʻE maʻu ʻe he kau tāimuʻa makehé, tuʻumaʻú, mo e tokoní ʻa e ngaahi tatau ʻe 250 ki he tokotaha taki taha ke tufa, lolotonga iá ko e kau malanga ʻa e fakatahaʻangá ʻe ʻoatu ki ai ʻa e ngaahi tatau ʻe 50 ki he tokotaha taki taha. Ko ia, ʻokú ke mateuteu mo vēkeveke ke ke femoʻuekina ʻi he ngāue makehe ko ʻení? Ko ha monū ē kiate kitautolu ke tau ʻai ʻa e tokotaha kotoa pē ʻi hotau ngaahi kaungāʻapí ke nau ʻilo ʻa e meʻa ʻoku talaʻofaʻaki ʻe he ʻOtuá ki he kahaʻu vave maí!