Hoko ʻo “Fai Velega ae Gaahi Gaue Lelei” Lolotonga ʻo ʻEpelelí!
1 ʻI he taʻu kuo ʻosí naʻe fai ai ha fakamoʻoni taʻealafakatataua ʻi hono tufaki ʻi māmani lahi ʻa e laui miliona ʻo e ngaahi tatau ʻo e Ongoongo ʻo e Puleʻangá Fika 34. Ko e kau malanga mo e kau tāimuʻa ʻi he fakatahaʻangá naʻa nau tatau kotoa pē ʻi he kau faivelenga ʻi he ngāue fakavavevavé ni. Naʻá ke ʻi he lotolotonga ʻo kinautolú? Kapau naʻá ke kau ki ai, ʻoku ʻikai ha toe veiveiua naʻá ke mātuʻaki fiefia ʻi he hoko ko ha konga ʻi he feingangāue fakaofo ko iá. Ka ʻokú ke fifili nai, Ko e hā ʻa e “gaue lelei” ʻoku tuku tauhi mai maʻatautolu ki he taʻu ní?—Tai. 2:14, PM.
2 ʻI he lolotonga ʻo ʻEpeleli pea mo e kamataʻanga ʻo Mē, te tau maʻu ʻa e fiefia ʻi hono tufaki ʻa e ngaahi pulusi makehe ʻo e ngaahi makasini Taua Leʻo mo e Awake!, pea kau atu ki ai mo e tatau ʻo e Awake! faka-Pilitānia ʻo ʻEpeleli 22, 1996, ʻa ia ʻoku fakaeʻa ai ʻa e “Taimi ʻE ʻIkai Toe ʻI Ai ha Tau.” Koeʻuhi ko e ngaahi kaveinga ʻi he ngaahi makasiní ʻe fakamānako ki he tokotaha-ʻapi tokolahi, te tau feinga mālohi ke ʻoatu ʻa e ngaahi makasiní ki he lahi taha ʻe malava ke tufakí. ʻI he vakai atu ki he mahuʻinga ʻo e fakamatala ʻi he ngaahi tataú ni, ʻoku totonu ke tau fakaʻaliʻali ia ʻi he lolotonga ʻo ʻEpeleli pea mo Mē, kaeʻoua kuo ʻosi ʻa e meʻa ʻoku tokonaki mai ko iá.
3 Ko ʻEtau Taumuʻá—Ke Kau ki ai ʻa e Kau Malanga Kotoa Pē: ʻOku fakalototoʻa moʻoni kapau ko e tokotaha malanga kotoa pē ʻi he fonuá ni ʻe lava ke nau kau ki he ngāue fakamalangá he lolotonga ʻo ʻEpelelí. ʻI he toki ʻosi atu hono Fakamanatu ʻo e pekia ʻa Kalaisí, te tau fakapapauʻi ke fakahā ʻetau houngaʻia ki he anga-lelei ʻa e ʻOtuá ʻaki hono ʻoatu ha “feilaulau fakafetaʻi” ʻi he ngāue fakamalangá.—Hep. 13:15.
4 ʻOku totonu ke fai ha feinga tōtōivi ke ʻiloʻi ʻa e ngaahi fiemaʻu ʻa e mēmipa kotoa pē ʻi he fakatahaʻangá koeʻuhi ke lava kotoa ʻo kau faivelenga ki he ngāue fakafaifekaú he lolotonga ʻo ʻEpelelí. (Loma 15:1) Ko e kau faiako ʻo e ako Tohí ʻoku totonu ke nau lāuʻilo ki he ngaahi tuʻunga ʻo e faʻahinga ʻi heʻenau ngaahi kulupú pea fai ha tokoni ʻaonga ʻoku fiemaʻú. ʻOku fiemaʻu ki ha taha ha meʻalele ke heka ai? Ko hai ʻe lava ke ne tokonaki iá? ʻOku ʻi ai ha niʻihi ʻoku loto-siʻi pe mā? ʻE lava ke ngāue fakataha mo kinautolu ha kau malanga taukei ange? Fēfē ʻa e faʻahinga ʻoku toka mohenga pe faʻahinga ʻoku mahamahakí? ʻE lava ke nau kau ʻi he faifakamoʻoni ʻi he telefoní, fai ha tohi, pe ʻi ha faʻahinga ngāue pē ʻe ola lelei?
5 Ko e niʻihi kuo nau hoko ʻo ʻikai longomoʻui kuo nau maʻu maʻu pē ha fakalototoʻa fakalaumālie, pea ʻoku ueʻi nai kinautolu ke nau toe kau ki he ngāue fakamalangá. Ko e feingangāue mo e Awake! makehé ni ʻe tokonaki mai ai maʻanautolu ha faingamālie lelei ʻaupito ke nau toe hoko ʻo longomoʻui.
6 Akoʻi ʻa e Faʻahinga Kei Talavoú ke Kau ki Ai: Tokolahi ʻa e fānau ʻa e Kau Fakamoʻoni ʻa Sihová kuo nau ngāue fakataha mo ʻenau ngaahi mātuʻá mei he fale ki he fale ʻi he ngaahi taʻu lahi, neongo ʻoku teʻeki ai ke nau ngāue ko e kau malanga teʻeki papitaiso. Ko e taimi ʻeni kiate kinautolu ke kamata aí? ʻOku ueʻi kinautolu mei he lotó pea mateuteu ke kau fakamātoato ki he ngāue fale-ki-he-falé? Ko e ngaahi ʻulu ʻo e fāmilí ʻoku totonu ke nau ngāueʻaki ʻa e taimi he lolotonga ʻo e ako Tohitapu fakafāmilí ke tokoniʻi ai ʻenau fānau kuo taaú ke nau teuteu ha tuʻuaki ʻoku feʻunga ki he taʻumotuʻa mo e malava ʻa e tokotaha taki taha. Ko e kau taʻumotuʻa angé ʻe lava ke nau fili ha fehuʻi fakatupunga fakakaukau ʻa ia te ne langaʻi ʻa e mahuʻingaʻia ʻa e tokotaha-ʻapí pea toki fakahā ange ʻa e talí ʻi he makasiní. Ko e fānau iikí ʻe lava ke nau fai ha fakamoʻoni ola lelei ʻi ha ngaahi lea nounou pē. Ko e fakatātaá, ʻe lava ke nau fakalototoʻaʻi ʻa e tokotaha-ʻapí ke ne lau ʻa e makasini makehe ko ia ʻoku lolotonga tufaki ʻi māmani lahi he māhiná ni.” ʻI he konga ʻo hoʻo teuteu fakafāmilí, fakapapauʻi ke fakakau atu ki ai ha ngaahi fokotuʻu ki hono ikuʻi ʻa e ngaahi fakafaingataʻaʻia ʻoku faʻa hokó. ʻE lava ke ke maʻu ha ngaahi fakakaukau lelei lahi ʻi he tohi Reasoning. ʻI he taimi kaí pea mo ha ngaahi taimi feʻungamālie kehe, fakalototoʻaʻi ʻa e ngaahi mēmipa ʻo e fāmilí ke nau lave ki ha meʻa naʻe hoko naʻa nau fetaulaki mo ia ʻi he ngāue fakamalangá.
7 Ko e Kau Ako Tohitapu Taaú ʻOku Nau Hokohoko Atu ʻa e Ngāue Naʻe Fai ʻe Sīsuú: Naʻe ʻikai ke fakangatangata pē ʻa e akonaki ʻa Sīsuú ki hono ʻoatu ʻa e fakahinohino ki he ngaahi meʻa fakatokāteliné. Naʻá ne ngāue fakataha mo ʻene kau akó ʻi he ngāue fakafaifekaú pea akoʻi kinautolu ki he founga hono fai ʻo e malangá. (Luke 8:1; 10:1-11) Ko e hā leva ʻa e tuʻunga ʻi he ʻaho ní? ʻOku laka hake ʻi he ngaahi ako Tohitapu ʻe fitungeau ʻoku fai ʻi he ngaahi fonua he malumalu ʻo e vaʻa ʻi Haʻamoa Hihifó. ʻOku ʻikai ha veiveiua, ʻi ha fakalototoʻa feʻungamālie ko e tokolahi ʻo e kau akó ʻe lava ke nau hoko atu ki he lākanga hono hokó ʻi heʻenau akó pea taau ke ngāue ko ha kau malanga teʻeki papitaiso ʻi ʻEpeleli.
8 Kapau ʻokú ke fai ha ako Tohitapu, fakakaukau ki he ngaahi fehuʻí ni: ʻOku fai ʻe he tokotaha akó ha fakalakalaka, ʻo taau mo hono taʻumotuʻá pea mo e malavá? Kuó ne kamata ke ne fakahā atu ʻene tuí ʻi ha founga ʻikai anga-maheni ki he niʻihi kehé? Kuó ne ʻai ʻa e “tangata foʻou”? (Kol. 3:10) ʻOkú ne aʻusia ʻa e poto taau ki he kau malanga teʻeki papitaisó, ʻa ia ʻoku fakamatalaʻi ʻi he peesi 97 ki he 99 ʻo e tohi Our Ministry? Kapau ʻokú ke tui kuó ne taau, ko e hā ʻoku ʻikai te ke pōtalanoa ai ki he meʻá ni fakataha mo iá? Ko e kau ako ʻe niʻihi ʻoku fiemaʻu pē ki ai ha fakaafe fakahangatonu ke kau ʻi he ngāué. Ko ia ai, kapau ʻoku loto-lelei ki ai ʻa e tokotaha akó, ʻe ʻuluaki fiemaʻu ki he ʻovasia tauhí ke fokotuʻutuʻu ʻi he founga ʻoku faʻa angaʻakí ki ha fetalanoaʻaki mo e toko ua ʻo e kau mātuʻá. ʻI he tafaʻaki ʻe tahá, ko ha meʻa nai te ne taʻotaʻofi ʻa e tokotaha akó. Mahalo pē ko ha taha ʻo e kau mātuʻá te ne ʻalu fakataha mo koe ki ha ako Tohitapu peá ne lea tauʻatāina ki he tokotaha akó ʻo fekauʻaki mo ʻene ngaahi ongoʻi ʻo kau ki he moʻoní. ʻI he hili ʻa e fanongo ki he meʻa ʻe leaʻaki ʻe he tokotaha akó, ʻe lava nai ʻe he tokotaha mātuʻá ke ne ʻoatu ha ngaahi fokotuʻu ʻaonga, fakataha mo e tokoni Fakatohitapú.
9 “Lamalama ke Ngaueʻaki ʻa e Faingamālie” ke Tāimuʻa Tokoni: ʻI he taʻu taki taha lolotonga ʻa e faʻahitaʻu Fakamanatú, ko e loto-hounga ki he feilaulau huhuʻí ʻokú ne ueʻi ai ʻa e kau malanga tokolahi ke “lamalama” ha taimi ke hoko ko e kau tāimuʻa tokoni. (ʻEf. 5:15-17) Neongo ʻoku fiemaʻu ʻa e ngaahi feilaulau ʻe niʻihi, ko e tāpuakí ʻe lahi. Ko ha kau talavou ʻoku taau ke fakaongoongoleleiʻi ʻoku nau ngāueʻaongaʻaki ʻa e taimi mālōlō mei he akoʻangá ke kau ki he tāimuʻa tokoní. Ko e kakai lalahi ʻoku nau ngāue taimi-kakató ʻoku nau ngāueʻaki ʻa e taimi efiafí mo e ngaahi fakaʻosinga ʻo e uiké ke maʻu ʻa e ʻaonga kakato ʻi he ngāue tatau pē ko ʻení. Ko ai ai, kuo hoko ʻo ʻiloa ʻa e ngaahi fāmili fakalūkufua ʻoku nau kau fakataha ki he tāimuʻa tokoní! ʻI he ngaahi fakatahaʻanga ʻe niʻihi ko e tokolahi taha ʻo e kau mātuʻá mo e kau sevāniti fakafaifekaú pea mo honau ngaahi uaifí ʻoku nau hoko ko e kau tāimuʻa tokoni. ʻI hono ueʻi ʻe heʻenau faʻifaʻitakiʻanga faivelengá, kuo muimui ai ha niʻihi, ʻa ia ko e peseti lahi ʻi he fakatahaʻangá te nau ngāue tāimuʻa tokoni ʻi ʻEpeleli.
10 Pe ʻoku malava ke ke tāimuʻa tokoni pe ʻikai, vakaiʻi ha ngaahi founga ke toe fakalahi ai hoʻo ngāue fakamalangá he lolotonga ʻo ʻEpelelí. Fokotuʻu ha kolo fakafoʻituitui maʻau, ha taha ko ē ʻe fiemaʻu ha feinga ki ai ke aʻusia kae kei ala lavaʻí. Ko hoʻo holí ke ‘mahomo atu hoʻo meʻá, ʻio, ke ʻosi atu mo koe foki’ ki he ngāue ʻa Sihová, ʻo fakatatau ki ho ngaahi tuʻunga fakafoʻituituí, te ke maʻu ai ʻene tāpuakí.—2 Kol. 12:15.
11 Ngaahi Fakataha ki he Ngāue Fakamalangá: ʻOku totonu ke fai ha fokotuʻutuʻu ki he ngaahi fakataha ki he ngāue fakamalangá ʻi he ʻaho kotoa pē ki he feingangāue ki he Awake!, ʻi ha taimi ko ia ʻe faingamālie ai ki ha kamata tōmuʻa ʻi he ngāue fakafaifekaú. ʻOku totonu ke fokotuʻutuʻu mo e ngāue fakamoʻoni ʻi he efiafí. Ko e kau malanga tokolahi te nau kau ki he ngāue fakamalangá ʻi he ngaahi fakaʻosinga ʻo e uiké, ʻa ia ʻoku totonu ki he ngaahi fakatahaʻangá ke fakataimitēpileʻi ʻa e ngaahi fakataha ki he ngāue fakamalanga ʻi he Tokonaki, fakatouʻosi ʻi he pongipongí mo e efiafí, koeʻuhi ko e vahaʻa taimi ki hono tufaki ʻo e Awake! makehé ni.
12 Ko kinautolu ʻoku nau tataki ʻa e ngaahi fakataha ki he ngāue fakamalangá ʻoku totonu ke nau fakapapauʻi ʻoku kei lahi ʻa e ngaahi feituʻu ʻoku toé. Ko e feituʻu ko ia ʻoku teʻeki ke ngāueʻi ki mui maí ʻoku totonu ke tomuʻa fakaʻosi ia. Kae kehe, ko e feituʻu ko ia ʻoku ʻikai vaheʻi mai ʻa ē ʻoku tokangaʻi ʻe he Sōsaietí ʻoku totonu ke ʻoua ʻe ngāueʻi ia kaeʻoua kuo fakangofua mai ʻe he Sōsaietí. ʻOkú ke kei maʻu ha taha pe ua ʻo e ngaahi feituʻu tāutaha ko ia kuo teʻeki ai ke fakaʻosi ki muí ni maí? Kapau te ke fiemaʻu ha tokoni ki hono ngāueʻi kinautolu he lolotonga ʻo e feingangāué, lea ki he ʻovasia ngāué pe ki he tokoua ʻokú ne tokangaʻi ʻa e ngaahi feituʻú pea te na fiefia ke fokotuʻutuʻu ke ke maʻu ha tokoni ʻe niʻihi.
13 Ko e Hā Hono Lahi ʻo e Ngaahi Makasini Te Ke Tufá? Ko e fehuʻi ko iá ʻoku ʻi he tokotaha tāutaha ke ne tali. ʻI hono fakapapauʻi ʻa e lahi ʻo e ngaahi makasini te ke malava ke tuku atu he lolotonga ʻa e feingangāué, fakakaukau atu ki he anga ʻo e feituʻu te ke ngāue aí, ko ho taʻumotuʻá, ko ho tuʻunga moʻui leleí, mo e taimi ʻe lava ke ke ngāueʻaki ʻi he ngāué, pea mo e ngaahi meʻa kehé. Kae kehe, fakatokangaʻi ʻa e fakamanatu naʻe ʻomai ʻi he tatau ʻo e Taua Leʻo ʻo Mē 1, 1994: “Ko ha fokotuʻu, ko e kau malangá te nau fokotuʻu nai ha kolo, tau pehē ko e makasini ʻe 10 he māhina, ʻo makatuʻunga pē ʻi honau ngaahi tuʻungá; pea ko e kau tāimuʻá te nau feingaʻi nai ʻa e 90.” ʻE ʻi ai ha taumuʻa tatau pehē moʻoni ʻo fakatatau ki ho tuʻungá?
14 Kau Mātuʻa—ʻOku Fiemaʻu ʻa e Fokotuʻutuʻu Lelei: Kapau ʻoku malava, fakapapauʻi ko e feituʻu kotoa pē ki he fakatahaʻangá ʻe ngāueʻaki ai ʻa e tatau makehe ʻo e Awake! ʻOku totonu ke fai ha tokanga lelei ki hono ngāueʻi ha feituʻu fakapisinisi pē kuo vaheʻi ki he fakatahaʻangá. Ko kinautolu ʻoku nau ngāue aí ʻoku totonu ke nau teuteu lelei pea vala taau. ʻOku ʻikai ke fiemaʻu ha tuʻuaki faingataʻa. ʻI haʻo lea ki ha tangata pisinisi, ʻe lava ke ke pehē ʻoku ʻikai te ke faʻa fetaulaki mo e kakai pisinisí ʻi honau ʻapí, ko ia ai ʻokú ke ʻaʻahi atu ai ʻi he feituʻu ngāueʻanga ʻokú ne ʻi aí ke fakaʻaliʻali ʻa e kaveinga ʻe hoko ʻo mahuʻinga kiate iá. Pea ʻe lava leva ke ke fakamatala nounou ha poini mahino mei he makasiní. Ko e faifakamoʻoni ʻi he halá mo e ngaahi makasiní ʻoku totonu ke fokotuʻutuʻu lelei ʻi he feituʻu ngāue ʻa e fakatahaʻangá. Ko e founga lelei taha ke kau ai ʻi he ngāue he halá ko ʻete tomuʻa kamata ke fakaofiofi atu ki he faʻahinga ʻoku tau fetaulakí, ʻo ʻikai ko e tatali pē ke nau toki fakaofiofi mai kiate koe. Koeʻuhi ʻe fakatokangaʻi koe ʻe he kakaí, ʻoku totonu ke ke tokanga ki ho fōtunga hā maí. ʻE ʻi ai nai ha ngaahi feituʻu kehe ʻi ho feituʻú ʻe lava ke ngāueʻi lolotonga ʻa e feingangāué, hangē ko e ngaahi malaʻe vakapuná, ngaahi falemahakí, ngaahi tauʻanga meʻalelé, ngaahi paʻaké, pea mo e ngaahi māketí. Ko e kulupu ʻo e kau mātuʻá ʻoku totonu ke nau fakapapauʻi pe ko e hā ʻa e ngaahi fokotuʻutuʻu feʻungamālie ʻe lava ke fai ki he fakamoʻoni ʻi he ngaahi feituʻu ko ʻeni ʻoku ʻi ai hoʻo fakatahaʻangá.
15 Ko Sihová ko ha tokotaha ngāue mālohi. (Sione 5:17) Naʻá ne fakatupu ʻa hēvani pea mo māmani pea pehē ki he ngaahi ʻakaú pea mo e fanga manú; ka naʻá ne kei hokohoko atu ke ngāue kaeʻoua kuó ne fakatupu ʻene ngāue tuʻu-ki-muʻa taha ʻi he māmaní—ko e tangatá. Ko e moʻoniʻi meʻa ko ia ʻoku tau maʻu ʻa e moʻuí ko ha ola fakahangatonu ia ʻo e loto-lelei ʻa e ʻOtuá ke ngāué. ʻI he tuʻunga ko e kau “faʻifaʻitaki ki he ʻOtua,” ʻoku totonu ke ueʻi kitautolu ʻe heʻetau ʻofa kiate iá ke tau hoko ʻo “fai velega ae gaahi gaue lelei.” (ʻEf. 4:32 [5:1, PM]; Tai. 2:14, PM) Koeʻuhi ʻoku taau mo Sihova ke ne maʻu ʻetau lelei tahá pea koeʻuhi ko e holi ke maʻu ʻa e ngaahi olá ʻa ia ko e anga ia ʻo e faʻahinga ʻoku nau faivelengá, ʻoku totonu ke tau houngaʻia ʻi hono fakahoko ʻa e ngāue lelei tahá ʻi he ngāue fakafaifekaú. ʻOku hā mahino, ʻoku houngaʻia ʻa Sihova ʻi ha faʻahinga feilaulau pē ʻoku tau fai kiate ia, pea ko ʻetau ngāué ʻoku ʻikai ʻaupito ke laufānō ia. (1 Kol. 15:58) Ko ia, ʻi he loto-houngaʻiá, ʻofa ke tau kau faivelenga ki he ngāué ni he lolotonga ʻo ʻEpelelí, ʻo tui pau ki he hōifua ʻa Sihová mo ʻene tāpuakí pea mo e lavameʻa lahí!