ʻE Lava Ke Tau ʻAi ʻa ʻEpeleli 2000 ko Hotau Māhina Lelei Tahá Ia?
1 ʻI he efiafi Pulelulu, ʻEpeleli 19, ʻe fakaeʻa ai ʻetau ngāue ʻi he taʻú. ʻI he ʻaho ko iá, ʻi he tō māmālie hifo ʻa e laʻaá takatakai ʻi he foʻi māmaní, ko e fakatahaʻanga mo e kulupu kotoa pē ʻa e Kau Fakamoʻoni ʻa Sihová ʻi māmani lahí te nau fakahoko ai ʻa e Fakamanatu ʻo e pekia ʻa Kalaisí. ʻI ha taimi pē ʻi he feituʻu ʻoku tau nofo aí, ko hono fakamanatu ʻo e feilaulau ʻa Sīsū Kalaisí ʻe hoko ia ko e meʻa mahuʻinga ʻo e taʻú. Ko e ʻaho ʻo e Fakamanatú ʻoku fakaʻilongaʻi ia ʻi he māhina ko ʻEpelelí ʻi he 2000 Calendar of Jehovah’s Witnesses.
2 ʻOku ʻomai ʻe he māhina fakakātoa ko ʻEpelelí kiate kitautolu ha faingamālie fakaofo ke fakahāhaaʻi ʻi ha founga ʻaufuatō ʻetau houngaʻia ʻi he ʻaloʻofa maʻataʻatā ʻa Sihova kuo fakahaaʻi fakafou ʻi he feilaulauʻi ʻo hono ʻAló. ʻO anga-fēfē ia? Naʻe tohi ʻa e ʻapositolo ko Paulá: “ʻOku loki kimautolu ʻe he ʻofa ʻa Kalaisi; he naʻe pehe ʻemau fakakaukau, Naʻe mate ha toko taha ko e fetongi ʻo e kakai kotoa pe: pea ta naʻe mate ai kotoa pe: pea ko ʻene mate ʻo fetongi ʻa e kakai kotoa pe naʻe fai koeʻuhi ke ʻoua naʻa toe moʻui maʻanautolu ʻa e kakai ʻoku moʻui, ka maʻae toko taha ko ia, ʻa ia naʻá ne pekia mo toetuʻu ko honau fetongi.” (2 Kol. 5:14, 15) ʻIo, he lolotonga ʻo ʻEpelelí ʻe lava ke tau fakahaaʻi ai ʻoku tau moʻui, ʻo ʻikai maʻatautolu, ka maʻá e tokotaha ko ia naʻe pekia maʻatautolú, ʻo ʻai eni ko hotau māhina lelei tahá ia ʻi he tuʻunga ko e kau faifekau ʻo e Puleʻangá!
3 Kau ki he Tāimuʻa Tokoní ʻi ʻEpeleli: Naʻe fokotuʻu ʻe he ʻapositolo ko Paulá ha faʻifaʻitakiʻanga fakaueʻiloto maʻatautolu ʻi he taimi naʻá ne pehē ai: “Talāʻehai ʻoku ou lau ʻeku moʻui ko e meʻa mahuʻinga, pē tatau kiate au mo e lava o ʻeku fakapuepue, mo e lakanga naʻa ku maʻu mei he ʻEiki ko Sisū, ke talatalatonu ʻa e Kosipeli ʻo e kelesi ʻa e ʻOtua.” (Ng. 20:24) ʻOku tau maʻu ʻa e monū tatau ko hono fai ha fakamoʻoni fakaʻāuliliki fekauʻaki mo Sihova ko e ʻOtuá. Ki he taumuʻa ko iá, te tau saiʻia ke ʻai ʻa ʻEpeleli ko hotau māhina lelei tahá ia ʻi he ngāue tāimuʻa tokoní!
4 ʻI hono fakaʻosinga ʻo e uike kakato ʻe nimá, ʻe hoko ʻa ʻEpeleli 2000 ko ha māhina lelei taha ia ki he tokolahi ki he tāimuʻá. ʻI ʻEpeleli 1998, ʻi he taimi naʻa tau aʻusia ai ʻetau tumutumu lahi taha ʻo e kau tāimuʻa tokoní, ko e toko 14 ʻa ia naʻa nau kau ki aí naʻa nau fakafofongaʻi ʻa e peseti ʻe 14 ʻo e kau malangá fakakātoa. ʻI he taʻu ʻe taha mo e māhina ʻe fā ki muí, ko e tokolahi fakakātoa ʻo e kau malanga ko ia naʻa nau līpooti ʻi ʻAokosi 1999 naʻe tupulaki hake ʻaki ʻa e peseti ʻe 23. ʻOku ʻuhinga ʻení ʻoku tau maʻu ʻa e malava lahi fakaʻulia ke fakalaka ʻi heʻetau tumutumu ki muʻa ʻo e kau tāimuʻa tokoní. Tānaki atu ki ai, ko e houa ʻoku fiemaʻú kuo holoki hifo talu mei ai, ʻo ʻai ai ʻa e tafaʻaki ko ʻeni ʻo e ngāué ke faingofua ki he tokolahi ange ʻi he fakatahaʻangá. Ko e tokotaha ʻosi papitaiso taki taha ʻoku totonu ke ne fakakaukau faʻa lotu pe te ne malava ke tāimuʻa tokoni ʻi ʻEpelelí ni.
5 ʻI hono ngāueʻaki ʻo e māhina ko ʻEpelelí ʻi he 2000 Calendar, palani hoʻo taimi-tēpilé he taimí ni ki he māhina hoko maí. Fakakaukau pe ko e ngaahi ʻaho fē te ke malava ai ʻo kau ki he ngāue fakamalangá, pea tānakiʻi fakakātoa ʻa e ngaahi houa ʻa ia ʻokú ke ongoʻi te ke malava ke līʻoa ki he ngāue fakamalangá he lolotonga ʻo e māhiná. Fakakau atu mo e taimi te ke malava ʻo fakamoleki ʻi he faifakamoʻoni ki he niʻihi kehé fakatouʻosi ʻi he founga anga-mahení mo e founga ʻikai anga-mahení. ʻOku ofiofi ʻa e fakakātoá ki he houa ʻe 50 ʻoku fiemaʻu ki he kau tāimuʻa tokoní? Kapau ʻokú ke tōnounou ʻi he ngaahi houa ʻoku fiemaʻú, ʻoku lava ke ke fai ha ngaahi fengaʻunuʻaki kehe ʻi hoʻo taimi-tēpilé koeʻuhí ka ke fakatau mai ha taimi ki he tāimuʻa tokoní? Te ke fiemaʻu ke fakaʻavalisi ʻa e houa pē ʻe taha mo e miniti ʻe 40 ʻi he ʻaho taki taha ke aʻusia ʻa e houa ʻe 50 ki he māhiná.
6 Koeʻuhi kuo toe tuku hifo he taimí ni ʻa e houa ʻoku fiemaʻu ki he kau tāimuʻa tuʻumaʻú, kuó ke fakakaukau ke hū ki he ngāue fakafaifekau taimi-kakató? ʻI he ʻosi atu ʻa e taimi momokó, ʻe hoko ʻa ʻEpeleli ko ha māhina lelei ia ke kamata ai! Kapau ʻokú ke taʻepauʻia fekauʻaki mo hoʻo malava ke aʻusia ʻa e houa ʻe 70 ʻoku fiemaʻu ki he kau tāimuʻa tuʻumaʻú, ko e hā ʻoku ʻikai te ke tāimuʻa tokoni ai ʻi ʻEpeleli pea fokotuʻu ai ʻa e houa ʻe 70 ko hoʻo taumuʻá iá? ʻI hoʻo sio pē te ke malava ʻo fai iá, te ke hehema lahi ange nai ai ke ke kole ke kau ʻi he ngaahi tuʻunga ʻo e kau tāimuʻa tuʻumaʻú ʻi he vave taha ʻe malavá.—Sio ki he Our Ministry, peesi 113-114.
7 Kau Kakato ko ha Tokotaha Malanga ʻo e Ongoongo Leleí: Kiate kitautolu kotoa, tatau pē ʻa e kau malangá mo e kau tāimuʻá, ko ʻetau ʻofa moʻoni ki he ʻOtuá mo e kaungāʻapí ʻokú ne ueʻi kitautolu ke fai ʻaufuatō ʻa e kotoa te tau malavá ʻi he ngāue ʻa Sihová ʻo fakatatau ki hotau ngaahi tuʻunga fakafoʻituituí. (Luke 10:27) ʻOku tau fakahaaʻi ai ʻoku “tau fakafitefitaʻa ki ai mo tau, koeʻuhi kuo tuʻu ʻetau falala ki he ʻOtua Moʻui, ʻa ia ko e Fakamoʻui ʻo e kakai kotoa pe, kae lahi kiate kinautolu ʻoku tui.” (1 Tim. 4:10) Ko e ʻuhinga ia ʻoku totonu ai ke tau ʻamanekina ke sio ki he peseti ʻe 100 te nau kau ki ai ʻi ʻEpelelí, fakataha mo e kau kakato ʻa e tokotaha kotoa pē ki he ngāue ʻo e Puleʻangá.
8 ʻAi ke ʻoua naʻa ngalo ʻiate kitautolu ʻa e enginaki ʻa Sīsū: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻeiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” ʻI he hili pē ʻa e lea ko iá, naʻe ui ʻe Sīsū ʻene kau ākonga ʻe toko 12 peá ne fekauʻi atu kinautolu ke nau malanga. (Mt. 9:37, 38; 10:1, 5, 7) ʻI ha taʻu nai ʻe taha ki mui ai, ʻi he hili ʻa hono akoʻi lelei ʻo e toko 12 ʻi he ngāue fakamalangá, “naʻe fakanofo ʻe he ʻEiki [Sīsū] ha niʻihi kehe ʻe toko fitungofulu, ʻo ne fekau atu kinautolu,” ʻo ʻoange kiate kinautolu ʻa e ngaahi fakahinohino tatau: “Kuo lahi ʻa e taʻu kuo motuʻu . . . Ko ia ke mou kole ki he ʻeiki ʻoku aʻana ʻa e taʻu, ke ne kouna atu mo ha kau ngāue ke utu ʻene taʻu.” (Luke 10:1, 2) ʻOku fakamatalaʻi ʻe he tohi Tohitapu ʻa Ngāué ʻa e founga ʻo hono tali ʻe Sihova ʻa e ngaahi lotu ko iá. ʻI he aʻu ki he Penitekosi 33 T.S., naʻe tupu ʻa e tokolahi ʻo e kau ākongá ʻo aʻu ki he toko 120 nai. Pea ko e tumutumu hokohoko ʻo e kau ākonga ʻe toko 3,000 mo e 5,000 naʻe aʻu ki aí. (Ng. 1:15; 2:41; 4:4) ʻI he hili iá, naʻe “fakatokolahi ʻaupito ʻa e lau ʻo e kau ako.” (Ng. 6:7) ʻI he tuʻunga meimei tatau, ʻi onopōní, kuo pau ke tau hanganaki kole ki he ʻEikí ki ha toe kau malanga tokolahi ange ʻo e Puleʻangá! ʻI he fehoanaki mo ʻetau ngaahi lotú, ko e tokotaha malanga taki taha ʻo e fakatahaʻangá ʻoku totonu ke ne fai ha ngaahi fokotuʻutuʻu pau ke ne kau ki he ngāue fakafaifekaú ʻi he māhina kotoa pē.
9 Kātaki ʻo fai ha vakai ofi ki ʻEpeleli ʻi he 2000 Calendar. Koeʻuhi ko e ʻuluaki ongo ʻaho ʻe ua ʻo e māhiná ko e Tokonaki pea mo e Sāpate, ʻe lava ke ke fai ha ngaahi palani ke kau ki he ngāué ʻi he fakaʻosinga ʻo e uike ko iá, ʻo kamata tōmuʻa ʻi he māhiná? ʻOku lava ke ke poupou ki he “ʻAho Makasini” kotoa pē he lolotonga ʻo e māhiná fakataha mo hoʻo kulupu Ako Tohi ʻa e Fakatahaʻangá? Fēfē ke fakamoleki ha houa ʻe taha pe lahi ange ʻi he Sāpate taki taha ʻi he ngāue fakafaifekaú? ʻOku lava ke ke fokotuʻutuʻu ke kau ki he faifakamoʻoni ʻi he efiafí? Pea ʻoua naʻa ngalo ke ngāueleleiʻaki ʻa e kotoa ʻo e ngaahi faingamālie ʻokú ke maʻú ke faifakamoʻoni ʻi he founga ʻikai anga-mahení ʻi he ngāueʻangá, ʻi he ʻapiakó, pe ko e lolotonga ʻo e kau ki ha ngaahi ngāue kehe fakaʻahó. Fakaʻilongaʻi ʻa e ngaahi ʻaho te ke malava ʻo fakamoleki ʻi ha taimi ʻi he ngāue fakafaifekaú, pea ngāueʻaki ʻa e tohimāhiná ke lēkooti ʻa hoʻo taimi ngāue ki he māhiná.
10 ʻE hoko ʻa ʻEpeleli ko ha taimi faingamālie ia ki he kotoa ʻo e faʻahinga ʻoku nau taau pea kuo tali ko ia ʻe he kau mātuʻá ke nau kamata ngāue ko e kau malanga teʻeki papitaisó. Kapau ʻokú ke ako ʻa e Tohitapú mo ha taha, kuo fakalakalaka feʻunga ʻa e tokotaha ko iá ke ne lea ki he ʻovasia tauhí ʻo kole ke fai hano fakakaukauʻi ke hoko ko ha tokotaha malanga ʻo e ongoongo leleí? Kapau ʻoku ʻi ai haʻo fānau ʻoku teʻeki ke papitaiso, kuó ke fai ha fetalanoaʻaki mo e kau mātuʻá ki heʻenau laka ki muʻa fakalaumālié? ʻIkai ko ha taimi lelei ʻeni kiate kinautolu ke nau kamata malanga ai?—Sio ki he Our Ministry, peesi 97-100.
11 ʻI heʻetau feinga ke ʻai ʻa ʻEpeleli 2000 ko hotau māhina lelei tahá ia, ko e kotoa ʻo kitautolú ʻoku fiemaʻu ke tau kau ki he ngāue fakafaifekaú pea ʻomai leva ʻetau līpooti ngāue fakamalangá ʻi he ngataʻanga ʻo e māhiná. (Fakafehoanaki mo Maake 6:30.) Ko e kau malanga teʻeki papitaiso foʻou te nau kau ki he ngāue fakamalangá ʻi he ʻuluaki taimí ʻoku totonu ke fakalototoʻaʻi ke nau līpooti vave ʻenau ngāué. ʻI hono fai ʻetau tafaʻakí, te tau malava ke fai ha tokoni lelei ki he līpooti ʻo ʻEpelelí pea ki he kaila leʻo-lahi ʻo e fakahīkihiki ʻa ia ʻe ʻoatu kia Sihova ʻo fakafou ʻi heʻetau ngaahi ngāue fakaefakamoʻoní.
12 Haʻu mo e Niʻihi Kehé ki he Fakamanatú: ʻIkai ʻoku tau fiefia ke sio ki ha tumutumu foʻou ʻi he kau maʻu Fakamanatu ʻo e pekia ʻa Kalaisí ʻo e 2000? ʻIo! ʻE ʻuhinga iá ko e kakai tokolahi taha ia kuo nau fakatahataha mai ke fakahāhaaʻi ʻenau houngaʻia ki he fakahāhā lahi taha ʻo e ʻofa naʻe fai ʻe Sihova ko e ʻOtuá mo Sīsū Kalaisi maʻatautolú! (Sione 3:16; 15:13) Fai ha ngaahi fokotuʻutuʻu pē ʻoku fiemaʻú koeʻuhí ke ʻoua ʻe ʻi ai ha meʻa te ne taʻofi koe pea mo ho fāmilí mei hono maʻu ʻa e Fakamanatú.
13 Ko e toe taimi eni ke kamata ai ʻa hono fakaafeʻi ʻa e niʻihi kehé ki he Fakamanatú. ʻAi ha lisi ʻo e tokotaha kotoa pē te ke saiʻia ke sio ʻoku kau mai ki aí. Fakakau ai mo ha faʻahinga pē naʻa nau ako ʻa e Tohitapú ʻi he kuohilí, ko e faʻahinga ʻoku ako he taimi ní, pea mo e kotoa hoʻo ngaahi toe ʻaʻahí. Tānaki atu ki he lisí ʻa ho ngaahi maheni ʻi he ngāueʻangá, ʻi he ʻapiakó, pea ʻi he kaungāʻapí, pea pehē ki ha taha pē ʻokú ke pisinisi mo ia. ʻOua naʻa ngalo ke fakakau ʻa ho ngaahi maheni mo ho ngaahi fāmili kehé. ʻI he hili hono tānaki ʻo e lisí, kamata ʻa hono fakalahi atu ʻo ha fakaafe fakamātoato, mo fakafoʻituitui ki he tokotaha taki taha. ʻAi ke mahino ʻa e taimi mo e feituʻu ʻe fai ai ʻa e Fakamanatú. ʻI he ofi ange mai ʻa ʻEpeleli 19, fai ha fakamanatu ki he faʻahinga ʻi hoʻo lisí, pe ko hoʻo lea hangatonu ki he tokotahá pe ʻi he telefoní. Tala ange ke nau haʻu fakataha mo koe ki he Fakamanatú ʻi he pō ko iá.
14 ʻI he fehoanaki mo e fakahinohino ki muʻa mei he Sōsaietí, ko e kulupu ʻo e kau mātuʻá te nau fai ha feinga makehe ke fakalototoʻaʻi ʻa e kau malanga ʻikai longomoʻui kotoa pē ʻi he feituʻú ke nau maʻu ʻa e Fakamanatú. (Mt. 18:12-14) ʻE fiemaʻu ʻe he kau mātuʻá ke nau fakamanatu ʻa e tohi ʻa e Sōsaietí ʻo Fepueli 2, 1999. Ko e sekelitali ʻa e fakatahaʻangá te ne ʻai ha lisi ʻo e kau malanga ʻikai longomoʻui kotoa pē, pea ko e ʻovasia ngāué te ne vaheʻi ʻa e kau mātuʻá ke nau ʻaʻahi kiate kinautolu pea fakaafeʻi kinautolu ki he Fakamanatú. Mahalo ko hono maʻu ha ʻaʻahi fakatauhisipi fakalototoʻa ʻi he vave taha ʻe malavá, ʻe lava ke tokoniʻi ai ʻa e faʻahinga ʻikai longomoʻui ko ʻení ke nau hoko ʻo toe longomoʻui ʻi he ngāue fakamalangá, naʻa mo e lolotonga ʻo ʻEpelelí. ʻE hoko ʻo fakatupu langa hake kiate kinautolu ke fakaafeʻi ke nau kau fakataha mo ha tokotaha malanga taukei ʻi he ngāue fakamalangá.
15 Fakaʻaiʻai ha Poupou Lelei ki ʻEpeleli! ʻOku fiemaʻu ʻa e fengāueʻaki fakataha lelei ʻi he tafaʻaki ʻa e kau mātuʻá kotoa, kau sevāniti fakafaifekaú, mo e ngaahi ʻuluʻi fāmilí ke ʻai ʻa ʻEpeleli 2000 ko hotau māhina lelei tahá ia. ʻE tōtōivi ʻa e kau mātuʻá ʻi hono fokotuʻutuʻu maau lelei ʻa e meʻa kotoa pē pea ʻi hono fai ʻo e takimuʻá. (Hep. 13:7) ʻOku fiemaʻu ke fai ha ngaahi fokotuʻutuʻu ʻaonga ki he ngaahi fakataha ki he ngāue fakamalangá ʻi he ngaahi ʻaho ʻo e uiké pea ʻi he ngaahi fakaʻosinga ʻo e uiké. Ko e ngaahi fakataha ʻoku tānaki atu ki he ngāué ʻe fokotuʻutuʻu nai ki ha ngāue he hoʻatā efiafí mo efiafi poʻulí. Ko ha taimi-tēpile kakato ʻo e meʻa kotoa ko ia kuo fokotuʻutuʻu ki ʻEpelelí ʻoku totonu ke fakapipiki ia ʻi he papa fakamatalá. ʻE fiemaʻu ke vaheʻi ha tokotaha ke ne tokangaʻi ʻa e fakataha taki taha kuo fakataimitēpileʻi ki he ngāué. ʻOku totonu ke tokonaki ha feituʻu feʻunga ke feau ʻa e ngaahi fiemaʻu ʻa e kulupu taki taha.
16 ʻI he lolotonga ʻo ʻEpelelí ʻe tuʻuaki ai ʻa e Taua Leʻo mo e Awake! ʻI ha feinga ke kamata ha ngaahi ako Tohitapu ʻi ʻapi, ko e polosiua Fiemaʻu ʻe tuʻuaki ki he faʻahinga kotoa ʻoku nau fakahaaʻi ʻa e mahuʻingaʻiá. Ko ia ai, ʻoku fiemaʻu ke tokonaki mai ha ngaahi tatau feʻunga ʻo e ngaahi makasiní mo e ngaahi polosiuá.
17 ʻI he fakaʻosinga ʻo e māhiná, ko e kotoa ʻo e kau faiako ako tohí pea mo honau kau tokoní te nau fiemaʻu ke fakalototoʻaʻi ʻa e tokotaha taki taha ʻi heʻenau kulupú ke ʻomai ʻenau līpooti ngāue fakamalangá ʻi he vave tahá ʻi he hili ʻa e ngataʻanga ʻo e māhiná. Mahalo pē ʻe lava ke fai ʻeni ʻi he Sāpate, ʻEpeleli 30. Pea ʻi he taimi ʻe vakaiʻi ai ʻe he sekelitalí ʻa e ngaahi līpōtí, kapau te ne fakatokangaʻi kuo teʻeki ke ʻomai ha līpooti ʻa ha kau malanga ʻe niʻihi, te ne malava ke fakamanatu anga-ʻofa kiate kinautolu ke nau fai ia ki muʻa ʻi Mē 6, ʻi he taimi kuo pau ke ne ʻoatu ai ʻa e līpooti ʻa e fakatahaʻangá ki he Sōsaietí. Te ne kole nai ki he kau faiako ʻo e ako tohí ke nau tokoni ange kiate ia ʻi hono fai ha fetuʻutaki tāutaha ki he kau malangá.
18 Ko e faʻahitaʻu Fakamanatú ko e vahaʻa taimi mahuʻinga taha ia ʻo e taʻú ki he kakai ʻa e ʻOtuá. ʻOku totonu ke hoko ia ko ha taimi mātuʻaki femoʻuekina kiate kitautolu hono kotoa ʻi he ngāue ʻa Sihová. ʻE hoko ia kapau ko e tokotaha kotoa pē te ne kau ki he kakato taha ʻe ala lavá ʻi he tuʻunga ko ha tokotaha malanga ʻo e ongoongo leleí, kapau ʻe fai pehē ʻa e faʻahinga ʻoku nau fakamoʻoni ke tāimuʻa tokoní, pea kapau ʻoku tau tōtōivi ʻi hono ʻomai ʻa e niʻihi kehé fakataha mo kitautolu ki he Fakamanatu ʻo e pekia ʻa Kalaisí. ʻAi ke tau lotu fakamātoato ki he tāpuaki lahi ʻa Sihová ʻi heʻetau feinga ke ʻai ʻa ʻEpeleli 2000 ko hotau māhina lelei tahá ia, ko e fai kotoa ke fakahīkihikiʻi mo fakalāngilangiʻi ʻa e ʻOtuá!—Hep. 13:15.
[Puha ʻi he peesi 3]
Kau Tāimuʻa Tokoní
Ko ʻEtau Tumutumu Fakakātoá: 14
(ʻEpeleli 1998)
[Puha ʻi he peesi 4]
Kau Malangá Fakakātoa
Ko ʻEtau Tumutumú Fakakātoa: 128
(ʻAokosi 1999)
[Puha ʻi he peesi 5]
Kau Maʻu Fakamanatú
Ko ʻEtau Tumutumu Fakakātoá: 332
(1999)