Malanga mo Fai ha Fakamoʻoni Fakaʻāuliliki
1 ʻI he tuʻunga ko e “takimua moe bule,” naʻe teuʻi ʻe Sīsū ʻa ʻene kau ākongá ki he ngāue fakamalanga kāfakafa naʻe tuʻu mei muʻá. (Ai. 55:4, PM; Luke 10:1-12; Ng. 1:8) Naʻe fakamatalaʻi ʻe he ʻapositolo ko Pitá ʻa e fekau naʻe ʻoange ʻe Sīsū kia kinautolú ʻi he ngaahi leá ni: “Naa ne fekau kiate kimautolu ke mau malaga ki he kakai, mo fakamooni [“fakaʻāuliliki,” NW] ko ia ia kuo fakanofo e he Otua koe Fakamāu ki he moui moe mate.” (Ng. 10:42, PM) Ko e hā ʻoku kau ki hono fai ha fakamoʻoni fakaʻāulilikí?
2 ʻE lava ke tau ako ʻa e meʻa lahi mei he fakakaukau ki he faʻifaʻitakiʻanga ʻa e ʻapositolo ko Paulá. ʻI he fakataha mo e kau tangata taʻumotuʻa mei he fakatahaʻanga ʻi ʻEfesoó, naʻá ne fakamanatu kia kinautolu: “Mo eku taetaofi ki ha mea e taha oku aoga, ka kuou fakailo kiate kimoutolu, mo ako fakaha kiate kimoutolu, bea i he gaahi fale, O fakababau [“fakamoʻoni fakaʻāuliliki,” NW] atu ki he kakai Jiu, bea moe kakai Kiliki foki, ae fakatomala ki he Otua, moe tui ki ho tau Eiki ko Jisu Kalaisi.” Neongo ʻene fehangahangai tonu mo e ngaahi ʻahiʻahí, naʻe feinga ʻa Paula ke aʻu ki he tokolahi taha ʻe ala lavá mo e ongoongo leleí. Naʻe ʻikai te ne fiemālie ke vahevahe pē ʻa e ngaahi moʻoni tefitó ki heʻene kau fanongó, ka naʻá ne feinga ke tala “ae finagalo kotoabe oe Otua.” Ke fakahoko ení, naʻá ne loto-lelei ke fai ha feinga mo fai ha ngaahi feilaulau. Naʻá ne toe pehē: “Oku ikai foki teu lau koe mea mahuiga kiate au eku moui, kae kehe keu fakaoji i he fiefia eku lakaga, moe gaue kuou maʻu mei he Eiki ko Jisu, keu fakamooni [“fakaʻāuliliki,” NW] ki he ogoogolelei oe aloofa ae Otua.”—Ng. 20:20, 21, 24, 27, PM.
3 ʻE lava fēfē ke tau faʻifaʻitaki ki he faʻifaʻitakiʻanga ʻa Paulá ʻi he ʻahó ni? (1 Kol. 10:34 [11:1, PM]) ʻAki ʻa e kumi ki he ngaahi fāmili tāú naʻa mo e taimi ʻoku tau fehangahangai ai mo e ngaahi ʻahiʻahí, ʻaki ʻa e feinga ke aʻu mo e ongoongo leleí ki he kakai ʻo e ngaahi kulupu fakafaʻahinga mo e lea kotoa pē, pea ʻi he tōtōivi ʻi hono tokoniʻi ʻa e faʻahinga mahuʻingaʻia ʻoku tau maʻú. (Mt. 10:12, 13) ʻOku fiemaʻu ki he meʻá ni ʻa e taimi, feinga mo e ʻofa ki he kakaí.
4 ʻE Lava Ke Ke Ngāue ko ha Tāimuʻa Tokoni? Ko Maʻasi mo ʻEpeleli ʻe lava ke hoko ia ko ha faingamālie lelei kia koe ke ke fai ai ha fakamoʻoni fakaʻāuliliki ʻaki ʻa e tāimuʻa tokoní. He fakalototoʻa moʻoni ia ʻi he taʻu kuo ʻosí ke sio ki hono fai ʻe he tokolahi ha feinga makehe ke tāimuʻa tokoní!
5 Ko ha tuofefine taʻu 80 naʻe lahi hono ngaahi mahakí naʻe ueʻi ia ʻe he fakalototoʻa naʻe fai ʻe he kautaha ʻa Sihová. Naʻá ne tohi: “Naʻá ne tutuʻi ʻa e kalofiama naʻe ʻi ha taimi fuoloa ʻi hoku lotó, pea naʻá ne ʻai au ke u ongoʻi kuo pau pē ke u toe kiʻi tāimuʻa tokoni tuʻo taha.” Naʻá ne fili ai ke fakataumuʻa ki Maʻasi. “Ko e ʻuluaki meʻa naʻá ku faí,” ko ʻene leá ia, “ko e tangutu hifo ʻo fatu ʻa e fakamolé. Naʻá ku talanoa ki ai mo ʻeku taʻahiné koeʻuhi he te u fiemaʻu ʻene tokoní. Naʻá ne fakaʻohovaleʻi au ʻaki ʻene fai ha kole ke ne tāimuʻa mo ia.” Lolotonga ʻa e māhiná, naʻe fakamoleki ai ʻe he tuofefine taʻumotuʻá ʻa e houa ʻe 52 ʻi he ngāue fakafaifekaú. “Naʻe tuʻo lahi ʻeku lotu kia Sihova ke ne fakafoʻou hoku mālohí ʻi heʻeku ongoʻi ongosiá. ʻI he ngataʻanga ʻo e māhiná, naʻá ku fiefia mo fiemālie lahi, pea kuó u fakamālō kia Sihova ʻo tuʻo lahi ʻi heʻene tokoniʻi aú. ʻOku ou saiʻia ke toe ʻahiʻahiʻi ia.” Ko e meʻa fakafiefia naʻá ne hokosiá ʻe fakalototoʻaʻi nai ai ʻa e niʻihi kehe ʻa ia ʻoku nau fiemaʻu moʻoni ke tāimuʻa tokoni neongo ʻa e ngaahi palopalema mafatukituki fakaemoʻuileleí.
6 Ko ha tokoua ʻa ia naʻe taʻeʻamanekina ʻa hono fakamālōlooʻi mei heʻene ngāue fakamāmaní naʻá ne ngāueʻaongaʻaki ʻa e tuʻunga ko iá ke tāimuʻa tokoni. ʻI he faai atu ʻa e māhiná, naʻá ne hoko ai ʻo ongoʻi faivelenga ange ki he ngāue fakamalangá, pea ʻi he aʻu ki he ngataʻanga ʻo e māhiná, naʻá ne kamata ai ha ako Tohitapu foʻou. ʻI he fakakaukauloto atu ki he meʻa naʻá ne hokosiá, naʻá ne pehē: “He māhina fakafiemālie moʻoni ē!” He fiefia ē ka ko ia ʻi hono maʻu ʻa e tataki mo e tokoni ʻa Sihová! ʻIo, naʻe huaʻi hifo ʻe Sihova kiate ia ha tāpuaki lahi ʻi he feinga lahi naʻe fai ʻe he tokouá ʻi he ngāue fakafaifekaú, pea te ne fai ʻa e meʻa tatau kia koe.—Mal. 3:10.
7 Ki he tokolahi, ʻoku ʻikai ke faingofua ʻa e tāimuʻa tokoní. Kae kehe, neongo ʻa e ngaahi fatongia fakamāmaní mo e fakafāmilí pea pehē ki he ngaahi pole fakafoʻituituí, kuo malava ke fai ia ʻe ha fanga tokoua mo e fanga tuofāfine tokolahi. Ko hono fai ha fakamoʻoni fakaʻāulilikí ʻoku faʻa kau ki ai hano feilaulauʻi ʻa hotau taimi mo e ivi fakangatangatá, ka ko e ngaahi tāpuakí ʻoku taʻehanotatau.—Pal. 10:22.
8 Ko Maʻasi mo ʻEpelelí ko e taimi lelei ia ke tāimuʻa tokoni ai. ʻOku ʻi ai ʻa e fakaʻosinga uike ʻe nima ʻi he lolotonga ʻo Maʻasí. Ko hono ngāueʻaongaʻaki ení mo hono ngāueleleiʻaki ʻa e ngaahi houa efiafí ʻe fakaʻatā nai ai ʻa e faʻahinga ʻoku nau ngāue taimi-kakató ke nau tāimuʻa tokoni. Tānaki atu ki ai, te ke malava nai ke ngāueʻaongaʻaki ʻa e ngaahi ʻaho mālōlō he lolotonga ʻa e māhina ko ʻEpelelí. ʻE ʻi ai nai ha taimi mālōlō ʻa e niʻihi mei he akó mo e ngāue fakamāmaní, ʻa ia ʻe tokoni ai kia kinautolu ke aʻusia ʻa e houa ʻe 50 ʻoku fiemaʻú. Koeʻuhi ke fakataimitēpileʻi ʻa e houa ʻe 50 ʻi he ngāue fakafaifekaú lolotonga ʻa Maʻasi pe ʻEpelelí, ʻe lava ke ke ngāueʻaki ha taha ʻo e ngaahi taimi-tēpile kuo fokotuʻu ki he tāimuʻa tokoní ʻa ia ʻoku fakakau atu ʻi he kupu ko ení? Lāulea ki hoʻo taimi-tēpilé mo e niʻihi kehé; ʻoku ʻikai ha veiveiua ʻe fakalototoʻaʻi ai ʻa e niʻihi ke kau fakataha mo koe ʻi he ngāue fakafaifekaú. Kapau ʻoku ʻikai malava ke ke tāimuʻa tokoni, fokotuʻu ha taumuʻa pau ki he ongo māhina ko ení, pea poupouʻi ʻa e faʻahinga ʻoku malava ke nau tāimuʻá. Fai hoʻo ngaahi palaní he taimí ni ki ha ngāue lahi ange lolotonga ʻa Maʻasi mo ʻEpelelí.
9 Fakahaaʻi ʻa e Houngaʻia ki he Fakamanatú: ʻI he taʻu taki taha lolotonga ʻa e faʻahitaʻu Fakamanatú, ko e houngaʻia ki he huhuʻí ʻokú ne ueʻi ʻa e laui afe ke nau ‘fakatau mai ʻa e taimi’ ke hoko ai ko e kau tāimuʻa tokoni. (Ef. 5:15, 16, NW) ʻI Nuʻu Sila he taʻu kuo ʻosí, naʻe ʻi ai ʻa e kau tāimuʻa tokoni ʻe toko 1,570 ʻi Maʻasi pea toko 690 ʻi ʻEpeleli. ʻOku fakaʻavalisi ia ki he toko 1,130 ʻi he ongo māhina taki taha ko ení. Fakahoa ia mo e fika fakaʻavalisi ko e toko 225 naʻa nau tāimuʻa tokoni lolotonga ʻa e ngaahi māhina taki taha ki muʻa ʻo e taʻu fakangāué. Ko e faʻahitaʻu Fakamanatu ko ení ko ha toe faingamālie lelei ia ke fakahaaʻi ai ʻetau houngaʻia loto-moʻoni ki he feilaulau huhuʻi ʻa Kalaisí ʻaki hono fakalahi ʻetau ngāue ʻi he malaʻe fakafaifekaú.
10 ʻI he fakaofiofi mai ʻa ʻEpeleli 16, fakakaukau ki he ʻuhinga kiate koe ʻa e Fakamanatú. Fakakaukau atu ki he ngaahi meʻa naʻe hoko ki muʻa ʻo aʻu ai ki he pekia ʻa Kalaisí pea mo e ngaahi fakakaukau naʻe mafatukituki ʻi hono ʻatamaí mo e lotó. Fakakaukau atu foki, ki he fiefia naʻe fokotuʻu ʻi he ʻao ʻo Sīsuú mo e founga ʻo ʻene tokoniʻi ia ke ne kātakiʻi ʻa e ngaohikovia ko iá. Fakalaulauloto ki hono tuʻunga lolotonga ko e ʻUlu ʻo e fakatahaʻangá, ʻo ne tokangaʻi ʻa e ngāue fakamalangá mo e ngaohi-ākongá. (1 Kol. 11:3; Hep. 12:2; Fkh. 14:14-16) Pea fakahāhā leva hoʻo houngaʻia ki he meʻa kotoa kuo fai ʻe Kalaisí ʻaki ʻa e kau kakato ʻi he ngāue fakamalangá ʻo fakatatau ki ho ngaahi tuʻungá.
11 Fakalototoʻaʻi ʻa e Niʻihi Kehé ke Fai Fakamoʻoni Fakaʻāuliliki: ʻI he kau ki he ngāue tāimuʻa tokoní, ʻoku ʻi ha tuʻunga lelei ai ʻa e kau mātuʻá mo e kau sevāniti fakafaifekaú ke fakalototoʻaʻi ʻa e niʻihi kehé. ʻI he ngāue mo e kau malangá ʻi he malaʻe fakafaifekaú pea ʻi hono fai ʻa e ngaahi ʻaʻahi fakatauhisipí, ʻoku nau maʻu ai ʻa e ngaahi faingamālie lelei fakafoʻituitui ke tokoniʻi ai ʻa e niʻihi kehé ke nau kau kakato ʻi he ngāue makehe ko ení. ʻOfa ke tau ʻai kotoa ʻa e meʻa ko ení ko ha meʻa ia ke fai ki ai ha lotu, ʻo fakaivimālohiʻi ai ʻetau ngaahi feinga fāʻūtaha ʻi hono fai ha fakamoʻoni fakaʻāulilikí.
12 Lolotonga ʻe ngāue fāitaha ʻa e kotoa ʻo e kau mātuʻá mo e kau sevāniti fakafaifekaú mo e ngaahi fokotuʻutuʻu ʻa e fakatahaʻangá ki ha ngāue lahi ange lolotonga ʻa e ongo māhina ko Maʻasi mo ʻEpelelí, ʻoku tautefito ki he ʻovasia ngāué ʻa e totonu ke ne tokanga ki hono fai ha ngaahi fokotuʻutuʻu ki he ngāue fakaʻevangelioó. ʻOku totonu ke ne fokotuʻutuʻu ʻa e ngaahi feituʻu ki he fakataha malaʻe ngāue, ngaahi ʻaho, mo e ngaahi taimi ʻa ia ʻoku faingamālie ki he tokolahi taha ʻo e kau malangá pea toutou fanongonongo eni. ʻE fai nai ha ngaahi fokotuʻutuʻu ke fakataha ʻi ha ngaahi taimi kehekehe lolotonga ʻa e ʻahó, ʻo ʻoange ai ki he tokotaha kotoa ʻi he fakatahaʻangá ha faingamālie ke kau ʻi he ngaahi founga kehekehe ʻo e faifakamoʻoní. ʻE kau nai ki heni ʻa e ngāue ʻi he feituʻu pisinisí, faifakamoʻoni ʻi he halá, ʻaʻahi mei he fale ki he falé, fai ʻa e ngaahi toe ʻaʻahi, mo e faifakamoʻoni ʻi he telefoní. Tānaki atu ki ai, ʻoku totonu ke ne fokotuʻutuʻu ke ala maʻu ha ʻū tohi, ngaahi makasini, mo ha feituʻu feʻunga lolotonga ʻa e ongo māhina ko iá.
13 Ko e tuʻuaki ki Maʻasí ko e tohi ʻIlo, fakataha mo e taumuʻa ko hono kamata ha ngaahi ako Tohitapu. Ko e ngaahi fokotuʻu lelei ki hono tuʻuaki ʻa e tohi ʻIlo naʻe hā ia ʻi he fakalahi ʻo Sanuali 2002 ʻo ʻEtau Ngāue Fakafaifekau ʻo e Puleʻanga. Ko e tuʻuaki ki ʻEpelelí ko e ngaahi makasini Taua Leʻo mo e ʻĀ Hake! Feinga ke ngāueʻaki ʻa e ngaahi tuʻuaki kuo fokotuʻu atu ʻa ia ʻoku hā ʻi he “Meʻa ke Leaʻaki Fekauʻaki mo e Ngaahi Makasiní.” ʻOku totonu ke vaheʻi ʻe he tokotaha kotoa ʻa e taimi ke teuteu lelei ai koeʻuhí ke fai ai ha fakamoʻoni fakaʻāuliliki.
14 He fiefia ē ko kitautolu ke ngāue ʻi he malumalu ʻo e tataki ʻa e ʻUlu ʻo e fakatahaʻangá, ʻa Kalaisi Sīsū, pea maʻu ʻa e monū ʻo hono vahevahe atu ʻa e ongoongo leleí ki he niʻihi kehé! ʻI he fakaofiofi mai ʻa e ongo māhina ko Maʻasi mo ʻEpelelí, tau toe feinga ke ʻai kinaua ko ʻetau ongo māhina lelei tahá ia ʻi heʻetau talangofua ki he tuʻutuʻuni ʻa Kalaisi ke malanga mo fai ha fakamoʻoni fakaʻāulilikí.
[Puha ʻi he peesi 4]
Ngaahi Founga Kehekehe ke Tāimuʻa Tokoni Ai ʻi Maʻasi mo ʻEpeleli 2003
ʻAho Ngaahi Houa
Mōnite 1 2 — — 2 —
Tūsite 1 — 3 — — —
Pulelulu 1 2 — 5 — —
Tuʻapulelulu 1 — 3 — — —
Falaite 1 2 — — — —
Tokonaki 5 4 3 5 6 7
Sāpate 2 2 3 2 2 3
Maʻasi 56 56 54 55 50 50
ʻEpeleli 50 50 51 53 — —
ʻE feʻunga kia koe ha taha ʻo e ngaahi taimi-tēpile ko ení?