Ko e Hā ke Tauhi Ai ha Lēkooti ʻo e ʻIkai-ʻi-ʻApí?

¹ Ko ha ongo mātuʻa naʻá na ngāue pongipongia he ngāue fakamalangá. Ki mui mai ʻi he ʻaho tatau, naʻá na toe foki ke ʻaʻahi ki heʻena ʻikai-ʻi-ʻapí ʻi he kauhala ko iá. Naʻe fakaafeʻi kinaua ʻe ha tangata ʻe taha pea naʻá ne fanongo tokanga ʻaupito. Naʻá ne ʻave ʻa e tohi Moʻui Taʻengata peá ne ʻeke pe ʻe toe foki ange ʻa e ongo Fakamoʻoní. Naʻe teʻeki ai ke ne pōtalanoa mo e Kau Fakamoʻoni ʻa Sihová ki muʻa, pea naʻe ʻi ai ʻene ngaahi fehuʻi lahi naʻá ne fiemaʻu ha tali ki ai; naʻe kamata leva ha ako Tohitapu. Ko e ongo meʻá ni naʻá na fuʻu fiefia ʻaupito ke maʻu ha tokotaha pehē hangē ha sipí. Te ke fiefia ke hokosia ha meʻa hangē ko iá? Ko hono tauhi ha lēkooti lelei ʻo e ʻikai-ʻi-ʻapí pea toe foki vave ki aí ʻe ʻai ai koe ke ke lavaʻi ia.

² Kuo faʻa toutou enginakiʻi kitautolu ke tauhi ha lēkooti totonu ʻo e ʻikai-ʻi-ʻapí pea toe fai ha ʻaʻahi vave ki ai. Hangē ko ia ʻoku fakahā ʻe he meʻa naʻe hokosia ʻi ʻolungá, ko ha toe ʻaʻahi ʻi he ʻaho tatau pē ʻe maʻu ai ha ngaahi ola lelei ʻaupito. ʻI he lolotonga nai ʻetau hanga atu ke ngāueʻi ʻa e kauhala kuo vaheʻi maí, mahalo pē ʻoku ʻikai ke tatau ʻetau tōtōivi ʻi hono tauhi ha lēkooti ʻo e faʻahinga ʻoku ʻikai ʻi ʻapí. ʻOku pehē ʻe he niʻihi: ‘ʻOku mau ngāueʻi homau kauhalá ʻi he uike ʻe ua pe tolu kotoa pē; ʻoku ʻikai ke fiemaʻu ke tauhi ha lēkooti ia koeʻuhi he te mau toe foki vave pē ki ai.’ Ka ʻokú ne toe ʻomai ha ʻuhinga lahi ange kiate kitautolu ke tauhi ha lēkooti. ʻI he kauhala ko ia ʻoku toutou ngāueʻí, ko e hoko atu ki he ʻikai-ʻi-ʻapí ʻokú ne tokoniʻi ai kitautolu ke toe fakamāatoato ange hono kumi ʻa e faʻahinga loto-totonú. ʻO anga-fēfē?

³ ʻI he ngaahi feituʻu lahi, ko e peseti pē ʻe 50 pe lahi ange ʻa e ʻikai-ʻi-ʻapí ʻi he taimi ʻahó. Ko ia, ko hono moʻoní, ʻoku tau ala maʻu ha ngaahi kauhala lahi ange ʻi he fakahangataha ʻetau fakakaukaú ki he ʻikai-ʻi-ʻapí. Neongo ai pē kapau ʻoku tātātaha hono ngāueʻi ʻa e kauhala ko iá, ʻe lava ke tau fakaleleiʻi ange ʻa e ngaahi olá ʻi he taimi ʻoku fai ai ʻa e feinga ke aʻu ki he faʻahinga kotoa pē ki muʻa ke fakaʻilongaʻi kuo ʻosi ngāueʻi ʻa e kauhala ko iá.

⁴ Kuo faʻa hoko ʻo fai ʻa e fokotuʻutuʻu ke ʻaʻahi ki he ʻikai-ʻi-ʻapí ʻi ha toe ʻaho kehe, ʻoku faʻa sai ange ʻi he uike pē ko iá. Ko e tokolahi ʻoku nau ʻilo ʻoku lelei ange ke toe ʻaʻahi ʻi ha ʻaho mo ha taimi kehe ia mei he ʻuluaki ʻaʻahí. Te ke fili nai ke ngāueʻaki ʻa e ngaahi taimi ʻi he Tokonakí pe Sāpaté ke hoko atu ai ki he ʻikai-ʻi-ʻapí ʻa ia naʻe fakaʻilongaʻi ʻi he lolotonga ʻo e uiké. Ko e meʻa ʻe tahá, ʻoku ʻiloʻi ʻe he ngaahi fakatahaʻanga lahi, ko hono malava ke fai ʻa e ngaahi toe ʻaʻahi ʻi he ngaahi houa efiafí kuo faʻa ola lelei. ʻOku nau maʻu nai ai ʻa e meimei konga lahi ʻo e kakaí ʻi ʻapi.

⁵ ʻOku totonu ke ke hikiʻi ʻa e ngaahi toe ʻaʻahí ʻi hoʻo lēkooti fakafoʻituituí. Kapau ʻe ʻikai te ke malava ke toe foki ki he feituʻu naʻe ʻikai ai ha tahá, ko hoʻo lēkooti ʻo e ʻikai-ʻi-ʻapí ʻoku totonu ke ʻoange ia ki he tokoua te ne tokangaʻi ʻa e kulupu ki he ngāue fakamalangá, ke ngāue ki ai ʻa e kulupu hoko mai te nau ngāue ʻi he kauhala ko iá.

⁶ Ko hono fai ha toe tokanga ange fekauʻaki mo e tafaʻaki ko ʻeni ʻo ʻetau ngāue fakamalangá ʻoku lava ai ke tau fakatupulekina ʻetau ola lelei angé pea pehē foki mo ʻetau fiefiá. ʻE toe ʻomai ai kiate kitautolu ʻa e fiemālie ʻa ia ko e ngaahi ola ia mei hono ʻiloʻi ʻoku tau fai fakamāatoato hono kumi mo hono tokangaʻi ʻa e faʻahinga hangē ha sipí.​—ʻIsi. 34:​11-14.