ʻAi ke Hā Hoʻo Laka ki Muʻá
1 Fakakaukau angé ki he taimi naʻá ke ʻuluaki fanongo ai ki he pōpoaki ʻo e Puleʻangá. Ko e ngaahi moʻoni faingofua pē naʻe ueʻi ai ʻa hoʻo holi ki he ʻiló mo e mahinó. Naʻe malava leva ke sio ki ha fiemaʻu ke fai ha ngaahi fakatonutonu ʻi hoʻo founga moʻuí koeʻuhi he ko e ngaahi founga ʻa Sihová ʻoku fuʻu māʻolunga ange ia ʻi ho ngaahi foungá. (ʻAi. 55:8, 9) Naʻá ke fai ha laka ki muʻa, fakatapui ʻa hoʻo moʻuí, pea naʻá ke papitaiso.
2 Naʻa mo e hili hono fai ha laka fakalaumālie ʻe niʻihi, naʻe kei ʻi ai pē ʻa e ngaahi vaivaiʻanga naʻe pau ke ikuʻi. (Loma 12:2) Mahalo naʻá ke manavahē ki he tangatá, ʻa ia naʻá ke pipikoʻia ai ke kau ki he ngāue fakamalangá. Pe ʻokú ke taʻefeʻunga nai ʻi hono fakahāhā ʻa e fua ʻo e laumālie ʻo e ʻOtuá. ʻI he ʻikai ke holomuí, ka naʻá ke fakapapau ke fai ʻa e laka ki muʻá ʻaki hono fokotuʻu ʻa e ngaahi kolo fakateokalati kiate koe pē.
3 Naʻe ʻosi atu nai ʻa e ngaahi taʻu talu mei hoʻo fai hoʻo fakatapuí. ʻI he sio ki muí, ko e hā ʻa e laka ki muʻa ʻoku lava ke ke sio ki ai ʻiate koe? Kuó ke lavaʻi ʻa e niʻihi ʻo hoʻo ngaahi koló? ʻOkú ke maʻu ʻa e faivelenga tatau pē mo ia naʻá ke “kamata ʻaki”? (Hep. 3:14) Naʻe ʻosi hoko ʻa Tīmote ko ha Kalisitiane matuʻotuʻa mo taukei ʻi he ngaahi taʻu lahi ʻi he taimi naʻe naʻinaʻi ai ʻa Paula kiate ia: “Ke ke mamafa ki he ngaahi meʻa ko ia; ke ke ngaue ki he ngaahi meʻa ko ia; koeʻuhi ke ha ki he kakai kotoa hoʻo laka ki muʻa.”—1 Tīm. 4:15.
4 Fiemaʻu ʻa e Sivi Fakaekita Pē: ʻI he fakakaukau ki hotau ʻalunga ʻi he kuo hilí, ʻoku tau ʻilo ai ʻoku tau kei maʻu pē ʻa e ngaahi vaivaiʻanga naʻa tau maʻu ʻi he kamataʻangá? Kuo tau tō ʻo ʻikai aʻu ki he ngaahi kolo naʻa tau fokotuʻú? Kapau ko ia, ko e hā ʻa hono ʻuhingá? Naʻa mo ʻetau maʻu ha ngaahi taumuʻa lelei pē, naʻa tau toloi-meʻa nai. Mahalo pē naʻa tau fakaʻatā ʻa e ngaahi loto-moʻua ʻo e moʻuí, pe ngaahi mafasia ʻo e tuʻu ko ʻení ke ne taʻofi kitautolu.—Luke 17:28-30.
5 Neongo ʻe siʻi ʻa e meʻa ʻe lava ke tau fai ʻo kau ki he kuo hilí, ʻoku pau ʻe lava ke tau fai ha meʻa ʻo fekauʻaki mo e kahaʻú. ʻOku lava ke tau fakafuofua faitotonu ʻa kitautolu pē, fakapapauʻi ʻa ia ʻoku tau vaivai aí, pea nōfoʻi he feinga ke lelei angé. ʻOku tau fiemaʻu nai ke fai lelei ange ʻi hono fakahāhā ʻa e ngaahi fua ʻo e laumālie ʻo e ʻOtuá, ʻo hangē ko e mapuleʻi-kitá, anga-maluú, pe kātaki-fuoloá. (Kal. 5:22, 23) Kapau ʻoku tau faingataʻaʻia ʻi he feangainga mo e niʻihi kehé pe ngāue fakataha mo e kau mātuʻá, ʻoku mahuʻinga ke tau fakatupulekina ʻa e anga-fakatōkilaló mo e loto anga-vaivai.—Fili. 2:2, 3, PM.
6 ʻOku lava ke tau ʻai ke hā ʻetau laka ki muʻá ʻaki ʻa e kakapa atu ki he ngaahi monū ʻo e ngāué? ʻAki ʻa e feinga makehe ʻe malava nai ʻa e ngaahi tokoua ke nau taau ko e kau sevāniti pe kau mātuʻa. Ko e niʻihi ʻiate kitautolu ʻe malava nai ke kau ki he tāimuʻa tuʻumaʻú. Ki he tokolahi ange, ʻoku lavaʻi ngofua ʻa e kolo ko e tāimuʻa tokoní. ʻOku feinga nai ʻa e niʻihi kehe ke laka ki muʻa ʻi he angaʻaki ʻo e ako fakafoʻituituí, pea hoko ʻo kau longomoʻui ange ʻi he ngaahi fakataha ʻa e fakatahaʻangá, pe ola lelei ange ʻi he tuʻunga ko e kau malanga ʻi he fakatahaʻangá.
7 Ko e moʻoni, ko e fatongia ia ʻo e tokotaha taki taha ʻo kitautolu ke fili ʻa ia ʻoku tau fiemaʻu ke fai ai ʻa e laka ki muʻá. ʻOku lava ke tau fakapapauʻi ko ʻetau feinga loto-moʻoní ke ‘tau tuiaki atu ki he matuʻotuʻa’ ʻe tānaki lahi ia ki heʻetau fiefiá mo tau hoko ai ko e ngaahi mēmipa ola lelei ange ʻi he fakatahaʻangá.—Hep. 6:1.