Kuo Liliu ʻa e Taimí
1 ʻOku talamai ʻe he Tohitapú kiate kitautolu “kuo kamata liliu ʻa e anga ʻo e maama ko eni.” (1 Kol. 7:31) Hono ʻikai moʻoni ia ʻi he ʻahó ni! Naʻa mo e vahaʻa taimi ʻo ʻetau moʻuí, ʻoku tau mamata ki he ngaahi liliu mālohi ʻi he fakakaukaú mo e ʻulungaanga ʻo e kakaí ʻi he ngaahi tuʻunga kotoa pē ʻo e sōsaieti ʻo e faʻahinga ʻo e tangatá. Kapau ʻoku tau fie hoko ʻo lavameʻa ʻi hono fakaaʻu atu kiate kinautolu ʻa e pōpoaki ʻo e Puleʻangá, ko e founga ʻo ʻetau fakahoko atu ʻa e pōpoakí kuo pau ke ʻalu fakataha ia mo e liliu ʻo e taimí. ʻOku tau fiemaʻu ke fakahoko atu ʻa e ongoongo leleí ʻi ha founga ʻe mahuʻingaʻia ai ʻa e kakaí pea aʻu ki honau lotó.
2 ʻI he ngaahi taʻu kuohilí, ʻi he ngaahi fonua lahi ko e ngāue fakamoʻoní naʻe faikehekehe, koeʻuhí ko e tokolahi taha ʻo e kakaí, naʻa nau nofo ʻi ha moʻui nonga ange, pea nau ongoʻi malu. Naʻe hoko ʻa e lotú ko ha feituʻu toputapu ʻi heʻenau moʻuí. Naʻe fakamāʻolungaʻi ʻaupito ʻa e tuʻunga ʻo e Tohitapú. ʻI he ngaahi ʻaho ko iá ko e faifakamoʻoní naʻe faʻa kau ki ai hono fakakikihiʻi ʻa e ngaahi tokāteline taʻetotonú. ʻI he ʻahó ni, ʻoku puputuʻu ʻa e moʻui ʻa e kakaí. ʻOku fakaangaʻi ʻa e lotú pea ko e niʻihi kuo mole ʻenau tui ki he Tohitapú.
3 Naʻe fakatokangaʻi ʻe ha ʻovasia fefonongaʻaki ʻe taha: “ʻI he taimi ko ʻení, ngalingali ʻoku lahi ʻaupito ʻa e ngaahi palopalema pea mo e ngaahi faingataʻa ʻi he moʻui ʻa e kakaí ʻa ia ʻoku fiemaʻu ke tau akoʻi kinautolu ki he founga ʻo e moʻuí.” Ko e ngaahi fakakaukau he taimí ni ʻa e kakaí ʻoku kaunga tefito pē ia kiate kinautolu, ko honau ngaahi fāmilí, pea mo ʻenau ngaahi loto-moʻuá. Ko e ngaahi meʻá ni ʻoku nau lāulea lahi ʻaupito ki ai ʻi he taimi ʻoku nau fakatahataha fakataha aí. ʻOku fiemaʻu ke tau manatuʻi ia ʻi heʻetau ngāue fakaefakamoʻoní.
4 Ko e Puleʻanga ʻo e ʻOtuá ko e ʻAmanaki Papau Pē Ia ki he Kahaʻú: Ko e kakai tokolahi ʻoku siʻi ʻenau falala ki he puleʻanga fakaetangatá. ʻOku nau ongoʻi ʻoku ʻikai pē ha ʻamanaki ia ke sio atu ki ha māmani lelei ange ʻi heʻenau moʻuí. Kuo ʻikai pē ke lava ʻe he lotu loí ia ke ʻoange kiate kinautolu ha meʻa ke makatuʻunga ai ha ʻamanaki. Ko e ʻuhinga ia ʻoku lahi ange ai ʻa e fiemaʻu ki he faʻahinga ʻo e tangatá ke nau fanongo ki he ongoongo lelei ʻo e Puleʻanga ʻo e ʻOtuá. Fakahā ʻa e founga te ne toki tokonaki mai ai ʻa e ngaahi fakaleleiʻanga ki he kotoa ʻo e ngaahi palopalema ʻoku fehangahangai mo e faʻahinga ʻo e tangatá.
5 Ko e Tohitapú ko e Matavai Falalaʻanga Pē Ia ʻo e Fakahinohinó: Ko e kakaí ʻi he ʻahó ni kuo tākihalaʻi ʻe he kau taki ʻoku nau falala ki he poto fakaetangatá pea mo e ngaahi filōsefa fakamāmaní. Kuo toki fakatokangaʻi ʻe he kakaí “ʻoku ʻikai ʻi he tangata ʻoku haʻele ke fakaʻuli ʻene ʻalu.” (Sel. 10:23) Ko e lēsoni mahuʻinga taha ʻe lava ke nau akó kuo pau ke nau ‘falala kia Jihova aki honau loto kotoa; bea oua naa nau faaki ki honau boto onautolu.’ (Pal. 3:5, PM) ʻOku liliu ʻa e taimí, ka ʻoku ʻikai pehē ʻa e Tohitapú ia. Ko ia, ʻi heʻetau ngāue fakafaifekaú ʻoku totonu ke tau fakaeʻa maʻu pē ʻa e Folofola ʻa e ʻOtuá, ʻo akoʻi ʻa e niʻihi kehé ke nau houngaʻia ʻi he tataki fakamānavaʻi fakaʻotuá. (2 Tīm. 3:16, 17) Ke fakahoko ʻa e taumuʻa ko iá, kuo pau ke tau tauhi maʻu ʻa e mahuʻinga ʻo e Tohitapú ʻi he ʻao ʻo e kakaí ʻaki ʻa e lave maʻu pē ki ai ʻi heʻetau tuʻuakí, ngāueʻaki ia ke taliʻaki ʻenau ngaahi fehuʻí, pea poupouʻi ʻa e fiemaʻu ke ako ia pea ngāueʻaki ʻa e poto ʻaonga ʻoku ʻi aí.
6 Naʻa mo e liliu ʻa e taimi ʻo e ʻaho ní, ko ʻetau ngaahi taumuʻa ʻi he ngāue fakafaifekaú ʻoku kei tatau ai pē. ʻOku tau malangaʻi ʻa e ongoongo lelei ʻo e Puleʻangá, fakatupulekina ʻa e falala pau ki he Folofola ʻa e ʻOtuá, pea tokoniʻi ʻa e niʻihi kehé ke nau sio ʻoku fiemaʻu ke nau ako ʻa e Tohitapú fakataha mo kitautolu. Ko e meʻa te tau leaʻakí kuo pau ke hoko ʻo kaunga ki he ngaahi fiemaʻu lolotonga ʻa e faʻahinga te tau faifakamoʻoni ki aí. ʻI hono fai ʻení, te tau hoko leva ai ko e kau fakahā atu ʻo e ongoongo leleí ki he niʻihi kehé pea te tau maʻu ai ha faʻahinga tokolahi ʻaupito.—1 Kol. 9:19, 23.