Puha Fehuʻi
◼ ʻOku tau maʻu ʻeni ʻa e tohi ʻIlo ʻA Ia ʻOku Taki Atu ki he Moʻui Taʻengatá, ko e hā hono fuoloa ʻoku totonu ke fai ai ha ako Tohitapu ʻi ʻapí?
ʻOku fokotuʻu mai ʻe he ʻEtau Ngāue Fakafaifekau ʻo e Puleʻanga ʻo Sepitema 1993 ke hokohoko atu ha ako Tohitapu ʻi ʻapi mo e faʻahinga mahuʻingaʻia foʻoú kae ʻoua kuo ʻosi hono ako ʻa e ongo tohí. ʻOku tau maʻu ʻeni ʻa e tohi ko e ʻIló, ʻa ia ʻoku hā ngali lelei ke fai ha feʻunuʻaki ʻi he foungá ni, ʻo hangē ko ia ʻoku fakaikiiki mai ʻi he peesi 12 mo e 13 ʻo e tatau ʻo e Taua Leʻo ʻo Fepueli 1, 1996.
Ko e tohi ko e ʻIló ʻoku faʻu ia ke tokoniʻi ʻa e faʻahinga “ʻoku hehema totonu ki he moʻui taʻengatá” ke ako ʻa e meʻa ʻoku nau fiemaʻu ke ʻiló koeʻuhi ke nau fai ha fakatapui kia Sihova pea papitaiso. (Ng. 13:48, NW) Ko ia ai, hili ʻa hono fakakakato ʻa e tohi foʻoú ni, ʻoku ʻikai toe fiemaʻu ke ako mo e tokotaha ako tatau ko iá ha tohi hono ua. ʻI he kamata ke maʻu ʻa e moʻoní ʻe hoʻo kau akó, ʻe lava ke ke hokohoko atu hono fakalototoʻaʻi kinautolu ke fakakakato ʻenau ʻiló ʻaki hono maʻu ʻa e ngaahi fakataha ʻa e Kau Fakamoʻoni ʻa Sihová pea pehē ki hono lau ʻa e Tohitapú pea mo e ngaahi tohi kehekehe faka-Kalisitiané.
Kapau ʻokú ke alāanga kakato mo e ngaahi fehuʻi ʻi he kiʻi tohi ko e Ngaahi Akonaki Tefito ʻa e Tohi Tapú, ʻe tokoni nai ʻeni. Neongo ʻoku ʻikai totonu ke ke lave ki he ngaahi fehuʻi ko iá pe fakamanatu mo e tokotaha ako Tohitapú kinautolu, ʻe lelei nai ke fakamamafaʻi ha ngaahi poini ʻi he tohi ko e ʻIló ʻa ia te ne fakaivia ʻa e tokotaha akó ke fakahāhā ai ha mahinoʻi totonu ʻo e ngaahi moʻoni tefito ʻi he Tohitapú ʻi he taimi ʻoku fakamanatu ai ʻe he kau mātuʻá ʻa e ngaahi fehuʻí fakataha mo e kau teu papitaisó.
ʻOku ʻikai fiemaʻu ke fakalahiʻi ʻa e fakamatala ʻi he tohi ko e ʻIló, ʻi hono ʻomai ha fakamatala kehe pe tānaki mai ʻa e ngaahi ʻuhinga kehe ke poupouʻiʻaki ʻa e ngaahi akonaki ʻi he Tohitapú pe ke fakahalaʻi ʻa e ngaahi tokāteline loí. ʻE hoko pē ʻeni ia ko hono toe fakalōloa ʻa e akó ki ha vahaʻa taimi lōloa ange. ʻI hono kehé, ʻoku ʻamanekina ʻe lava ke vave hono ako kakato ʻa e tohí, mahalo pē nai ʻi ha māhina ʻe ono nai. ʻOku fakamamafaʻi heni ʻa e fiemaʻu kiate kitautolu ke ako fakamākukanga ʻa e fakamatalá ki muʻa, koeʻuhi ke lava ke tau fakahā atu ia ʻi he founga mahino mo nounou. ʻOku totonu ke fakaʻaiʻai pehē pē mo e tokotaha akó ke ne ako ia ki muʻa, sio ki he ngaahi konga Tohitapu ʻoku haá, pea feinga ke ne mahinoʻi lelei ʻa e meʻa ʻoku akoʻi ʻe he tohí ʻi he vahe taki taha.
Kuo fakamamafaʻi mai ʻe he Taua Leʻo ʻa e fiemaʻu ki he Kau Fakamoʻoni ʻa Sihová ke nau fai ha ngaahi ako Tohitapu ola lelei lahi ange ʻi ha vahaʻa taimi nounou ange. (Sio ki he ʻAisea 60:22.) Ko hono ngāueʻaki ola lelei ʻa e tohi ko e ʻIló ʻe lava ke tokoniʻi ai ʻa e faʻahinga foʻoú ke nau maʻu ʻa e ʻilo ʻoku taki atu ki he moʻui taʻengatá pea ngāue ʻo fakatatau ki ai.—Sione 17:3.