Ko ha Vakai Fakalakalaka Atu ki he Ngāue Fakavavevave ʻo e Ngaohi-Ākongá
1 Ki muʻa ke ne mavahe mei he foʻi māmaní, naʻe fekauʻi ʻe Sīsū hono kau muimuí ke ‘ngaohi ʻa e ngāhi kakai kotoa pe ko ʻene kau ako.’ Ko e fiemaʻu ko ʻení ke nau fai ha feingatau fakamalanga mo fakafaiako lahi pea fakalahi atu ʻenau ngāué ki he kotoa ʻo e foʻi māmaní. (Mt. 28:19, 20; Ng. 1:8) Naʻa nau vakai ki he fekau ko ʻení ko ha kavenga ʻoku fuʻu faingataʻa ke fua? ʻIkai, fakatatau ki he ʻapositolo ko Sioné. ʻI he hili hono fakamoleki ʻa e taʻu ʻe 65 ʻi he tuʻunga ko ha tokotaha ngaohi-ākongá, naʻá ne tohi: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.”—1 Sione 5:3.
2 Ko e lēkooti Fakatohitapu ʻo e ngāue ʻa e ʻuluaki kau Kalisitiané ʻoku fakamoʻoniʻi ai naʻa nau ngāue fakavavevave ki honau fekauʻi ke ngaohi-ākonga maʻa Sīsū Kalaisí. (2 Tim. 4:1, 2) Naʻa nau fai ʻeni, ʻo ʻikai koeʻuhi pē ko ha fatongia, ka koeʻuhi ko ʻenau holi anga-ʻofa ke fakahīkihikiʻi ʻa e ʻOtuá pea ke fakahoko ʻa e ʻamanaki ʻo e fakamoʻuí ki he niʻihi kehé. (Ng. 13:47-49) Koeʻuhi ko e kotoa ʻoku nau hoko ko e kau ākongá naʻe ʻosi ange iá ko e kau ngaohi-ākonga kinautolu, naʻe tupulaki vave ai ʻa e fakatahaʻanga Kalisitiane ʻi he ʻuluaki senitulí.—Ng. 5:14; 6:7; 16:5.
3 ʻOku Vave ʻa e Ngāue Ngaohi-Ākongá: Ko e ngāue ngaohi-ākonga lahi taha ʻi he kotoa ʻo e taimí ʻoku fakahoko ia ʻi he senituli hono 20 ní! ʻI he aʻu mai ki he taimi ní, kuo tali ʻe he laui miliona ʻo e kakaí ʻa e ongoongo leleí pea ngāue ki ai. (Luke 8:15) Koeʻuhi ko e vave ke ʻosi ʻa e taimi ʻo e ngaahi meʻa ʻo e fokotuʻutuʻu lolotongá, ko e “tamaioeiki agatonu mo boto” kuó ne tokonaki mai maʻatautolu ʻa e ngaahi meʻangāue ʻokú ne ʻai ke malava ai ʻa e kakai ʻoku loto-totonú ke ako vave ʻa e moʻoní.—Mt. 24:45, PM.
4 ʻI he 1995, naʻa tau maʻu ai ʻa e tohi ʻIlo ʻA Ia ʻOku Taki Atu ki he Moʻui Taʻengatá, pea ʻi he 1996 naʻe hoko mai ai ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻI he fekauʻaki mo e tohi ʻIlo, ʻoku fakahā mai ʻe he tatau ʻo e Taua Leʻo ʻo Fepueli 1, 1996, peesi 13: “Ko e tohi peesi ʻe 192 ko ʻení ʻoku lava ke ako ia ʻi ha taimi nounou pē, pea ʻoku totonu ko kinautolu “naʻe tuʻutuʻuni ki he moʻui taʻengata” ʻe malava ke nau ako feʻunga ʻo fakafou ʻi ha ako ʻo e tohí ke fai ha fakatapui kia Sihova pea papitaiso.”—Ng. 13:48.
5 Ko e fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996, “Founga ke Ngaohi-Ākonga ʻAki Ai ʻa e Tohi ko e ʻIlo,” naʻá ne ʻomai kiate kitautolu ʻa e taumuʻa ko ʻení: “Fakatuʻunga ʻi he ngaahi tuʻunga pea mo e tufakanga ʻo e tokotaha akó, ʻe malava nai kiate koe ke ako ʻa e lahi taha ʻo e ngaahi vahé ʻi ha ako ʻe taha ʻi ha houa ʻe taha nai, ʻo ʻoua ʻe fakavaveʻi ʻa e akó. ʻE fai ʻe he kau akó ha fakalakalaka lelei ange ʻi he taimi ʻe tauhi ai ʻe he faiakó mo e tokotaha akó fakatouʻosi ʻena fokotuʻutuʻu ki he akó he uike taki taha. Naʻe hoko atu ʻo pehē ʻe he kupú: “ʻOku totonu ke ʻamanekina ʻi he taimi ʻoku ʻosi kakato ai ʻa e ako ʻa e tokotaha akó ʻa e tohi ko e ʻIlo, ʻe hoko ʻo hā mahino ʻa ʻene loto-totonú mo e loloto ʻo ʻene houngaʻia ʻi hono tauhi ʻa e ʻOtuá.” Naʻe fakamatalaʻi ʻi he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo ʻOkatopa 1996: “ʻOku ʻamanekiná fakafuofua ki ha vahaʻa taimi nounou, ko ha faiako lelei te ne malava ke tokoniʻi ha tokotaha loto-totonu ke maʻu ha ʻilo feʻunga ke fai ha fili fakapotopoto ke tauhi ʻa Sihova.”
6 ʻOku Maʻu ʻe he Tohi ʻIlo ʻa e Ngaahi Ola: ʻI he hoko hono papitaiso ha finemui, naʻá ne lave ki he anga ʻo ʻene ongoʻi fekauʻaki mo hono ako ʻa e tohi ʻIlo. ʻI ha vahaʻa taimi, naʻá ne ako ai ʻa e tohi Moʻui Taʻengatá. ʻI he taimi naʻe tuku ange mai ai ʻa e tohi ʻIlo, ko e tuofefine naʻá ne fai ʻene akó naʻe hiki ia ki he tohi foʻoú. Naʻe vave ʻa e lava ke sio ʻa e tokotaha akó naʻe fiemaʻu heni ha fili ʻi heʻene tafaʻakí, pea naʻe ueʻi ia ke ne fai ha fakalakalaka vave mei he tuʻunga ko iá ʻo faai mai ai. Ko e finemuí, ko hotau tuofefine ia ʻi he taimí ni, ʻokú ne pehē: “Naʻe tokoniʻi au ʻe he tohi Moʻui Taʻengatá ke u ʻofa kia Sihova, ka naʻe tokoniʻi au ʻe he tohi ʻIlo ke u fai ha fili ke tauhi kiate ia.”
7 Fakakaukau ange ki he founga vave naʻe ako ai ʻa e moʻoní ʻe he fefine ʻe taha. ʻI he hili ʻene ako hono uá, naʻá ne maʻu ha fakataha ʻi he Fale Fakatahaʻangá ʻi he lolotonga ʻa e ʻaʻahi ʻa e ʻovasia fakafeituʻú. ʻI he uike ko iá, ʻi heʻene ako hono tolú, naʻá ne tala ange kiate ia kuó ne ʻosi fai ʻene fakatapui kia Sihová pea ʻokú ne fiemaʻu ke hoko ko ha tokotaha malanga teʻeki papitaiso. Naʻá ne fakataha mo e kau mātuʻá, ʻa ia naʻa nau tali ia ke hoko ko ha tokotaha malanga, pea ʻi he uike hono hokó naʻá ne kamata leva ʻi he ngāue fakamalangá. Naʻá ne hoko ʻo tokanga lahi ki heʻene ako Tohitapú peá ne kole ha ngofua nofo mei heʻene ngāué koeʻuhí ke ako tuʻo ua pe tolu ʻi he uike pea fakamoleki ha taimi lahi ange ʻi he ngāue fakafaifekaú. ʻI he taimi ʻe niʻihi, naʻá na ʻosiki ʻa e vahe ʻe ua pe tolu ʻi he taimi taki taha. Naʻá ne kamata ke ngāueʻaki ʻa e meʻa naʻá ne akó ʻi he tafaʻaki kotoa ʻo ʻene moʻuí, ʻo ʻosi ʻa e tohi ʻIlo ʻi he uike ʻe fā, pea fakalakalaka atu ai ki he papitaisó!
8 ʻOku fakamatalaʻi ʻe ha husepāniti ʻo ha tuofefine ʻa ia tonu ʻi he tuʻunga “ko ha faʻahinga hoa taʻetui.” ʻI he ʻaho ʻe taha, naʻe tuʻuaki ange ʻe ha tokoua kiate ia ha ako Tohitapu ʻi he tohi ʻIlo ʻi he tuʻunga ʻe lava ke tuku ʻe he tangatá ʻi he hili ʻa e ʻuluaki akó pe ʻi ha faʻahinga taimi pē hili iá. Naʻe loto-lelei ʻa e husepānití ke fai ha ʻahiʻahi, neongo naʻe ʻikai ko ha tokotaha ako lelei ia ʻi he taimi ʻo ʻene kei siʻí pea ʻikai te ne ako ha faʻahinga tohi fakalotu pē ʻo laka hake ʻi he taʻu ʻe 20. Ko e hā ʻene tali ki hono ako ʻa e tohi ʻIlo? Naʻá ne pehē: “Ko ha meʻa fakafiefia moʻoni ia ke ʻilo ko e tokoni faka-Tohitapu ko ʻení kuo hiki ia ʻi he founga faingofua pehē. Ko e fakamatalá naʻe ʻomai mātuʻaki maʻalaʻala mo ʻuhinga-totonu ʻo ʻikai fuoloa kuó u mātuʻaki hanga atu mo e fakatuʻamelie ki heʻema ako hono hokó. Ko ʻeku faiakó naʻá ne muimui pōtoʻi ʻi he ngaahi founga ngaohi-ākonga ʻoku fokotuʻu mai ʻe he Sōsaietí, pea ʻaki ʻa e tokoni ʻa e laumālie ʻo Sihová, naʻá ku papitaiso ʻi he māhina ʻe fā ki mui aí. ʻOku lava ke u lea moʻoni kapau te tau fakatupulekina ha ʻofa ki he ngaohi-ākongá, ʻo hokohoko atu ʻi he kumi ki he faʻahinga ʻoku loto-totonú ʻi he ngāue fakamalangá, ʻo ngāueʻaki ʻa e tohi ʻIlo pea mo e ngaahi tokoni faka-Tohitapu kehe ʻoku tokonaki mai ʻe he Sōsaietí, pea ko e mahuʻinga tahá, ke lotu ki he tataki ʻa Sihová, ʻe malava ke tau maʻu ai ʻa e monū makehe tofu pē ko ia ʻo e tokoni ki he ngaohi-ākongá.” Ko e ngaahi meʻa ia ʻoku kehekehenga moʻoni ʻene hokosiá. Ko e tokolahi taha ʻo ʻetau kau akó ʻoku ʻikai te nau haʻu ki he moʻoní ʻi he founga vave ko ʻení.
9 Fakalakalaka ʻa e Kau Akó ʻi he Vave Kehekehe: Kuo pau ke tau ʻiloʻi ko e malava fakatouʻosi ʻa e kau faiakó mo e kau ako ʻo e Folofola ʻa e ʻOtuá ʻe lava ke kehekehe ia ʻi ha tuʻunga lahi. ʻOku lava ke tuai pe vave ʻa e tupu fakalaumālié. Ko e kau ako ʻe niʻihi ʻoku lau māhina siʻi pē pea nau fai ʻa e fakalakalaka ʻa ia ʻe fuoloa ange ʻa e niʻihi kehé ia. Ko e vave ʻo e tupu fakalaumālie ʻa ha taha ʻoku kaunga ki ai hono tuʻunga fakaakó, ko e lahi ʻo ʻene houngaʻia ki he ngaahi meʻa fakalaumālié, pea mo e loloto ʻo ʻene anga-līʻoa kia Sihová. ʻOku ʻikai ko e tokotaha kotoa pē ʻoku tau ako mo iá ʻoku nau “tali loto lelei ʻaupito” ke ako fakaʻaho ʻa e ngaahi Konga Tohitapú, ʻo hangē ko ia naʻe fai ʻe he kakai Pēlea ʻo e kuonga muʻá ʻa ia naʻa nau hoko ko e kau tuí.—Ng. 17:11, 12.
10 Ko e ʻuhinga ia ʻoku ʻomai ai ʻa e tataki moʻoni ko ʻení ʻi he fakalahi ʻo ʻEtau Ngāue Fakafaifekau ʻo e Puleʻanga ʻo ʻEpeleli 1998, “Fiemaʻu—Ngaahi Ako Tohitapu Lahi Ange”: “Ko hono moʻoní, ʻoku ʻikai ko e kau ako Tohitapu kotoa pē ʻoku nau fakalakalaka ʻi he vave tatau. ʻOku ʻikai ke hehema fakalaumālie ʻa e niʻihi hangē ko e niʻihi kehé pe vave hono maʻu ʻa e ngaahi meʻa kuo akoʻí. ʻOku mātuʻaki moʻui femoʻuekina ʻa e niʻihi pea ʻikai nai ai malava ke līʻoa atu ʻa e taimi ʻoku fiemaʻú ke ʻosiki ha vahe kakato ʻi he uike taki taha. Ko ia, ʻi he ngaahi tuʻunga ʻe niʻihi ʻoku fiemaʻu nai ke fai ha konga lahi ange ʻi he ako tuʻo tahá ke ʻosiki ha ngaahi vahe pau pea fakalahi mai ha ngaahi māhina ʻe niʻihi ke fakakakato ke ʻosi ʻa e tohí.”
11 ʻOku Tauhi ʻe he Kau Ngaohi-Ākongá ha Vakai Mafamafatatau: ʻOku fiemaʻu ke fakapapauʻi ʻa e vave ʻo e akó ʻo fakatatau ki he ngaahi tuʻunga mo e malava ʻa e tokotaha akó. Koeʻuhi ʻoku fakalototoʻaʻi kitautolu ke kamata ha ngaahi ako ʻi he polosiua Fiemaʻu, ʻe fiemaʻu nai ʻa e māhina ʻe ua pe tolu ke ʻosiki ai ia ki muʻa ke hoko atu ki he tohi ʻIlo. Kapau te tau ngāueʻaki ʻa e kotoa ʻo e ngaahi fokotuʻu kuo fokotuʻutuʻu mai ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996, ʻe fiemaʻu nai ai ha toe māhina ʻe ono ki he hiva ke fakaʻosi ʻa e tohi ʻIlo. Ko e niʻihi kuo nau toki kamata ha ako ʻi he tohi ʻIlo kuo nau hiki leva ki he polosiua Fiemaʻu ke tokoniʻi ʻa e tokotaha akó ke ne ako vave ange ʻa e ngaahi moʻoni faka-Tohitapu tefitó. Pea toe fakafoki leva ʻa e akó ki he tohi ʻIlo. Kapau naʻe kamata ha ako ʻi he tohi ʻIlo pea fakalakalaka lelei, ʻe ʻaonga nai ke ako ʻa e polosiua Fiemaʻu ʻi he hili ʻa e kakato ʻa e tohí, ʻo fakamanatu vave ai ʻa e ngaahi moʻoni tefito ʻo e Folofola ʻa e ʻOtuá. Ko e hā pē ʻa e tuʻungá, ʻoku ʻikai fiemaʻu ke tau feilaulauʻi ʻa hono maʻu ʻe he tokotaha akó ʻa e mahino maʻalaʻala koeʻuhí pe ko ha fakavavevave. Ko e tokotaha ako kotoa pē ʻoku fiemaʻu ki ai ha makatuʻunga fefeka ki heʻene tui foʻou ki he Folofola ʻa e ʻOtuá.
12 ʻI he vakai atu ki he feituʻu ʻoku tau ʻi ai ʻi he faai mai ʻa e taimí, ʻoku fuʻu fakavavevave ange ʻi ha toe taimi ki muʻa ke tokoniʻi ʻa e niʻihi kehé ke ako ʻa e moʻoní. Tuku kehe ʻa e lotu hokohoko ke kamata ha ngaahi ako Tohitapu foʻoú, tau lotu muʻa maʻá e faʻahinga ʻoku tau lolotonga ako mo iá. Pea ʻe hoko ia ko ha meʻa fakafiefia kiate kitautolu ke hanganaki papitaiso ha kau ākonga lahi ange “ʻi he ngaahi ʻaho kotoa pe, ʻo aʻu ki he ngataʻanga ʻo mamani.”—Mt. 28:20.