Tokoniʻi Kinautolu ke Toe Ngāue
1 ʻI hono ʻiloʻi ʻa e tuʻutāmaki fakalaumālie ʻe malava ke hoko ki hono kaungā-Kalisitiané, naʻe tohi ʻe he ʻaposetolo ko Paulá: “Ko e taimi ʻeni ke mou ʻā leva mei he mohe; he ʻoku ofi ʻeni hotau fakamoʻui ʻi he taimi naʻa tau fua tui ai.” (Loma 13:11) Naʻe hohaʻa ʻa Paula ʻo kau ki hono ngaahi tokoua naʻa nau hoko ʻo tulemohe fakalaumālié; naʻá ne loto-moʻua ke langa hake kinautolu ke toe fakafoʻou ʻenau ngāué.
2 ʻOku lava moʻoni ke pehē ko e fakapoʻuli ʻo e maama motuʻá ni ʻoku fakaʻau ke mole atu pea ko e mafoa ʻa e ata ʻo e maama foʻoú ʻoku ʻi muʻa. (Loma 13:12) ʻOku tau maʻu ʻa e ʻuhinga lelei ke hohaʻa fekauʻaki mo hotau ngaahi tokoua kuo ʻikai te nau kei feohi mo kitautolu ko e kau malanga ʻo e ongoongo leleí. ʻI he taʻu fakangāue kuohilí, ʻi he ʻIunaite Seteté pē, naʻe laka hake ʻi he toko 27,000 ʻo e kau malangá naʻa nau toe longomoʻui. ʻE lava fēfē ke tau tokoniʻi ʻa e faʻahinga kehe ʻoku ʻikai te nau longomoʻuí ke nau toe ngāue kia Sihova?
3 Ko e Meʻa ʻe Lava ke Fai ʻe he Kau Mātuʻá: Ko e tokolahi taha ʻo e faʻahinga kuo ʻikai te nau longomoʻuí kuo ʻikai te nau liʻaki ʻa e moʻoní; ʻoku nau tuku pē ʻa e malangá koeʻuhi ko ha lotosiʻi, ngaahi palopalema fakafoʻituitui, tuli ki he ngaahi meʻa fakamatelié, pe ngaahi loto-moʻua kehe ʻi he moʻuí. (Luke 21:34-36) Kapau ʻoku malava, ʻoku lelei ʻānoa ange ke tokoniʻi kinautolu ki muʻa ke nau hoko ʻo ʻikai longomoʻuí. ʻOku totonu ki he sekelitali ʻa e fakatahaʻangá ke ne fakatokanga ki he tokotaha faiako ʻo e Ako Tohi ʻa e Fakatahaʻangá ʻi he taimi ʻe hoko ai ʻo ʻikai ke lipooti maʻu pē ʻe ha tokotaha malangá ʻene ngāué. ʻE lava ke fai ha ngaahi fokotuʻutuʻu ki ha ʻaʻahi fakatauhisipi. ʻOku totonu ke nau feinga ke fakapapauʻi ʻa e tupuʻanga tefito ʻo e palopalemá pea mo e founga ʻe lava ke ʻoatu ai ha tokoní.—Sio ki he Watchtower ʻo Sepitema 15, 1993, peesi 20-23.
4 Founga ʻe Lava Ai ʻe he Niʻihi Kehe ke Tokoni: Ko e tokolahi taha ʻiate kitautolú ʻoku tau ʻiloʻi ha taha ʻoku ʻikai longomoʻui. Mahalo ko ha taha ia naʻa tau vāofi he kuohilí. Ko e hā ʻe lava ke tau fai ke tokoní? Kiʻi afe atu ai ʻi ha ʻaʻahi nounou. Talaange kiate ia ʻokú ke manatu ki hoʻomo faʻa feohí. Ke ke loto-fiefia pea ʻi ha founga pau. Fakahaaʻi hoʻo tokangá ʻo ʻoua ʻe fakahuʻuhuʻu ʻokú ne puke fakalaumālie. Lave ki ha ngaahi meʻa fakatupu langa hake naʻe hokosia pe ngaahi meʻa lelei kehe naʻe fakahoko ʻe he fakatahaʻangá. Talaange loto-māfana kiate ia ʻo kau ki he Fakataha-Lahi Fakavahe “Kau Talafekau ʻo e Melino Fakaʻotuá,” pea fakalototoʻaʻi ia ke haʻu ki ai. Ko e toe feohi mo e fakatahaʻangá ʻe tokoni nai ia kiate ia ʻo lahi ange ʻi ha toe meʻa kehe. Tuʻuaki ange te ke loto-lelei ke ʻalu fakataha mo ia ki he ngaahi fakatahá. ʻAi ke ʻilo ʻe he kau mātuʻá ʻa e tali kuó ke maʻú.
5 ʻI he taimi ʻoku foki ai ha tokotaha naʻe ʻikai longomoʻui ki he ngaahi fakatahá, ngalingali ko e moʻoni te ne ongoʻi faingataʻaʻia ʻi he fetaulaki mo e niʻihi kehe kuó ne ʻilo ʻi he kuohilí. ʻOua ʻe ʻeke, “Naʻá ke ʻi fē?” ʻI hono kehé, ʻai ia ke ne ongoʻi ʻoku talitali lelei. Fakakau ia ʻi he fetalanoaʻakí. Fakafeʻiloaki ia ki he faʻahinga ʻoku ʻikai te ne ʻiló. Tangutu fakataha mo ia he lolotonga ʻa e fakatahá, fakapapauʻi ʻokú ne maʻu ha tohi hiva pea mo e tohi ʻoku fai ai ʻa e akó. Fakalototoʻaʻi ia ke toe haʻu, pea talaange te ke fie tokoni kapau ʻoku ʻi ai ha fiemaʻu.
6 Ko hono maʻu ha ʻofa māfana ki he faʻahinga ko ia kuo heé, ʻoku fiefia ai ʻa Sihova mo Sīsū ʻi he taimi ʻoku toe ake fakalaumālie ai ʻa e faʻahinga peheé. (Mal. 3:7; Mt. 18:12-14) ʻE lava ke tau hokosia ha loto-fiefia tatau pehē kapau ʻoku tau lavameʻa ʻi hono tokoniʻi ʻa e niʻihi kehé ke nau toe tauhi kia Sihova.