ʻOku Fiemaʻu ʻa e Ngaahi Tokoua Lahi Ange ʻi he Ngāue Tāimuʻá
1 ʻOku enginakiʻi kitautolu ʻe Paula ke ‘tupulekina maʻu ai pe ʻi he ngaue ʻa e ʻEikí.’ (1 Kol. 15:58) Ki he tokolahi, ʻoku ʻuhinga ʻení ke fai ʻa e ngāue tāimuʻá. ʻI he Sepitema kuo maliu atú, ko e laui afe naʻe kau atu ki he ngāue tāimuʻá ʻi māmani lahi!
2 ʻI he taimí ni, ko e tokolahi taha ʻo e kau ngāue tāimuʻá ʻi hotau feituʻu vaʻá ko e ngaahi tuofāfine. (Sāme 68:11) Ko ha fiefia ē ʻe hoko ki he fakatahaʻangá kapau ʻe lahi ange ʻa e ngaahi tokoua te nau kau ki he ngāue ko e kau sevāniti taimi-kakató. (Sāme 110:3) ʻOku mahino ko e ngaahi tokoua tokolahi ʻoku nau tokangaʻi ʻa e ngāue fakamāmani mamafa mo e ngaahi fatongia fakafāmili. Ko e niʻihi kehe foki ʻoku nau ngāue mālohi ke tokangaʻi ʻa e ngaahi fiemaʻu fakalaumālie ʻa e fakatahaʻangá. ʻOku tau houngaʻia ʻi he kau tangatá ni ʻa ia ʻoku nau feinga mālohi koeʻuhi ko e Puleʻangá.—1 Tīm. 4:10.
3 Ka neongo ia, ʻe lava ʻe he tokolahi ʻo kimoutolu ngaahi tokouá ʻo fai ʻa e ngāue tāimuʻá? Kapau ʻoku tāimuʻa ho uaifí, ʻe lava ke ke kau mo ia? Kapau kuó ke maʻu ha vāhenga-mālōlō, ʻikai ʻokú ke loto-tatau ʻoku ʻikai ha founga fakafiemālie ange ke fakamoleki ai ho taimí ka ko e ngāue fakafaifekau taimi-kakató? Kapau ʻokú ke toki ʻosi mei he ʻapiakó, kuó ke fakakaukau fakamātoato mo lotu ke ʻai ʻa e ngāue tāimuʻá ko ha lakaʻanga ia ki he toe ngaahi monū ʻo e ngāué?—ʻEf. 5:15-17.
4 Naʻe fakatau atu ʻe he tokoua ʻe taha ʻene pisinisi tuʻumālié pea ngāue konga taimi pē koeʻuhi kae lava ke ne tāimuʻa. Fakataha mo ʻene taki leleí, ko e toko tolu ʻi heʻene fānau ʻe toko faá naʻa nau hoko ko e kau tāimuʻa ʻi he taimi pē naʻa nau ʻosi ai mei he ʻapiakó. Ko hono toko faá naʻá ne vēkeveke ke kau fakataha mo kinautolu. Ko e tokoua ko ʻení mo hono fāmilí kuo tāpuakiʻi lahi ʻaupito.
5 Ko ha Matapā Lahi ʻOku Ava: Ko e ngāue tāimuʻá ʻoku lava ke “fakaava ai ʻa e matapā lahi ʻoku iku atu ki he ngāue.” (1 Kol. 16:9, NW) Ko e ngaahi tokoua ʻoku nau tāimuʻá ʻoku ngāuelahiʻaki nai ʻi he fakatahaʻangá. Ko e ngāue fakamalanga faivelengá ʻoku tānaki atu ia ki he lahi ʻo honau tuʻunga fakalaumālié pea tokoni ki heʻenau fakalakalaka fakateokalatí. Ko e tāimuʻá ʻe lava ke ne fakaava ʻa e matapā ki he toe ngaahi monū ʻo e ngāué. Hili ʻa e ʻuluaki taʻu ʻo e tāimuʻá, ʻoku ʻi ai ʻa e tāpuaki ʻo e kau ki he Akoʻanga Ngāue Tāimuʻá. Ko e kau sevāniti fakafaifekau teʻeki malí mo e kau mātuʻa teʻeki malí te nau kakapa atu nai ke kau ki he Akoʻanga Ako Fakafaifekaú. Ko e ngaahi hoa mali ʻoku nau taaú te nau tohi kole nai ki he Akoʻanga Kiliatí. Ko e ngaahi tokouá ʻe faai atu pē ʻo taau ki he ngāue fefonongaʻakí. ʻIo, ko e ngāue fakafaifekau tāimuʻá ʻokú ne fakaava ʻa e matapā ki he ngaahi monū lahi ange ko ʻeni ʻo e ngāue ʻi he kautaha ʻa Sihová.
6 Ko e ngaahi tokoua ʻe lava ke nau fakaʻataʻatā nai kinautolu ke ngāue tāimuʻa tuʻumaʻú, te nau aʻusia ʻa e fiefia lahi ʻaupito ʻoku hoko ʻi hono fai ha foaki lahi.—Ng. 20:35.