ʻOku Anga-Fēfē Hoʻo Tali ki he Loto-Noá?
1 Ko e loto-noá ko ha siʻi ʻo e ongoʻí pe ongo ʻo e lotó, ko e ʻikai ha mahuʻingaʻia pe tokanga. Ko e taha ia ʻo e ngaahi ʻulungaanga ʻoku fai lahia ange mo faingataʻa ange ʻoku tau fetaulaki mo ia ʻi he ngāue fakafaifekaú. ʻOku anga-fēfē hoʻo tali ki aí? Kuó ne ʻai koe ke ke māmālie ʻi hoʻo ngāue fakafaifekaú? ʻOku anga-fēfē hoʻo lavaʻi iá koeʻuhi ka ke aʻu ai ki he kakaí mo e pōpoaki ʻo e Puleʻangá?
2 ʻUluakí, fakakaukau ki he ʻuhinga ʻoku loto-noa ai ʻa e kakai ʻi ho feituʻú. ʻOku ʻuhingá ko ʻenau loto-mamahi koeʻuhi ko honau kau taki fakapolitikalé mo fakalotú? ʻOku nau ongoʻi ʻoku ʻikai pē ha toe fakaleleiʻanga ia ki he ngaahi palopalema ʻoku nau fehangahangai mo iá? ʻOku nau tuingataʻa fekauʻaki mo e ngaahi talaʻofa ki he meʻa ʻoku lelei angé? ʻOku nau toupīkoi ke fakakaukau fekauʻaki mo e ngaahi meʻa fakalaumālié kaeʻoua kuo lava ke nau toki sio ki he ngaahi ola paú?
3 Fakaeʻa ʻa e ʻAmanaki ʻo e Puleʻangá: ʻOku ʻikai ha palopalema ʻe taʻemalava ke solova ʻe he Puleʻangá. Ko ia, ʻi he taimi ʻoku lava ai ke fai peheé, ʻoku totonu ke tau lea fekauʻaki mo e ngaahi talaʻofa ʻa e Puleʻangá, ʻo lave ki he ngaahi fakamatala Fakatohitapu tefitó, neongo kapau ʻoku ʻikai malava pe ʻikai ʻaonga ke fakahā ha konga Tohitapu. (Hep. 4:12) Kae kehe, ʻe lava fēfē ke tau ʻai ʻa e fetalanoaʻakí ke aʻu ki he tuʻunga ko iá?
4 ʻOku fiemaʻu ki he kakaí ke nau mahinoʻi ʻa e taumuʻa ʻo ʻetau ʻaʻahí. ʻOku fiemaʻu ke nau ʻiloʻi ko ʻetau ʻi aí ko ʻetau ʻofa ki he kaungāʻapí pea mo ʻetau tokanga ki he kakai ʻo e koló. ʻE lava ke tau ʻeke ha fehuʻi kuo ʻosi fokotuʻutuʻu lelei ʻo hangē ko e, “Ko e hā hoʻo fakakaukaú, ko e hā ʻa e fakaleleiʻanga ki [ha palopalema ʻokú ne uesia ʻa e kakai ʻo e koló]?” Kapau ʻe ʻikai ke ola lelei ha lea kamata ʻe taha, ʻahiʻahi ha lea ʻe taha.
5 ʻI he taha ʻo e feituʻu koloaʻia angé ʻa ia naʻe ʻikai ke houngaʻia ai ʻa e kakaí ʻi he pōpoaki ʻo e Puleʻangá, ʻoku feinga ʻa e kau malangá ke maʻu ha lea kamata ʻe lava ke ne langaʻi ʻa e mahuʻingaʻiá. ʻI hano fakaeʻa ʻa e tohi ʻIlo, naʻe ʻahiʻahiʻi ai ʻe ha ongo meʻa mali ʻa e lea kamata ko ʻení: “ʻOkú ke fakakaukau ʻoku mahuʻinga ha ako lelei ki he lavameʻa ʻi he māmani ʻo e ʻaho ní? ʻOkú ke loto-tatau ko ha ako lahi ange ʻe lava ke fakakau atu ki ai ʻa e ʻilo ki he Tohitapú?” ʻI he hoʻatā efiafi ʻe taha naʻá na tufa ai ʻa e tohi ʻe tolu, ko e taha ki ha fefine naʻá ne pehē ki mui kuó ne lau ʻa e tohi ʻIlo fakakātoa, peá ne loto-lelei ki ha ako Tohitapu.
6 ʻI he taimi ʻokú ke fetaulaki ai mo e loto-noá, ʻahiʻahiʻi ʻa e ngaahi lea kamata kehekehe, ʻeke ha ngaahi fehuʻi fakatupunga fakakaukau, pea ngāueʻaongaʻaki ʻa e mālohi ʻo e Folofola ʻa e ʻOtuá. ʻE lava nai ai ke ke tokoniʻi ʻa e niʻihi kehé ke nau tui ki heʻetau ʻamanaki fakaofo ki he Puleʻangá.