ʻOku Foaki ʻe Sihova ʻa e Mālohi ʻo Makehe Atu
1 Ko ha monū maʻongoʻonga ʻo e ngāue toputapú—ko e ngāue fakafaifekau faka-Kalisitiané—kuo tuku ia ki he kotoa ʻo e kau ākonga ʻa Sīsuú. (Mt. 24:14; 28:19, 20) Ka ko e taʻehaohaoa fakaetangatá mo e ngaahi tenge ʻo e fokotuʻutuʻu ʻo e ngaahi meʻa ko ʻení ʻokú ne uesia kitautolu ʻi ha taimi ke tau vakai ai kiate kitautolu ʻoku tau taʻefeʻunga.
2 ʻI he taimi ʻoku hoko ai ʻení, ʻoku lava ke fakafiemālieʻi ai kitautolu ʻe he tohi ʻa e ʻaposetolo ko Paulá ki he kau Kalisitiane pani ʻi Kolinitoó. Naʻá ne tohi: “Ko e anga oʻemau maʻu ʻa e koloa ko ia, ʻoku faʻo hina kelekele.” (2 Kol. 4:7) Naʻe tuipau ʻa Paula: “ʻI he ʻemau maʻu ʻa e lakanga ko é . . . ; ʻoku ʻikai te mau foʻi.” (2 Kol. 4:1) Ko e moʻoni, ko ha pole ia ki he tokotaha kotoa pē ʻo kitautolu, pe ko e kau paní pe ko e “fanga sipi kehe,” ke hanganaki talaki ʻa e ongoongo leleí pea “ʻoua ʻe foʻi.” ʻOku fiemaʻu kiate kitautolu ʻa e mālohi mei he ʻOtuá, ʻa ia ʻokú ne tokonaki mai “ʻa e makehe atu ʻo e mafai.”—Sione 10:16; 2 Kol. 4:7e.
3 ʻOku fakalototoʻá, ko e tokolahi ʻo e Kau Fakamoʻoní ʻoku nau faivelenga ko e kau ʻevangeliō neongo ʻa e fekuki mo e fakatanga fakamamahí, ngaahi palopalema mafatukituki ʻo e moʻui lelei fakaesinó, pe fakangatangata ʻa e tuʻunga fakaepaʻangá. Ko kitautolu kotoa kuo pau ke tau ʻiloʻi ko ʻetau ngāue ko ia ke malangá ʻoku tau maʻu ai ʻa e poupou ʻa Sihová. ʻI he ʻikai ke tuku ʻa e loto-siʻí pe ongoʻi manavaheé ke ne fakavaivaiʻi ʻetau fakapapau ke malangá, ʻai ke “fakakaukaua kimoutolu ʻi he ʻEiki, ʻio, ʻi he ivi ʻo hono māfimafi.”—Ef. 6:10; Pal. 24:10.
4 Founga ke Maʻu Ai ʻa e Mālohi mei he ʻOtuá: Kītaki ʻi he lotu, kole ʻa e tokoni mo e fakaivimālohi ʻa e ʻOtuá. (Loma 12:12; Fili. 4:6, 7) Pea, fakataha mo ho lotó kotoa, falala kia Sihova ke ne tokonaki mai ʻa e mālohi ʻoku makehe atú. (Pal. 3:5) Lau ʻa e ngaahi talanoa ʻo e meʻa moʻoni ʻi he moʻuí ʻi onopooni ʻi heʻetau ngaahi makasiní, koeʻuhí ʻoku nau ʻomai ʻa e fakamoʻoni, ʻoku tokoniʻi ʻe Sihova ʻene kau sevānití he ʻahó ni ke nau matuʻuaki ʻa e ngaahi ʻahiʻahí. Hanganaki feohi mo e ngaahi tokoua ʻi he fakatahaʻangá, pea ʻoua ʻe liʻaki ʻa e ngaahi fakataha ʻa e fakatahaʻangá.—Loma 1:11, 12; Hep. 10:24, 25.
5 ʻOfa ke tau fai ʻa e kotoa te tau malavá ke tau ʻi he tuʻunga ke maʻu ʻa e mālohi ʻo Sihová—ko ha mālohi ʻoku makehe atu pea te ne tokoniʻi kitautolu ke ʻoua ʻe foʻi ʻi he ngāue mahuʻinga taha ko hono malangaʻi ʻa e Puleʻangá.