Ko ha Ngāue ʻOku Poupouʻi ʻe he ʻOtuá
1 ʻI he lotolotonga ʻo e kau sevāniti ʻa e ʻOtuá he ʻaho ní, ko e tokosiʻi pē ai ʻoku nau maʻu ʻa e tuʻunga tuʻu-ki-muʻa ʻi he akó, koloaʻiá, pe ʻiloa ʻi he fokotuʻutuʻu lolotonga ʻo e ngaahi meʻá. ʻI he ʻuhinga ko iá, ʻoku fakataleʻi ai ʻe he kakai ʻe niʻihi ʻetau ngāue fakafaifekaú ʻo pehē ʻoku siʻi hono mahuʻingá. (Ai. 53:3) Kae kehe, ko e ngāue fakaeako Tohi Tapu ʻoku tau faí kuó ne ʻoatu ʻa e fakafiemālie mo e ʻamanaki ki he kakai ʻe laui miliona takatakai ʻi he foʻi kolopé. Kuo anga-fēfē hono lavaʻi ʻe he kakai lāuvalé ʻa e ngaahi ola tuʻu-ki-muʻa peheé? ʻI he poupou pē ʻa e ʻOtuá. (Mt. 28:19, 20; Ng. 1:8) “Kuo fili ʻe he ʻOtua ʻa e ngaahi meʻa ʻo mamani ʻoku vaivai,” ko e fakamatala ia ʻa e ʻapositolo ko Paulá, “ke fakamāʻi ʻa e ngaahi meʻa ʻoku malohi.”—1 Kol. 1:26-29.
2 Ko e kau ʻapositoló mo e kau Kalisitiane kehe ʻi he ʻuluaki senitulí ko e tokolahi aí ko e kau ‘taʻe kolisi kinautolu, pea taʻe maʻu tuʻunga.’ (Ng. 4:13) Neongo ia, naʻa nau tuli loto-toʻa ki heʻenau ngāue ke malangaʻi ʻa e ongoongo leleí, pea naʻe tāpuakiʻi ʻe Sihova ʻenau ngaahi feingá. Neongo ʻa e ngaahi fakafaingataʻaʻiaʻangá mo e ngaahi fakafepakí, ‘naʻe tupu mālohi ʻa e folofola ʻa e ʻEikí, pea ne fakaaʻau ʻo kaukaua.’ Kuo ʻikai lava ke taʻofi ʻe ha meʻa ʻe taha ʻa e ngāué koeʻuhi naʻe poupouʻi ia ʻe he ʻOtuá. (Ng. 5:38, 39; 19:20) Kuo hoko ʻa e meʻa tatau ʻi onopooni. Naʻa mo e fakafepaki ʻosi fakapapauʻi naʻe fai ʻe he kau pule mafai mālohí naʻe ʻikai malava ke taʻofi ai ʻa e ongoongo leleí mei heʻene ikuná mo ʻene tupú.—Ai. 54:17.
3 ʻAve ʻa e Fakahīkihikí Kotoa ki he ʻOtuá: ʻOku ʻomai ʻe hotau tuʻunga fakahōifua ko e kau faifekau ʻa e ʻOtuá ʻa e ʻuhinga ke tau pōlepole ai ʻia kitautolu? ʻIkai ʻaupito. ʻI he lave ki he ngāue fakafaifekau faka-Kalisitiané, naʻe tohi ʻa Paula: “Ka ko e anga oʻemau maʻu ʻa e koloa ko ia, ʻoku faʻo hina kelekele, koeʻuhi ke ʻa e ʻOtua ai pe ʻa e makehe atu ʻo e mafai, ʻo ʻikai ko e meʻa meiate kimautolu.” (2 Kol. 4:7) Naʻe ʻiloʻi ʻe Paula naʻá ne malava ke fakahoko ʻa ʻene ngāue fakafaifekaú ʻi he mālohi pē naʻe ʻomai ʻe he ʻOtuá.—Ef. 6:19, 20; Fili. 4:13.
4 ʻOku pehē foki ʻetau ʻiloʻi ko hono lavaʻi ʻo e ngāue fakamalangá koeʻuhi pē ko ʻetau “taʻimālie tokoni mei he ʻOtua.” (Ng. 26:22) ʻAki ʻa e fanongonongo ko ia ʻi māmani lahí, ʻoku ngāueʻaki ai kitautolu ʻe Sihova ʻi ha founga mālohi ke fakahoko ai ha luluʻi ʻo e ngaahi puleʻangá—ko ha fakaʻilonga ʻo e fakaʻauha ʻi he tuʻunga fakaefakamaau ʻoku vave ke hoko maí. (Hak. 2:7) He monūʻia ē ko kitautolu ʻi he hoko ko e “kaungāngaue . . . mo e ʻOtua” ʻi he utu-taʻu fakalaumālie maʻongoʻongá!—1 Kol. 3:6-9.